ޓީޗަރުންނަށް އަޅުގަނޑުމެން އެންމެން މިވަނީ ދަރާފައި: ރައީސް ޞާލިހު
ދަރިވަރުންނަށް ޢިލްމު އުނގަންނައިދިނުމަށް ޓީޗަރުން ކުރައްވަމުން ގެންދަވާ މިންނެތް ބުރަ މަސައްކަތަށް އެންމެން ވެސް އެ ބޭފުޅުންނަށް ދަރާފައިވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
މިއަދު ފާހަގަކުރަމުންދާ ބައިނަލްއަގުވާމީ ޓީޗަރުންގެ ދުވަހާއި ގުޅިގެން ރައީސް ޞާލިހު ކުރެއްވި ޓުވީޓެއްގައި ވިދާޅުވީ، ޓީޗަރުންގެ ފަރާތުން ލިބޭ ހެޔޮ ތަސައްވަރަކީ ދާއިމަށް ދަރިވަރުންގެ ކިބައިގައި ހަރުލާނެ ކަމެއް ކަމަށެވެ. އަދި އަމިއްލަ އެދުމެއްނެތި، ދަރިވަރުންނަށް ޢިލްމު އުނގަންނައިދިނުމަށް ޓީޗަރުން ކުރައްވަމުން ގެންދަވާ މިންނެތް ބުރަ މަސައްކަތަށް އެންމެން ވެސް އެ ބޭފުޅުންނަށް ދަރާފައިވާ ކަމަށް ރާއީސް ޞާލިހު ވިދާޅުވިއެވެ.
"މި އަހަރުގެ ޓީޗަރުންގެ ދުވަހުގެ މުނާސަބަތުގައި ހުރިހާ ޓީޗަރުންނަށް ޝުކުރު އަދާކޮށް އެ ބޭފުޅުންގެ މަސައްކަތް އަގުވަޒަން ކުރަން،" ރައީސް ޞާލިހު ވިދާޅުވި އެވެ.
މި އަހަރުގެ މެއި މަހުގެ އެއް ވަނަ ދުވަހު ރައީސް ޞާލިހު ވަނީ ތައުލީމީ ދާއިރާގައި މަސައްކަތް ކުރައްވާ ފަރާތްތަކުގެ މުސާރަ ބޮޑު ކުރައްވާ އަލަށް ގެންނެވި ބަދަލު ހިއްސާ ކުރައްވާފައެވެ.
އެބަދަލާއި އެކު ގިނަ ޓީޗަރުންނަށް މަދުވެގެން 20،000 ރުފިޔާ މުސާރައިގެ ގޮތުގައި ލިބެއެވެ. އަދި ޕްރިންސިޕަލުންގެ ތެރެއިން އެންމެ ދަށް ރޭންކްގެ ޕްރިންސިޕަލްއަކަށް ވެސް ކޮންމެ މަހަކު މުސާރައިގެ ގޮތުގައި އެންމެ މަދުވެގެން 30،000ރ. ލިބެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
