މިހާރު ގެންގުޅޭ ޕްލޭން ނޫން އެހެން ގޮތަކަށް ދަރަނި ރީސްޓްރަކްޗާ ކުރުމުގެ ވިސްނުމެއް ނެތް: އަމީރު
ދަރަނި ރީސްޓްރަކްޗާ ކުރުމަށް މިހާރު ގެންގުޅޭ ޕްލޭން ނޫން، އެހެން ގޮތަކަށް އެކަން ކުރުމުގެ ވިސްނުން ނުގެންގުޅުއްވާކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
އަމީރު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި ކެޔޮދޫ ދާއިރާގެ މެމްބަރު ހުސެއިން ޤާސިމް އެއްސެވި ސުވާލަށް ޖަވާބުދެއްވަމުން ނެވެ.
ޤާސިމް ވިދާޅުވީ ދަރަނި ރީސްޓްރަކްޗާ ކުރުމަށް މަޖިލީހުންވެސް ގޮވާލާ ޤަރާރެއް ނެރެފައިވާ ކަމަށެވެ. އަދި އެކަމާއި ގުޅިގެން ހޫނު ބަހުސެއްވެސް ކުރެވެމުންދާ ކަމަށެވެ. އެހެންކަމުން މިއީ ދަރަނި ރީސްޓްރަކްޗާ ކުރަން މުނާސަބު ވަގުތުތޯއާއި އެކަން ކުރުމުގެ ވިސްނުން ގެންގުޅުއްވަންތޯ މެމްބަރު އެއްސެވި އެވެ.
"ރާއްޖެއިން ނަގާފައި ހުރި ދަރަނި ރީސްޓްރަކްޗާކުރަން ވަރަށް ގިނަ ފަރާތްތަކުން އެބަ ގޮވާލާ، އަދި މި މަޖިލީހުގައިވެސް ގަރާރެއް އެބައުޅޭ. މީ އެވަގުތުތޯ؟
ކެޔޮދޫ ދާއިރާގެ މެމްބަރު ހުސެއިން ޤާސިމް
މެމްބަރުގެ އެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ، މިހާރަށް ބަލާ އެންމެ ރަނގަޅުގޮތަށް ދަރަނި ދެއްކުމުގެ ކަންކަން ކުރައްވަމުންދާ ކަމަށެވެ. އަދި އެ ނޫން ގޮތަކަށް އެކަން ކުރުމުގެ ވިސްނުންފުޅެއް ނުގެންގުޅުއްވާކަމަށެވެ.
"މިހާރު ރާއްޖެއަށް އެންމެ ރަނގަޅު، އަޅުގަނޑުމެންގެ އިގްތިޞާދަށްވެސް އެންމެ ރަނގަޅުވާނެ ގޮތަށް އަޅުގަނޑުމެން ކުރިން ނަގާފައި ހުރި ލޯނުތައް، ދަރަނި އަޅުގަނޑުމެން މިހާރުވެސް މި ދަނީ މާކެޓު ގަބޫލުކުރާނެ ގޮތަށް ރީސްޓްރަކްޗާ ކުރަމުން. އެހެންވީމަ އިތުރަށް އެހެން ގޮތަކަށް ރީސްޓްރަކްޗާ ކުރުމުގެ ވިސްނުމެއް އަޅުގަނޑުގެ ނެތް"
ފިނޭންސް މިނިސްޓަރު އަމީރު
2013 އިން 2018 ވަނަ އަހަރުގެ ނިޔަލަށް ނަގާފައިވާ ލޯނުތައް ރީސްޓްރަކްޗާ ކުރުމަށް މަޖިލީހުން ދީފައިވާ ލަފަޔާއި އެއްގޮތަށް ސަރުކާރުން އަމަލުކުރުމަށް ގޮވާލާ މަޖިލީހަށް ވަނީ ގަރާރެއް ހުށައަޅާފަ އެވެ.
އެ ގަރާރު ހުށައެޅުއްވީ މަޖިލީހުގެ ނައިބު ރައީސާ އީވާ އަބްދުﷲ އެވެ. އެ ގަރާރު ހުށައަޅުއްވަމުން އީވާ ވިދާޅުވީ، ދަރަނި ރީސްޓްރަކްޗާ ކުރުމުގެ ބަދަލުގައި ސަރުކާރުން ލޯނު ދައްކަން ލޯނު ނަގަމުންދާ ކަމަށެވެ.
އެފަދައިން އެކަން ކުރުމަކީ ހަގީގީ ދަރަނި ދަންތުރައިގައި ރައްޔިތުން ޖެހި ކައިރި މުސްތަގުބަލެއްގައި މާލީ ގޮތުން ބޮޑެތި ބުރަތަކެއް އުފުލަން ޖެހޭނެ ނުރައްކާތެރި ކަމެއްކަމަށް އީވާ ވަނީ ވިދާޅުވެފަ އެވެ.
އީވާގެ އިތުރުންވެސް މަޖިލީހުގެ ގިނަ މެމްބަރުން ވަނީ ސަރުކާރުން ދަރަނި އަނބުރާ ދެއްކުމަށް ގެންގުޅޭ އުސޫލަށް ބޮޑެތި ފާޑުކިޔުންތަކެއް އަމާޒުކުރައްވާފަ އެވެ.
އެހެން ނަމަވެސް، މިނިސްޓަރު އަމީރު ވިދާޅުވެފައިވަނީ ދަރަނި ދެއްކުމަށް މިހާރު ސަރުކާރުން އަމަލުކުރަމުންދަނީ އެންމެ ފައިދާބޮޑު ގޮތަށް ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
