ބޭސް ފަރުވާއަށް މާލެ ދިޔަ އުމުރުން ދުވަސްވީ މީހަކަށް ވަޅިން ބިރުދައްކައި ފޭރިގެންފި

ބޭސްފަރުވާއަށް މާލެ އައިސްހުރި ދުވަސްވީ މީހަކު ކުއްޔަށް ހިފައިގެން ހުރި ކޮޓަރިއަކަށް، ދެ މީހަކު ވަދެ ބިރުދައްކައި ފައިސާއާއި ފޯނު ފޭރިގަނެއްޖެއެވެ.

ފޭރިގަތްމީހާގެ ދަރިފުޅު ސަމާހު އަހަމަދު އެކްސްގައި ހިއްސާ ކުރި ޕޯސްޓެއްގައި ބުނެފައި ވަނީ ބައްޕަ ކުއްޔަށް އުޅެމުން ދިޔަ ކޮޓަރިއަށް މެންދުރު ދެ މީހަކު ވަދެ ބައްޕަ ރަހީނުކޮށް ފައިސާތަކާއި ފޯނު ފެރިގަނެފައިވާކަމަށެވެ. ބައްޕައަތުން އެ އެއްޗެހި ފޭރިގަނެފައިވަނީ، ބަންދެ ވަޅިން ބިރުދައްކައިގެން ކަމަށް ސަމާހު ބުންޏެވެ.

މި މައްސަލައާ ގުޅިގެން ފުލުހުންގެ މީޑިއާ އޮފިޝަލް ވިދާޅުވީ، މާލެ އަށް ބޭސް ފަރުވާއަށް އައިސް ހުރި 62 އަހަރުގެ މީހަކު ކުއްޔަށް ހުރި ކޮޓަރިއަށް ވަދެ، ދެ މީހަކުވެގެން ބިރުދައްކާ، އެ މީހާގެ ފޯނާއި ފައިސާ ފޭރުނު މައްސަލަ އިއްޔެގެ ވަގުތެއްގައި ރިޕޯޓްކޮށްފައިވާ ކަަަމަށެވެ.

އަަދި މި މައްސަލައާ ގުޅިގެން އަދި މީހަކު ހައްޔަރުކޮށްފައިނުވާ ކަމަށްވެސް ފުލުހުން ވިދާޅުވިއެވެ.