އައިއެޗްއެފް ޓްރޮފީ: ދިވެހި ޓީމު ބަލިކޮށް 18 އަހަރުންދަށުގެ ތިންވަނަ ނޭޕާލުން ހޯދައިފި

އައިއެޗްއެފް ޓްރޮފީ 2024 ގައި މިއަދު މެންދުރު ކުޅުނު 18 އަހަރުންދަށުގެ މެޗުގައި ވާދަވެރި ކުޅުމަކަށްފަހު 31-29 ގެ ނަތީޖައަކުން ރާއްޖެ ބަލިކޮށް ނޭޕާލުން ބްރައުންޒް މެޑަލް ހޯދައިފި އެވެ.

އިންޑިޔާގައި މިހާރު ކުރިއަށްދާ މިމުބާރާތުގެ ލީގު ބުރުގައި މިދެޓީމު ކުޅުނު މެޗު 36-31 ގެ ނަތީޖާއަކުން ދިވެހި ޓީމު ކާމިޔާބުކުރިއިރު، ލީގުބުރުން ރާއްޖެ ތިންވަނަ ހޯދިއިރު، ނޭޕާލަށް ލިބުނީ ހަތަރުވަނައެވެ.

މިމެޗުގެ ފުރަތަމަ ހާފުގައި ދެޓީމުގެ ފަރާތުން ވަރަށް ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ 16-16 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި ދެޓީމުގެ ފަރާތުން ފެނިގެންދިޔައީ ވަރަށް ހަމަހަމަ ކުޅުމެކެވެ. އަދި މިހާފުގައި ނޭޕާލުން އިތުރު 15 ލަނޑު ކާމިޔާބުކުރިއިރު، ރާއްޖެއަށް ކާމިޔާބުކުރެވުނީ 13 ލަނޑެވެ. މިއާއެކު ދެލަނޑުގެ ފަރަގަކާއެކު ނޭޕާލުން މެޗު ކާމިޔާބުކުރީ 31-29 ގެ ނަތީޖާއަކުންނެވެ.

ޖުލައި މަހު 10-14 އަށް އިންޑިއާގެ ޖެއިޕޫރުގައި ކުރުއަށްދާ އިންޓަނޭޝަނަލް ހޭންޑްބޯޅަ ފެޑަރޭޝަން ޓްރޮފީ ޒޯން ދޭއްގައި އީސްޓް އަދި ސައުތު އޭޝިއާ ސަރައްދުގެ ޒޯން ދޭއްގައި ރާއްޖޭގެ އިތުރުން ބަންގްލަދޭޝް، ނޭޕާލް އަދި އިންޑިއާ ވަނީ މިއަހަރު މުބާރާތުގައި ބައިވެރިވެފައެވެ.

މި މުބާރާތުގައި ރާއްޖޭގެ 20 އަހަރުން ދަށުގެ ގައުމީ ފިރިހެން ޓީމާއި, 18 އަހަރުން ދަށުގެ ގައުމީ ފިރިހެން ޓީމް ވާދަކުރާއިރު، މިދެ އުމުރުފުރާގެ މެޗުތައް ވެސް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާއެކު އެއްމެޗު ކުޅެ އެންމެ ގިނަ ޕޮއިންޓް ހޯދާ ދެޓީމު ފައިނަލުގައި ކުޅޭ ގޮތަށެވެ. އަދި ތިންވަނަ ހޮވާ މެޗުގައި ވާދަކުރާނީ ލީގުބުރުގެ ތިންވަނަ ޓީމާއި ހަތަރުވަނަ ޓީމެވެ.

މިމެޗުން ރާއްޖެގެ 18 އަހަރުން ދަށުގެ ޓީމު ބަލިވި ނަމަވެސް، މުޅި މުބާރާތުގައި ވެސް ދިވެހި ޒުވާން ޓީމުގެ ފަރާތުން ވަނީ ވަރަށް ހިތްވަރުގަދަ އުންމީދީ މޮޅު ކުޅުމެއް ފެނިގެން ގޮސްފައެވެ.