ޞާލިހުގެ ވެރިކަން ބަދަލުކަން ދަ ޑިމޮކްރެޓްސްއިން ތާއީދުކުރަންވީ ރައީސް ޔާމިނަށް: ތާރިގު

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވެރިކަން ބަދަލުކުރަން ދަ ޑިމޮކްރެޓްސް އިން ވެސް ތާއީދުކުރަންވީ ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމަށް ކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ވިދާޅުވެއްޖެ އެވެ.

ތާރިގު މިފަދައިން ވިދާޅުވެފައިވަނީ މި ވެރިކަން ބަދަލުކުރުމަށް ގިނަ ސިޔާސީ ޕާޓީތަކެއް ގުޅިގެން "ކޮމަން ކެންޑިޑޭޓެއް" ނެރުމަށް ތާއީދުކުރާކަމަށް ދަ ޑިމޮކްރެޓްސްއިން ބުނުމާއި ގުޅިގެން އުފެދިފައިވާ ބަހުސުގައި ކުރެއްވި ޓްވީޓެއްގަ އެވެ.

ވެރިކަން ބަދަލުކުރުމަށްޓަކައި ކޮމަން ކެންޑިޑޭޓެއް/ އެއް ކެންޑިޑޭޓު ނެރުމަކީ ޔަގީން ފޯމިއުލާއެއްކަމަށް ތާރިގު ވިދާޅުވި އެވެ. އަދި ރައީސް ޔާމިނަކީ ޤައުމަށް އެތަށް ގިނަ ގުނަ ޚިދުމަތްތަކެއް ކޮށްދެއްވާފައިވާ ލީޑަރެއްކަމަށް އެންމެން އިއްތިފާގުވާއިރު، ދަ ޑިމޮކްރެޓްސް ރައީސް ޔާމިނަށް ތާއީދުކޮށް ޕީޕީއެމް ފަހަތަށް އަރައިފިނަމަ ރިޔާސީ އިންތިޚާބުން ރައީސް ޞާލިހު ބަލިކުރެވޭނެކަމަށް ތާރިގު ވިދާޅުވި އެވެ.

"އެއް ކެނޑިޑޭޓް ފޯމިލާ އެބައޮތެވެ. އެއީ އެއްބުރުން އިބޫ ނޫންގޮތެއް ހޯދުމުގެ ފޯމިއުލާއެވެ. ޔަޤީންކަމާއެކު ވެރިކަން ބަދަލުކުރާނެ ގޮތެވެ. އެންމެން އިއްތިފާޤުވާ ޚިދުމަތްތެރި ލީޑަރު، ރައީސް ޔާމިނަށް ޑިމޮކްރެޓްސް ތާއިދުކޮށް، ދިވެހީންގެ ރާއްޖެ، ދިވެހިންނަށް ހޯދުމެވެ"

މެމްބަރު އަހުމަދު ތާރިގު

ތާރިގު މިފަދައިން ވިދާޅުވެފައިވާއިރު، ޕީޕީއެމުން ވެސް ވަނީ އެ ޕާޓީގެ ރިޔާސީ ކެންޑިޑޭޓަކީ ރައީސް ޔާމިނު ކަމަށާއި، ކޮމަން ކެންޑިޑޭޓަކާއި ދޭތެރޭ އެ ޕާޓީން ނުވިސްނާ ކަމަށް ބުނެފައެވެ.

ކުރިއަށް އޮތް ރިޔާސީ އިންތިޚާބުގައި ގައުމާއި ރައްޔިތުންނަށް އެންމެ ފައިދާބޮޑު ގޮތަކީ ރައީސް ޔާމިނަށް ތާއީދުކޮށް ޕީޕީއެމް ފަހަތަށް އެރުން ކަމަށާއި، ޕީޕީއެމާއި ގުޅިގެން މަސައްކަތް ކުރުމަށް ދައުވަތުދޭކަމަށް ޕާޓީގެ ލީޑަޝިޕުން ވެސް ވަނީ ވިދާޅުވެފަ އެވެ.