ރިޔާސީ އިންތިޚާބަށް ޕީޕީއެމްގެ ސްލޯގަން "ދިވެހިންގެ ރާއްޖެ" އިފްތިތާހުކޮށްފި

ކުރިއަށް އޮތް ރިޔާސީ އިންތިޚާބަށް ޕީޕީއެމުން ރަސްމީކޮށް ބޭނުންކުރާ ސްލޯގަން "ދިވެހިންގެ ރާއްޖެ" އިފްތިތާހުކޮށްފި އެވެ.

ޕީޕިއެމުން ބުނީ އެ ޝިޔާރުން ދޭހަކޮށްދެނީ ދިވެހިންގެ އެއްބައިވަންތަ ކަމާއި ގައުމުގެ އިސްތިގްލާލާއި މިނިވަންކަން ކަމަށެވެ.

ރައީސް ޔާމީންގެ ރިޔާސީ ކެމްޕެއިންގައި، ކެންޑިޑޭޓް ބްރޭންޑިން އަށް ބޭނުން ކުރާނީ "ސްޓްރައިޕްޑް ވައި" މާކެކެވެ.

ޕީޕީއެމުން ބުނީ އެ ސިމްބޮލް އިން ރަމްޒުކޮށްދެނީ އެއްބައިވަންތަ ކަމާއި، އުންމީދާއި، ވަރުގަދަކަން ކަމަށެވެ. އަދި ޖުޑިޝަރީގެ ބާރާއި، ގުޅިފައިވާ ޕީއެންސީ ކޯލިޝަން ވެސް އެ ލޯގޯ އިން ރަމްޒުކޮށްދޭކަމަށް ޕީޕީއެމުން ވަނީ ބުނެފައެވެ.

ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމުގެ ރިޔާސީ ކެންޕޭނު ފަށާ މާލޭގައި ދޮރުން ދޮރަށް ކުރިއަށްގެންދާ ކްމެޕޭނު ހަރަކާތްތައް އެ ޕާޓީން ފަށާފައިވާއިރު، އަތޮޅުތެރޭގައި ރަސްމީކޮށް ކެމްޕޭނު ހަރަކާތްތައް މިއަދު ފެށިގެން ގޮސްފައިވާކަމަށް ޕީޕީއެމުން ވަނީ ބުނެފައެވެ.

ޕީޕީއެމް، ޕީއެންސީ ކޯލިޝަނުން މިއަދު ބޭއްވި ނޫސްވެރިންގެ ބައްދަލުވުމުގައި ޕީއެންސީގެ ރައީށް އަބްދުއްރަހީމް އަބްދުﷲ (އަދުރޭ) ވިދާޅުވީ މިއަދު ރަށްރަށުގައި ރައީސް ޔާމީންގެ ކެމްޕެއިން ފަށާނެ ކަމަށެވެ.

އެގޮތުން ކެމްޕޭނު ޓީމުގެ ހަރަކާތްތައް ހއ، ހދ އަދި ށ އަތޮޅުގައި މިއަދު ފެށިގެން ގޮސްފައިވާކަމަށް ޕީޕީއެމުން ވަނީ ބުނެފައެވެ. އަދި އެހެން އަތޮޅުތަކުގައި ވެސް ކެމްޕޭނު ހަރަކާތްތައް ވަރަށް ފުޅާކޮށް ކުރިއަށް ގެންދިއުމަށް ނިންމާފައިވާކަމަށް ވެސް އިދިކޮޅުން ވަނީ ބުނެފައެވެ.

ޕީޕީއެމުން އެ ޕާޓީގެ ރިޔާސީ ކެންޑިޑޭޓު ރައީސް ޔާމިނުގެ ކެމްޕޭނު ރަސްމީކޮށް ފަށައިގެން ކުރިއަށް ގެންދާއިރު، އެމަނިކުފާނަށް އަމަލީގޮތުން ކެމްޕޭނުގައި ބައިވެރިވުމުގެ ފުރުސަތު ލިބިވަޑައި ނުގަތުމަކީ ވަރަށް ބޮޑު ފަޅުކަމެއްގެ ގޮތުގައި އެމަނިކުފާނުގެ ކެމްޕޭނު މެނޭޖަރު ކެޕްޓަން މުޙައްމަދު އަމީނު ވަނީ ސުފަކުރައްވާފަ އެވެ.

މިވަގުތު އެމަނިކުފާނުގެ މައްޗަށް ކޮށްފައިވާ ޖަލު ހުކުމެއް ތަންފީޒުކުރައްވަމުން ގެންދެވި ނަމަވެސް، ހައިކޯޓު މަރުހަލާއިން ރައީސް ޔާމީން މިނިވަންވެވަޑައިގަންނަވާނެ ކަމުގެ ފުރިހަމަ ޔަގީންކަން އޮތްކަމަށް ކެޕްޓަން އަމީނު ވަނީ ވިދާޅުވެފަ އެވެ.

އަދި ރައީސް ޔާމީން މިނިވަންވެ ވަޑައިގެތް ކެމްޕޭނު ހަރަކާތްތަކާއި ގުޅިވަޑައިގަންނަވަން ދެން މަޑުނުކުރައްވާ އަތޮޅުތެރޭގައި ވެސް ކެމްޕޭނު ހަރަކާތްތައް ދުރާލާ ފަށައިގެން ކުރިއަށް ގެންދެވުމަށް ރައީސް ޔާމީނުގެ ކެމްޕޭނު މެނޭޖަރު ވަނީ އެދިވަޑައިގެންފަ އެވެ.