ރައީސް މުޢިއްޒުގެ ތަަރައްގީގައި ފުލުހުންގެ ދައުރު ބޮޑު: ޣައްސާން
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދިވެހި ގައުމަށް ގެންނަވަން އެދިވަޑައިގަންނަވާ ތަރައްގީގެ މަސައްކަތްތަކުގައި ފުލުހުން ބޮޑު ދައުރެއް އެބައޮތް ކަމަށާއި އެ މަގަށް މަސައްކަތް ކޮށްދެއްވުމަށް ޑިފެންސް މިނިސްޓަރު ޣައްސާން މައުމޫން އެދިވަޑައިގެންފި އެވެ.
ފުލުހުންގެ 38 ވަނަ އަސާސީ ތަމްރީން ކޯހުގެ ދަސްވެނިވުމުގެ ރަސްމިއްޔާތު ރޭ ޝަރަފުވެރިކޮށްދެއްވައި ވާހަކަ ދައްކަވަމުން ޣައްސާން ވިދާޅުވީ، 17 ނޮވެމްބަރ 2023 ވަނަ ދުވަހު ރައީސް މުއިއްޒު ހުވައެއް ކުރައްވައިގެން ވެރިކަމަށް ވަޑައިގަތީ ރައްޔިތުން ހަވާލުކުރެއްވި ޒިންމާތަކެއް އަދާކުރެއްވުމަށް ކަމަށެވެ.
ދިވެހި ރައްޔިތުންގެ އުއްމީދުތައް ހަގީގަތަކަށް ހައްދަވައި ދެއްވައި، ރާއްޖޭގެ މިނިވަންކަމާއި، އިސްތިގުލާލު ހިމާޔަތް ކުރައްވައި، ރައްޔިތުންނާއި މުޖުތަމައު ރައްކާތެރި ކުރައްވައި، އިގްތިޞާދީ ގޮތުން ފުދުންތެރި ތިޔާގި ގައުމަކަށް މި ދިވެހި ރާއްޖެ ހައްދަވައި ދެއްވަން. އަޅުގަނޑުމެންނަށް މިހާރު ފެނިގެން މިދަނީ، އެ ބުރަ މަސްއޫލިއްޔަތު ޒިންމާދާރު ކަމާއެކު، ރައީސް އަދާކުރައްވަމުން ގެންދަވާ ތަން،"
ވަޒީރު ޣައްސާން މައުމޫން
މިއާއެކު މިނިސްޓަރު ވިދާޅުވީ ގައުމެއް ތަރައްގީވެ ކުރިއަރާ ދާނީ އެ ގައުމެއްގެ މިނިވަންކަމާއި މުސްތަގިއްލުކަން ޔަގީންވުމާއެކު އަމަންއަމާންކަން ގާއިމުކުރެވި އަދުލު އިންސާފު ކަށަވަރުކޮށްދެެވި އަދި ރައްޔިތުންގެ މުދަލުގެ ރައްކާތެރިކަން ޔަގީންކޮށްދެވިގެން ކަމަށެވެ. އެމަސައްކަތްތަކަކީ ގާނޫނު އަސާސީގެ ދަށުން ފުލުހުންނަށް މަތި ކުރެވިފައިވާ ޒިންމާއެއް ކަން ވަޒީރު ފާހަގަކުރެއްވިއެވެ.
އެކަމަށް ވިސްނާލުމުން ދޭހަވެގެންދަނީ، ރައީސުލްޖުމްހޫރިއްޔާ ދިވެހިންގެ އެދިވަޑައިގަތުމަށް ހޯއްދަވައިދެއްވަން މި މަސައްކަތް ކުރައްވާ ތަރައްގީ ހޯއްދަވައި ދެއްވުމުގައި ދިވެހި ފުލުހުންގެ ދައުރުގެ ފުޅާކަން….ތިބޭފުޅުންގެ މަސައްކަތްޕުޅުން ދިވެހިރާއްޖެއަކީ ސުލްހަމަސަލަސްކަން ދެމިއޮންނަ އަމަންއަމާން ވެއްޓެއް ޤާއިމުވެފައި އޮންނަ ޤައުމަކަށް ހެއްދެވުމަކީ ދިވެހި މުސްތަގުބަލް އުޖާލާވެގެންދާނެ މަގު
ވަޒީރު ޣައްސާން މައުމޫން
މިއާއެކު ޣައްސާން ވިދާޅުވީ ފުލުހެއްގެ ގޮތުގައި ދަސްވެނިވުމަކީ ބޮޑު ޒިންމާއެއް ކަމަށާއި އެހެންކަމުން ރައްޔިތުންނަށް ހިދުމަތް ކުރުމުގައި ސާބިތުވެ ތިބެންޖެހޭ ކަމަށެވެ. އަދި ފުލުހެއްގެ ގޮތުގައި މަސައްކަތް ކުރާއިރު ގައުމަށް ވަފާތެރިވެ ގައުމު އިސްކުރުމަށްވެސް ޣައްސާން އެދިވަޑައިގެންނެވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
