ޔޫސަބަލް ރިޒާވް ގުނުން ގަވަރުނަރަށް އޮތީ މަނާކޮށްފަ: ސައީދު

ދައުލަތުގެ ޔޫސަބަލް ރިޒާވް ގުނުން މަރުކަޒީ ބޭންކުގެ ގަވަރުނަރަށް އޮތީ މަނާކޮށްފައިކަމަށް މަޖިލީހުގެ މާވަށު ދާއިރާގެ މެމްބަރު އަދި ކުރީގެ އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.

ސައީދު މިފަދައިން ވިދާޅުވެފައިވަނީ ޚަރަދުކުޑަކުރުމަށް އަހަރަކު އެއްފަހަރު ބައި-އިލެކްޝަން ބޭއްވުމަށް ލޯކަލް ކައުންސިލްގެ އިންތިޚާބުގެ ގާނޫނަށް ހުށައެޅި އިސްލާހަށް ބަހުސްކުރައްވަމުންނެވެ.

ސައީދު ވިދާޅުވީ ޚަރަދު ކުޑަކުރަން ބޭނުންވާކަމަށްވާނަމަ ކުރަންވީ ކަމަކީ ސަރުކާރާއި ކުންފުނިތަކުގެ ޚަރަދުތައް ކުޑަކުރުންކަމަށެވެ. އެގޮތުން މުވައްޒަފުންނަށް މުސާރަ ދެވޭނެ ގާބިލުކަންވެސް މިހާރު ސަރުކާރުގެ ކިބައިގައި ނެތްކަމަށް ސައީދު ވިދާޅުވިއެވެ.

އެގޮތުން މިފަހުން އިންޑިއާއިން 100 މިލިއަންގެ ލޯނު ނުދިންނަމަ މުވައްޒަފުންނަށް މުސާރަކޮޅުވެސް ނުދެވުނީސްކަމަށް އަޑުތައް ފެތުރިފައިވާކަން އޭނާ ފާހަގަކުރެއްވިއެވެ. އަދި އެކަމުގެ ސީދާ ހަގީގަތަކީ ކޮބައިކަން ނޭނގޭއިރު ދައުލަތުގެ ޔޫސަބަލް ރިޒާވުގައި ހުރީ ކިހާ ވަރެއްކަންވެސް ބެލުމުގެ ހުއްދަ މިހާރު އެމްއެމްއޭގެ ގަވަރުނަރަށްވެސް ނޯންނަކަމަށް ސައީދު ވަނީ ވިދާޅުވެފައެވެ.

"ހަމަގައިމުވެސް 100 މިލިއަން އެމެރިކާ ޑޮލަރުގެ ލޯނު އިންޑިއާއިން އިހައްދުވަހު ނުލިބުނު ނަމަ އަޅުގަނޑު އަޑުއެހުން މުސާރަ ދޭނެ ފައިސާވެސް ނެތް ވާހަކަ. މީގެ ހަގީގަތެއްވެސް ނޭނގޭނެތާ. އެއީ ޔޫސަބަލް ރިޒާވު ގައި ހުރި އަދަދެއްވެސް މިހާރު ގުނުން އަލީ ހާޝިމުގެ މައްޗަށް މަނާ ކުރައްވާފައި ވަނީ"

މާވަށު ދާއިރާގެ މެމްބަރު ސައީދު

ދައުލަތުގެ ޔޫސަބަލް ރިޒާވް ގުނުމުގެ ބާރު ގަވަރުނަރަށް ނެތްކަމަށް ކުރީގެ އިކޮނޮމިކް މިނިސްޓަރުކަންވެސް ކުރައްވާފައިވާ މުހައްމަދު ސައީދު ވިދާޅުވެފައިވާއިރު، ދައުލަތުގެ ރިޒާވްގައި ހުރީ ކިހާ މިންވަރެއްކަން ހާމަކުރުމަށް ފިނޭންސް މިނިސްޓަރު އަމީރު ވަނީ އުޒުރުވެރިވެފައެވެ.

މިއަހަރުގެ ޖޫންމަހުގެ ކުރީކޮޅު މަޖިލީހުގެ ނައިބުރައީސް އީވާ ވަނީ ދައުލަތުގެ ޔޫސަބަލް ރިޒާވްއާއި ގުޅިގެން ފިނޭންސް މިނިސްޓަރާއި ސުވާލުކުރައްވާފައެވެ. އެހެން ނަމަވެސް އީވާ ސާފުކުރައްވަން އެދިވަޑައިގެން މައުލޫމާތު ހާމަކުރެއްވުމުގެ ބަދަލުގައި ފިނޭންސް މިނިސްޓަރު ވިދާޅުވީ ރާއްޖޭގެ ރިޒާވް ހުސް ނުވާނެކަމުގެ ޔަގީންކަން ދެއްވާކަމަށެވެ.

އޭގެ އިތުރުން މިނިސްޓަރު ވިދާޅުވީ އިތުރުވަމުން އަންނަ ޑޮލަރުގެ އާމްދަނީއާއެކު ރަސްމީ ރިޒާވް މި އަހަރު ނިމޭއިރު ޕްރީ-ކޮވިޑް ލެވެލްގައި ދެމެހެއްޓޭނެ ކަމަށެވެ.

ކުރިއާ އަޅައިބަލާއިރު ރާއްޖޭގެ ގްރޮސް އަދި ނެޓް ރިޒާވް ވެސް ހުރީ މަތީ މިންވަރެއްގައިކަން ފާހަގަކުރައްވާ އޭނާ ވިދާޅުވީ އެ މިންގަނޑުތަކުގައި ދެމެހެއްޓުމަށް ބޭރު ފައިސާގެ އިންފްލޯ އަދި އައުޓްފްލޯ ގާތުން ބަލަމުންދާ ކަމަށާއި ދިމާވާ ގޮންޖެހުންތަކަށް ފިޔަވަޅު އަޅަމުންދާ ކަމަށެވެ.