ސަޕްލިމަންޓަރީ ބަޖެޓް، ދިރާސާކުރަން ކޮމިޓީއަށް ފޮނުވައިފި

ސަރުކާރުގެ ފަރާތުން ރައްޔިތުންގެ މަޖިލީހަށް މިއަދު ހުށަހެޅި ސަޕްލިމަންޓަރީ ބަޖެޓް، ބަހުސް ނިންމައި ބަޖެޓް ދިރާސާކުރުމަށް ކޮމިޓީއަށް ފޮނުވައިފިއެވެ.

މަޖިލީހުގެ ތަޅުމުގައި ބަޖެޓް ބަހުސް މިއަދު ކުރިއަށްދިޔައިރު، ސަރުކާރަށް ނިސްބަތްވާ މެމްބަރުން ވިދާޅުވީ، މި ބަޖެޓަކީ ރައްޔިތުންނަށް ފާގަަތި ބަޖެޓަކަށް ވާނޭކަމަށާއި، މިއީ ދެފުށްފެންނަ އުސޫލަކުން ހުށަހެޅުނު ބަޖެޓެއް ކަމަށެވެ.

ނަމަވެސް އިދިކޮޅަށް ނިސްބަތްވާ މެމްބަރުން ވަނީ ސަޕްލިމަންޓަރީ ބަޖެޓަށް ވަރަށްބޮޑަށް ފާޑުވިދާޅުވެ ވާހަކަ ދައްކަވާފައެވެ. އެގޮތުން މިއަހަރަށް ފާސްކުރި ބަޖެޓުން ކުރިކަމެއް ފެންނަން ނެތްއިރު، ސަރުކާރުން ވަނީ އިންތިހާއަށް އުފެއްދުންތެރި ނޫން ހަރަދުތަކެއް ކޮށްފައިކަން އިދިކޮޅު މެމްބަރުން ވަނީ ފާހަަގަކޮށްފައެވެ.

ސަރުކާރުން ޚަރަދުތައް ކޮންޓްރޯލް ކުރުމަށް އެޅި ފިޔަވަޅުތަކާއި އެކީ، މި އަހަރަށް ހުށަހަޅާ ސަޕްލިމަންޓަރީ ބަޖެޓަކީ 5.1 ބިލިއަން ރުފިޔާގެ ސަޕްލިމަންޓަރީ ބަޖެޓެކެވެ. ސަރުކާރުން ސަޕްލިމެންޓަރީ ބަޖެޓެއް ހުށަހެޅިއިރު، މިއަހަރަށް ކަނޑައެޅި ބަޖެޓުން، މިދިޔަ މަހުގެ ނިޔަލަށް ބަޖެޓުގެ 74 އިންސައްތަ ހޭދަކުރެވިފައިވާކަމަށް ފިނޭންސް މިނިސްޓްރީން ބުނެއެވެ.

ސަޕްލިމެންޓަރީ ބަޖެޓާ ގުޅޭގޮތުން ފިނޭންސް މިނިސްޓަރު މޫސާ ޒަމީރު ވިދާޅުވީ ކުރީ ސަރުކާރާ ޚިލާފަށް، މި ސަރުކާރުން ސަޕްލިމަންޓަރީ ބަޖެޓް ހުށަހަޅާފައިވަނީ މާލިއްޔަތުގެ ގާނޫނުގައި ވާގޮތަށް ކުރިއަށް އޮތް މަސްތަކުގައި ހިނގާނެކަމަށް ލަފާކުރާ ޚަރަދުތައް ކުރިއާލާ ރައްޔިތުންގެ މަޖިލީހަށް އިއުލާނުކޮށް ހުއްދަ ހޯދުމަށް އެދުމުގެ ތެރެއިން ކަމަށެވެ.

ފާއިތުވި ތަނުގައި ސަރުކާރުން ސަޕްލިމެންޓަރީ ބަޖެޓު ހުށަހަޅާފައިވަނީ ޚަރަދު ކުރުމަށްފަހުގައިކަން 19 ވަނަ މަޖިލީހުގެ ރިޔާސަތުންވެސް ވަނީ އެ މަޖިލީހުގައި ތަކުރާރުކޮށް ފާހަގަކޮށްފައެވެ.

ސަރުކާރުން ކުރިން ބުނެފައިވަނީ ހަރަދުތައް ކުޑަނުކޮށްފިނަމަ މިއަހަރު 10 ބިލިއަން ރުފިޔާގެ ސަޕްލިމެންޓްރީ ބަޖެޓެއް ހުށަހަޅަން ޖެހިދާނެ ކަމަށެވެ. ނަމަވެސް ހަރަދުކުޑަކުރުމަށް އެޅުނު ފިޔަވަޅުތަކާއެކު އެ އަދަދު ކުޑަވެގެންދާނޭކަމަށް ފިނޭންސް މިނިސްޓަރު މޫސާ ޒަމީރު ވިދާޅުވިއެވެ.

ރައްޔިތުންގެ މަޖިލީހުން މިއަހަރު ފާސްކޮށްފައިވަނީ 49.8 ބިލިއަން ރުފިޔާގެ ބަޖެޓެކެވެ. ބަޖެޓަށް އާމްދަނީގެ ގޮތުގައި ލިބޭނޭކަމަށް ލަފާކުރީ 33.5 ބިލިއަން ރުފިޔާއެވެ. ޑެފިސިޓް ހުންނާނޭކަމަށް ލަފާކޮށްފައިވަނީ 16.3 ބިލިއަން ރުފިޔާގައެވެ.