އައްޑޫއަށް ސަރުކާރުން ވެފައިވާ އިހުމާލު ރައްޔިތުން ދަނީ ހިއްސާކުރަމުން: ހީނާ

އައްޑޫ ސިޓީއަށް މި ސަރުކާރުން އިހުމާލުވެފައިވާކަން ފާހަގަކުރައްވާ ރައްޔިތުން ބޮޑެތި ކަންބޮޑުވުންތަކެއް ފާޅުކުރަމުންދާކަމަށް އިދިކޮޅުން ބުނެފިއެވެ.

ނޮވެމްބަރު 6 ވަނަ ދުވަހު ރައީސް ޔާމީން އައްޑޫ ސިޓީއަށް ވަޑައިގެންނެވުމަށް ނިންމާފައިވާއިރު، އިދިކޮޅުގެ ޓީމުތައް މިހާރު އައްޑޫ ސިޓީގެ އެކި ރަށްރަށުގައި ދަނީ ހަރަކާތްތެރިވަމުންނެވެ.

އައްޑޫ ސިޓީގެ އެންމެ ފަހުގެ ތައްޔާރީތަކާއި ގުޅިގެން މައުލޫމާތުދެއްވަމުން އިދިކޮޅު ކޯލިޝަންގެ ތަރުޖަމާނު ހީނާ ވަލީދު ވިދާޅުވީ ރައީސް ޔާމިންއަށް މަރުހަބާ ދެންނެވުމަށް އައްޑޫ ސިޓީ ތައްޔާރުވެފައިވާކަމަށެވެ.

އެގޮތުން މާދަމާ އެމަނިކުފާނު ވަޑައިގަންނަވާއިރު، މަރުހަބާ ދެންނެވުމަށް އެއަރޕޯޓަށް ދާން ބޭނުންވާ ފަރާތްތަކަށް އެ އިންތިޒާމުތައް ހަމަޖެހިފައި ހުރިކަން ފާހަގަކުރެއްވިއެވެ. އަދި އެކަމުގައި ރަށްރަށުގެ ޕީޕީއެމް ސްޓިއަރިން ކޮމެޓީތަކުން މަސައްކަތް ކުރަމުންދާކަމަށް ހީނާ ވިދާޅުވިއެވެ.

ހީނާ ވިދާޅުވީ އައްޑޫ ސިޓީގެ ރައްޔިތުންނާއި ބައްދަލުވެ ދެކެވުނު ވާހަކަތަކުގެ ތެރޭގައި ރައީސް ޔާމީންއަށް އޮތް ތާއީދު ވަރަށް ބޮޑަށް އިތުރުވެފައިވާކަން ފާހަގަކުރެވޭކަމަށެވެ. އެގޮތުން ރައީސް ޔާމިންއާއި ބައްދަލުކޮށް އެމަނިކުފާނަށް މަރުހަބާ ކިޔަން ގިނަ ބަޔަކު ބޭނުންވާކަމަށްވެސް ހީނާ ވިދާޅުވިއެވެ. އަދި ވަޒީފާގެ ބިރުވެރިކަން އޮތުމުން ރައީސް ޔާމީންއަށް މަރުހަބާ ދެންނެވުމަށް ނުދެވޭ ފަރާތްތައްވެސް ތިބި ނަމަވެސް ރައީސް ޔާމީންގެ މަސައްކަތްޕުޅު ރައްޔިތުން ގަބޫލުކުރާކަމަށް ހީނާ ވިދާޅުވިއެވެ.

ހީނާ އިތުރަށް ވިދާޅުވީ އައްޑޫ ސިޓީއަށް މި ސަރުކާރުން ވަމުންދާ އިހުމާލުގެ ވާހަކަތައް ރައްޔިތުން ހިއްސާކުރަމުންދާކަމަށެވެ. އައްޑޫ ސިޓީއަށް ވީ ވައުދުތައް ނުފުއްދާތީ ރައްޔިތުންގެ ބޮޑެތި ކަންބޮޑުވުންތަކެއް ހުރިކަންވެސް ހީނާގެ ވާހަކައިގައި ވަނީ ވިދާޅުވެފައެވެ.

އެއާއެކު ހީނާ ވަނީ ރައްޔިތުންގެ ހުރި އެ ޝަކުވާތަކާއި ކަންބޮޑުވުންތައް ރައީސް ޔާމީންއަށް ހިއްސާކުރުމުގެ ފުރުސަތު ރައީސް ޔާމިންގެ މި ދަތުރުފުޅުގައި ލިބިގެންދާނެކަމަށް ވިދާޅުވެފައެވެ.

އައްޑޫ ސިޓީގެ ހުރިހާ ރަށަކަށް އެމަނިކުފާނު ޒިޔާރަތްކުރައްވާއިރު، ކޮންމެ ރަށެއްގައިވެސް މަޑުކުރައްވާ ރައްޔިތުންނާއި ބައްދަލުކުރައްވާނެކަމަށާއި، އަދި އައްޑޫ ސިޓީގެ ތަރައްގީއަށް އެމަނިކުފާނު ގެންގުޅުއްވާ ތަސައްވަރު ވަރަށް ތަފްސީލުކޮށް މި ދަތުފުޅުގައި ހާމަކުރައްވާނެކަމަށް ހީނާ ވަނީ ވިދާޅުވެފައެވެ.