ސައުދީ ސަރުކާރުގެ ކިބައިން މާފަށް އެދުނިންތޯ އެހި ސުވާލަށް އަމީރު ޖަވާބެއް ނުދެއްވި

ރައީސް އަބްދުالله ޔާމީން އަބްދުލްގައްޔޫމުގެ ޒައާމަތުގައި ސައުދީ ސަރުކާރާއި ގާތް ގުޅުމެއް އުފެއްދުމަށް މަސައްކަތް ކުރަމުން ދިއުމާއި ގުޅިގެން އެކަމަށް ފާޑުކިޔުންތައް އަމާޒުކުރައްވާ ފިނޭންސް މިނިސްޓަރު އިބްރާހިމް އަމީރު ސައުދީ ސަރުކާރު ކުޑައިމީސްކޮށް ދެއްކެވި ވާހަކަތަކަށް މާފަށް އެދިވަޑައިގެންފައި ވާނެތޯ އައްސަވާ މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ކުރެއްވި ސުވާލަށް މިނިސްޓަރު ވަކި ޖަވާބެއް ނުދެއްވި އެވެ.

ޚަލީޖުގެ ބައެއް ގައުމުތަކަށް ކުރެއްވި ޒިޔާރަތުގައި މިނިސްޓަރު އަމީރު ވަނީ ސައުދީއަށް ވަޑައިގެން އެ ޤައުމުގެ މާލީ ދާއިރާގެ ބައެއް ވެރިންނާ ވަނީ ބައްދަލު ކުރައްވާފަ އެވެ.

އެ ބައްދަލުވުމާއި ގުޅިގެން އަމީރަށް ބޮޑެތި ފާޑުކިޔުންތަކެއްވެސް އަމާޒުވެގެން ދިޔައެވެ. އެއީ ސައުދީ ސަރުކާރަށް ކުޑައިމީސްވާ ގޮތަށް، އަދި އެ ސަރުކާރަށް ބޮޑެތި ތުހުމަތުތަކެއް ރައްދުވާގޮތަށް މިނިސްޓަރު މީގެ ކުރިން ދައްކަވާފައިވާ ވާހަކަތަކާއި ގުޅިގެންނެވެ.

އެކަންކަމަށް އިޝާރާތްކުރައްވާ މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވަނީ ސައުދީ ސަރުކާރަށް ކުޑައިމީސްކޮށް މީގެ ކުރިން އަމީރު ދެއްކެވި ވާހަކަފުޅުތަކަށް ސައުދީ ސަރުކާރުގެ ކިބައިން މާފަށް އެދުނިންތޯ އައްސަވާ ސުވާލު ކުރައްވާފަ އެވެ.

އެހެން ނަމަވެސް ސައީދުގެ އެ ސުވާލަށް މިނިސްޓަރު އަމީރު ޖަވާބުދެއްވާފަ އެއް ނުވެއެވެ. ސައުދީ ސަރުކާރުގެ ކިބައިން މާފަށް އެދުނުކަމެއް ނުވަނަ ނޫންކަމެއް މިނިސްޓަރު ހާމަކުރައްވާފައެއް ނުވެއެވެ.

ސައުދީ ސަރުކާރުގެ ކިބައިން މާފަށް އެދުނުކަން މިނިސްޓަރު ހާމަކޮށްފައި ނުވާއިރު، ރައީސް ޔާމީންގެ ދައުރުގައި ސައުދީ ރައީސް އަވަހާރަވުމާއި ގުޅިގެން ދިވެހި ދިދަ ބައިދަނޑިއަށް ތިރިކުރުމުން އެކަމަށް މިނިސްޓަރު އަމީރު ވަނީ ފާޑުވިދާޅުވެފަ އެވެ.

މުސްލިމުންނަށް ކުރިމަތިވެފައިވާ ނިކަމެތިކަން ކުރިމަތިވަނީ މުސްލިމު ގައުމު ތަކުގެ ވެރިންގެ ސަބަބުންކަމަށާއި އިސްރާއީލްގެ ހުންނަަ އެމެރިކާ އެންބަސީ ޤުދުސަށް ބަދަލުކުރީވެސް ސައުދީގެ ރުހުން އޮވެގެންކަމަށް އަމީރު ވިދާޅުވިއެވެ.

އޭގެ އިތުރުން ސައުދީ ސަރުކާރަކީ އިންސާނުންތަކެއްތޯ، ޝައިތޯނުންތަކެއްތޯ ސުވާލުކަރައްވައި އިސްރާއީލްގެ ކަނާތުފިޔައިގެ އަނިޔާވެރި ބޮޑު ވަޒީރު ބެންޖިމިން ނަތަންޔާހޫގެ އިންތިހާބަށް ޚަރަދުކުރީ ސައުދީ ސަރުކާރުންކަމަށް ވެސް އަމީރު ވިދާޅުވެފައިވެ އެވެ. އަދި ސައުދީއަކީ ޓެރަރިޒަމް އަށް ހިއްވަރުދީ އެކަމަށް ޚަރަދު ކުރާބައެއްކަމަށް ވެސް އަމީރު ވަނީ ތުހުމަތުކޮށްފަ އެވެ.

އެހެން ނަމަވެސް އެފަދައިން ފާޑުވިދާޅުވެ އަމީރު ކުރެއްވި ޓްވީޓުތައް މިހާރު ވަނީ ޑިލީޓުކޮށްލާފަ އެވެ.