ޕީޕީއެމް އިން 10،000 ފޯމް އިލެކްޝަންސް ކޮމިޝަނަށް ހުށަހަޅައިފި!

އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އިން 10,000 މެންބަރުންގެ ފޯމް އިލެކްޝަންސް ކޮމިޝަނަށް ހުށަހަޅައިފިއެވެ.

ކުރިއަށް އޮތް 2023 ވަނަ އަހަރުގެ ރިޔާސީ އިންތިހާބަށް ތައްޔާރުވުމަށް ޕީޕީއެމް އިން ކުރަމުންދާ މަސައްކަތުގެ ތެރެއިން ޕާޓީއަށް މެންބަރުން އިތުރު ކުރުމުގެ މަސައްކަތް މިހާރު ވަނީ ފަށާފައެވެ. އެގޮތުން، ފާއިތުވި ދުވަސްތަކުގައި ޕާޓީއަށް ހުށަހެޅިފައިވާ 10,000 މެންބަރުންގެ ފޯމް މިއަދު އިލެކްޝަންސް ކޮމިޝަނަށް މިއަދު ހުށަހަޅާފައިވާ ކަމަށް އެޕާޓީން ވަނީ ބުނެފައެވެ.

މިފޯމްތަކާއި ގުޅިގެން މައުލޫމާތު ދެމުން ޕީޕީއެމްގެ ސެކިއުރިޓީ ޖެނެރަލް ޝަކީލް ވިދާޅުވީ، އެޕާޓީން މިއަދު މި ހުށަހަޅާ 10,000 މެންބަރުންގެ ފޯމުގެ ތެރޭގައި ގިނަ އަދަދަކަށް ސަރުކާރު ހިންގާ މައި ޕާޓީ، އެމްޑީޕީ ދޫކޮށް ޕީޕީއެމާ ގުޅުނު މެންބަރުންވެސް ހިމެނޭ ކަމަށާ، އެއިން ހާމަވަނީ އަދުގެ ސަރުކާރާއިމެދު ރައްޔިތުން ހިތްހަމަ ނުޖެހޭ ކަމަށެވެ. އަދި ކުރިއަށް އޮތް ރިޔާސީ ދައުރުގެ ރައީސުލްޖުމްހޫރިއްޔާ ގެ މަގާމަށް ރައީސް ޔާމީން ބަލައިގެންފައިވާ ކަންވެސް އެއިން ދޭހަވާ ކަމަށް އޭނާ ވިދާޅުވިއެވެ.

ރިޔާސީ އިންތިހާބަށް ޕީޕީއެމުން ވަމުންދާ ތައްޔާރީތަކުގެ ތެރެއިން ޕާޓީ މެންބަރުން އިތުރު ކުރުމުގެ އިތުރުން ޕާޓީގެ ހިންގުން ހަރުދަނާކުރުމަށް ވެސް ގިނަ ހަރަކާތްތަކެއް ގެންދަނީ ކުރިއަށެވެ.

އެގޮތުން، ނިމިދިޔަ ސެޕްޓެމްބަރު މަހުގެ 29 ވަނަ ދުވަހު އިދިކޮޅު ކޯލިޝަންގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ވަނީ ދ. ކުޑަހުވަދޫއަށް ވަޑައިގެންފައެވެ. ރައީސް ޔާމީންގެ އެ ދަތުރު ފުޅުގެ ތެރެއިން ވެސް ޕީޕީއެމް އަށް ގިނަ އަދަދެއްގެ މެންބަރުން ސޮއި ކޮށްފައިވާއިރު، އެ ދަތުރުފުޅުގައި އެމަނިކުފާނު ވަނީ، ކުރިއަށް އޮތް ރިޔާސީ އިންތިޚާބު ކާމިޔާބު ވެއްޖެނަމަ ކޮށްދެއްވާނެ ވަރަށް ގިނަ ކަންކަން ވެސް ފާހަގަކުރައްވާފައެވެ.