ހަރުކަށި ފިކުރު ފެތުރުން ހުއްޓުވުމަށް ގިނަގުނަ މަސައްކަތްތަކެއް ކުރެވިއްޖެ: ރައީސް ޞާލިހު

ދީނުގެ ނަމުގައި އަދި ދީނާ ދެކޮޅަށް ހަރުކަށި ފިކުރު ފެތުރުން ހުއްޓުވުމަށް ގިނަގުނަ މަސައްކަތްތަކެއް ކުރެވިއްޖެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ރައީސް ޞާލިޙްގެ މިހެން ވިދާޅުވީ މިއަދު ހެނދުނު ރައްޔިތުންގެ މަޖިލީހުގެ އިދާރާގައި ބޭއްވެވި އެ މަޖިލީހުގެ މިއަހަރުގެ ފުރަތަމަ ދައުރުގެ ފުރަތަމަ ޖަލްސާގައި ރިޔާސީ ބަޔާން އިއްވަވަމުންނެވެ.

ރައީސް ޞާލިހު ވިދާޅުވީ، ދޭދޭ ކޮންމެ ދެ މީހަކާއި، ދެ ގެޔާއި، ދެ އަވަށާއި، ދެ ރަށާއި އަދި ދެ އަތޮޅުވިޔަސް، ފަރަޤު ހުންނަކަމަށެވެ. އެހެންނަމަވެސް، ސަރުކާރުން ދެކޭ ގޮތުގައި އެންމެންނަކީވެސް ހަމަހަމަ ދިވެހިރައްޔިތުން ކަމަށާ، އަދާކުރަންޖެހޭ ޙައްޤުތަކާއި، އުފުލަންޖެހޭ މަސްއޫލިއްޔަތާއި، ދޭންޖެހޭ ޚިދުމަތުގައި، ކޮންމެ ރައްޔިތަކީވެސް ސަރުކާރުގެ ކުރިމަތީގައި ޤަދަރުވެރި ދިވެހިރައްޔިތެއް ކަމަށެވެ.

މިއާއެކު ރައީސް ޞާލިހް ވިދާޅުވީ، ރައްޔިތުންގެ މެދުގައި ތަފާތު ހުރިނަމަވެސް، އެންމެހައި ރައްޔިތުން އެކަތިގަނޑެއްގެ ގޮތުގައި، ހަދައިދެނީ މާތްވެގެންވާ އިސްލާމްދީނާއި، ދިވެހި ޤައުމިއްޔަތާއި، އަދި މި ޤައުމު ކަމަށެވެ.

މިމޭރުމުން ވާހަކަ ދައްކަވަމުން ރައީސް ޞާލިހް އިތުރަށް ވިދާޅުވީ، ދުނިޔެއާއި އާޚިރަތުގެ ކާމިޔާބާއި ފަލާޙް އޮތީ މާތްވެގެންވާ އިސްލާމްދީނުގައި ކަމަށެވެ. އަދި އިސްލާމްދީނުގެ ޞައްޙަ ޢަޤީދާއާއި، ރިވެތި އަޚްލާޤާ ނުލައި ފުރިހަމަ ދިވެހި ޖީލެއް ބިނައެއްނުކުރެވޭނެ ކަމަށެވެ. މިގޮތުން، މިދިޔަ އަހަރު ރާއްޖޭގައި މީހުން ދިރިއުޅޭ ހުރިހާ ރަށެއްގައި އިސްލާމްދީނުގެ ޞައްޙަ މަޢުލޫމާތު ދިނުމުގެ މަސައްކަތް ކުރިއަށް ގެންދެވުނު ކަންވެސް އެމަނިކުފާނު ފާހަގަކުރެއްވިއެވެ.

"ޙައްދަކީ ކޮންމެ ކޮޅަކަށްވެސް ފަހަނައެޅޭ އެއްޗެއް. ދީނުގެ ނަމުގައި އަދި ދީނާ ދެކޮޅަށް ހަރުކަށި ފިކުރު ފެތުރުން ހުއްޓުވުމަށް ގިނަގުނަ މަސައްކަތްތަކެއް ކުރެވުނު. ކުރިއަށް އޮތް ތަނުގައިވެސް މި މަސައްކަތް ކުރިއަށް ގެންދާނަން."

ރައީސް އިބްރާހިމް މުހައްމަދު ޞާލިހު

ރައީސް ޞާލިހް މިފަދައިން ވިދާޅުވެފައި ވާއިރު، ހަރުކަށި ފިކުރު ނައްތާލުމުގެ ނަމުގައި މިސަރުކާރުން ހިންގި އޮޕަރޭޝަން ތަކުގައި ހައްޔަރު ކުރި ގިނަ މީހުންނަކީ ހެއްކެއްނެތި ހައްޔަރު ކޮށްފައިވާ މީހުންކަން ފާހަގަކޮށްލަންޖެހެއެވެ. އެތަނުން އެއްބައި މީހުން ހައްޔަރު ކޮށްފައިވަނީ ފުލުހުންގެ އިންޓެލިޖެންސް ރިޕޯޓް ގެ މައްޗަށް ބިނާކޮށް ކަމަށްވާއިރު، އެ ރިޕޯޓްގެ ސައްހަކަން ކަށަވަރު ކުރުމަށް ހެކި ގެނައުމަށްވެސް ފުލުހުން ވަނީ ނުކުޅެދިފައެވެ.

އޭގެ ސަބަބުން، ހައްޔަރުކޮށް، ވާނުވާއެއް ނޭނގި ބަންދުގައި، އެއްވެސް ދައުވާއެއް ނުކޮށް ވެސް އޭގެ ތެރެއިން އެއްބަޔަކު އެބަ ތިއްބެވެ.