202 މީހަކަށް ޕްރޮފެޝަނަލް އެކައުންޓެންޓްސް ޓްރެއިނިންގ ސްކޮލަރޝިޕް ދީފި

ޕްރޮފެޝަނަލް އެކައުންޓެންޓްސް ތަމްރީން ކުރުމަށްޓަކައި 202 ފަރާތަކަށް ސަރުކާރުން މިއަދު ސްކޮލަރޝިޕްދީފިއެވެ.

އެކަން މިހާރުވަނީ ހަޔަރ އެޑިޔުކެޝަން މިނިސްޓްރީގެ ވެބްސައިޓްގައި އިއުލާނުކޮށްފައެވެ.

މި ސްކޮލަރޝިޕް ސްކީމްގެ ދަށުން ހުޅުވާލި 200 ފުރުސަތަށް 322 ފަރާތަކުން ހުށައަޅައިފައިވާކަމަށް އެމިނިސްޓްރީ އިން ވަނީ ބުނެފައެވެ. އަދި އޭގެ ތެރެއިން ޕަބްލިކް ކެޓެގަރީ ކެންޑިޑޭޓުން ކޮލިފައިވެ އޯޕަން ކެޓަގަރީއަށް 152 ކެންޑިޑޭޓުންވަނީ ކޮލިފައިވެފައި ކަމަށް ވެސް އެމިނިސްޓްރީ އިން ވަނީ ބުނެފައެވެ.

އެމިނިސްޓްރީ އިން ބުނެފައިވަނީ މި ނަތީޖާ އާއި ގުޅޭ ޝަކުވާ ހުށަހެޅުމަށް ބޭނުންވާ ފަރާތްތަކުން

11 ޖުލައި 2023 ވާ އަންގާރަ ދުވަހުގެ 12:00  ގެ  ކުރިން ހުށަހަޅަންވާނެއ ކަމަށާއި އަދި ޝަކުވާ ހުށަހެޅުމަށް ލިބޭ މުއްދަތުގައި އެޕްލިކޭޝަނަށް އެއްވެސް އުނި އިތުރެއް ނުގެނެވޭނެ ކަމަށް އެމިނިސްޓްރީ އިން ބުނެފައިވއެވެ. ޝަކުވާ ހުށައަޅާނީ [email protected] އަށެވެ.

މިއީ  މި ދާއިރާއިން ސްކޮލަރޝިޕް ދިނުމަށް ހުޅުވާލި ދެވަނަ ފަހަރު ކަމަށާއި މިދިޔަ އަހަރު މި ސްކޮލަރޝިޕް ވަނީ 173 ފަރާތަކަށް ދެވި މީގެން ގިނަ ދަރިވަރުން ވަނީ މިހާރު ކިޔަވަން ފަށާފައި ކަމަށް އެމިނިސްޓްރީ އިން ބުނެފައިވެއެވެ.

މި ސްކޮލަރޝިޕްތަކަކީ ދިވެހިންނަށް އަމާޒުކޮށް އިޢުލާނުކުރި ސްކޮލަރޝިޕްތަކެއް ކަމަށާއި މި ސްކޮލަރޝިޕްގެ މައިގަނޑު މަޤްޞަދަކީ އެކައުންޓިންގް ދާއިރާއިން ވަޒީފާގެ ބާޒާރުގައި ދިވެހިން ތަމްރީންވުމަށް މަގު ފަހިކޮށްދިނުން ކަމަށް އެމިނިސްޓްރީ އިން ބުނެފައިވެއެވެ.

މީގެ އިތުރުން އެކައުންޓިންގެ ދާއިރާއަކީ ވަރަށް ރަނގަޅު އާމްދަނީއެއް ލިބޭ ވަޒީފާތަކެއް ލިބެންހުރި ދާއިރާއެއް ކަމަށާއި އަދި މިއީ ތަމްރީނުވެފައިވާ ފަރާތްތަކުން އަމިއްލަގޮތުން މަސައްކަތްކޮށްގެންވެސް ރަނގަޅު އާމްދަނީއެއް ހޯދިދާނެ ދާއިރާއެއް ކަމަށް އެމިނިސްޓްރީ އިން ބުނެއެވެ.

ރާއްޖޭގައި ދިރިއުޅޭފަރާތަކަށް މި ސްކޮލަރޝިޕްގެ އެހީގައި އޭސީސީއޭ އަދި ސީމާ ޕްރޮގްރާމް ފުރިހަމަކޮށްގެން ރަނގަޅު އާމްދަނީއެއް ލިބޭނެމަގު ފަހިކުރެވިގެންދާނެ ކަމަށް ޤަބޫލުކުރާ ކަމަށާއި އަދި މި ދާއިރާއިން ތަމްރީން ލިބިފައިވާ ފަންނީ ދިވެހީން އުފެދި ، ވަޒީފާގެ ބާޒާރަށް ނުކުތުމުން މި ދާއިރާގައި މިހާރު ބަރޯސާވާ ބޭރުގެ މަސައްކަތްތެރިންނަށް ބަރޯސާވާ މިންވަރު ކުޑަކުރެވޭނެ ކަމަށް ހަޔަރ އެޑިޔުކޭޝަނުން ބުނެފައިވެއެވެ.

މި ސްކޮލަރޝިޕްތަކަށް ހޮވޭ ފަރާތްތަކުން ޕްރޮގްރާމް ފުރިހަމަކޮށް ޕްރޮފެޝަނަލް ޗާރޓަރޑް އެކައުންޓެންޓަކަށް ވުމަށްޓަކާ ދޭން ޖެހޭ ރަޖިސްޓްރީކުރުމުގެ ފީ ނުވަތަ ރީރަޖިސްޓްރޭޝަން ފީ،  އެނުއަލް ސަބްސްކްރިޕްޝަން ފީ، އެގްޒެމްޝަން ލިބޭ ފަރާތްތަކަށް އެގްޒެމްޝަން ފީ، އެގްޒާމް ފީ، އެފްލިއޭޝަން ފީ،

މެމްބަރޝިޕް ފީ(2 އަހަރު ދުވަހުގެ ތެރޭގައި ދަރިވަރު ނިމޭކަމުގައިވާނަމަ)، ބުކް އެލަވަންސް، ރާއްޖޭގައި ރަޖިސްޓްރީކޮށްގެން ހިންގާ ކޮލެޖް ނުވަތަ ޔުނިވަރސިޓީތަކުން ކިޔަވާނަމަ ޓިއުޝަން ފީ އަދި އަމިއްލައަށް ކިޔަވާ ފަރާތްތަކަށް ޓިއުޝަން ފީ ނުހިމަނައި މަތީގައި ބަޔާންކޮށްފައިވާ ހުރިހާ ޚަރަދު ދިނުމަށް ހަމަޖެހިފައިވާ ކަމަށް ހަޔަރ އެޑިޔުކޭޝަނުން ވަނީ ބުނެފައެވެ.

މި ސްކޮލަރޝިޕަށް ހޮވުނު ފަރާތްތައް 2 އަހަރުގެ މުއްދަތަކަށް ރާއްޖޭގައި ޚިދުމަތް ކުރުމަށް ޝަރުތުކުރެވޭނެ ކަމަށާއި،، އަދި މި ސްކޮލަރޝިޕަށް ހޮވުނު ފަރާތްތައް ބައިވެރިވާ ޕްރޮގްރާމް ފުރިހަމަކުރުމަށް  ސްކޮލަރޝިޕް އެވޯރޑް ކުރެވޭ ތާރީހުން ފެށިގެން ދެވޭނީ ގިނަވެގެން 2 އަހަރު ދުވަހުގެ މުއްދަތުކަމަށް ވެސް އެމިނިސްޓްރީ އިން ވަނީ ބުނެފައެވެ.