ރައީސް ނަޝީދު މަސައްކަތްކުރައްވަނީ ވެރިކަން ހޯދާކަށް ނޫން: ޔާސިރު
އެމްޑީޕީގެ ރައީސް މުހައްމަދު ނަޝީދު މަސައްކަތް ކުރައްވަނީ ވެރިކަން ހޯދުމަށް ނޫންކަމަށާއި، ދިވެހިރާއްޖެ ހިންގުމުގެ ނިޒާމް ހަރުދަނާކުރުމަށްކަމަށް ކުޅުދުއްފުށި އުތުރު ދާއިރާގެ މެންބަރު ޔާސިރު އަބްދުއްލަތީފް ވިދާޅުވެއްޖެއެވެ.
ސަންގު ޓީވީގެ "ޚަބަރަށްފަހު" ޕްރޮގްރާމްގައި، ރައީސް ނަޝީދު ރިޔާސީ އިންތިހާބުގައި ވާދަކުރައްވަން ނުނިކުންނަވަނީ ކީއްވެތޯ ކުރި ސުވާލަށް ޖަވާބު ދެއްވަމުން ޔާސިރު ވިދާޅުވީ، ރައީސް ނަޝިދު ވެރިކަން ހޯދުމަށް މަސައްކަތް ނުކުރާކަމަށާއި، ރައީސް ނަޝީދަކީ ވެރިކަމުގެ ބޭނުމުގައި މަސައްކަތްކުރައްވާ ބޭފުޅެއް ނޫންކަމަށެވެ.
އަޅުގަނޑު ގަބޫލުކުރާގޮތުގައި މިއުޅެނީކީއެއް ހަގީގަތުގައި ދަންނަވާ ކަމުގައި ވާނަމަ ރައީސް ނަޝީދަށް ވެރިކަން ނުލިބިގެނެއް ނޫން އިނގޭތޯ؟ ހަމަ ވަރަށް ފަރމް ކޮށް ދަންނަވަންޏާ. އެހެންނަމަވެސް، ރައީސް ނަޝީދުގެ މަސައްކަތް މިހާ ހިސާބަށް ބަލާއިރުގައި، ފެށުނީއްސުރެ އަޅުގަމޑުމެންނަށް ފެންނާނީ ނިޒާމް ރަނގަޅު ކުރަން އުޅޭތަން. މިހާރުވެސް މި ދައްކާ ވާހަކައަކީ އިޖުތިމާއީ ރައްކާތެރިކަމުގެ ނިޒާމް ރާއްޖޭގައި ގާއިމް ކުރެވިފައި އެބައޮތް. އެހެންނަމަވެސް މި ނިޒާމު އެބަ ރަނގަޅު ވޭތޯ؟"
މެންބަރު ޔާސިރު އަބްދުއްލަތީފް
ޔާސިރު ވިދާޅުވީ ރައީސް ނަޝީދު މިހާރުވެސް އެންމެ ބޮޑަށް ކުރައްވާ މަސައްކަތަކީ އެމްޑީޕީގެ ރައީސް ގެ ހައިސިއްޔަތުން ރާއްޖޭގެ އިޖުތިމާއީ ނިޒާމް ރަނގަޅު ކުރުމުގެ މަސައްކަތް ކަމަށެވެ. އަދި މީގެ އިތުރުން އެމްޑީޕީ އެ އުސޫލު ތަކެއްގައި މައްޗަށް ބިނާވެފައިވާ އުސޫލުތައް މިހާރު ބީވެގެންދާ ކަމަށާ، އެ އުސޫލުތައް ނެގެހެއްޓުމަށްވެސް އެންމެ ބުރަކޮށް މަސައްކަތް ކުރައްވަނީ ރައީސް ނަޝީދު ކަމަށް ޔާސިރު ވިދާޅުވި އެވެ.
ފަހަކަށް އައިސް "ފިކުރެއްގެ ދިރުން" ފެކްޝަނުން މަޖިލީހަށް ގަރާރު ހުށަހަޅާ މައްސަލަ އާއި ގުޅިގެން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ފެކްޝަނުގެ މެންބަރުން ކިޔުއްވަމުންދާ ފާޑުކިޔުއްތަކަށް ރައްދު ދެއްވައި ޔާސިރު ވިދާޅުވީ ވެރިކަމަށް އަންނަނީ މެނިފެސްޓޯއެއް ހިފައިގެން ރައްޔިތުންގެ ހައްގުގައި މަސައްކަތްތަކެއް ކޮށްދެއްވުމަށްކަމަށާއި، އެއާއި އެއްގޮތަށް މަސައްކަތްނުކުރުމުން އެ ވާހަކަދައްކާ ސަރުކާރު ޒިންމާދާރުކުރުމަކީ މަޖިލީހުގެ މެންބަރުންގެ ޒިންމާއެއްކަމަށެވެ.
ޕާޓީގެވެސް އުސޫލުތަކާއި ހިލާފަށް، އަދި ގާނޫނު އަސާސީގެވެސް ރޫހާއި ހިލާފަށް މިއަދު އެ މަސައްކަތްކުރެވެނީ ޖަޒުބާތެއްގައި ޖެހިގެން. އެހެން ނަމަވެސް މަސައްކަތްކުރުމަކީ އެމްޑީޕިގެ މަޖިލީސް މެންބަރުންގެ ޒިންމާއެއް. އެއާއި ޖެހިގެން ގައުމީ މަޖިލީހުގެ މެންބަރުންގެ ޒިންމާއެއް.
މެންބަރު ޔާސިރު އަބްދުއްލަތީފް
ޔާސިރު އިތުރަށް ވިދާޅުވީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާއި، އެމަނިކުފާނަށް ތާއީދުކުރައްވާ މެންބަރުން މަސައްކަތްކުރައްވަނީ އެމްޑީޕީގެ އަސާސްތަކާއި ދިމާ އިދިކޮޅަށްކަމަށާއި، އެމްޑީޕީއިން ވިއްކަމުން އައި އިންސާފާއި ހަމަހަމަކަން މިހާރު ނެތްކަމަށް ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
