މަރުތަކަށް އިންސާފު ހޯދަން ވެރިކަމަށް ގެންނަންވީ ގާސިމް: ޢަލީ ހުސައިން

ރާއްޖޭގައި އެއްވެސް ހައްގަކާއި ނުލައި މަރާލާފައިވާ މީހުންނާއި ގެއްލުވާލާފައިވާ މީހުންނަށް އިންސާފު ހޯދައިދެވޭނެ ހަމައެކަނި ކެންޑިޑޭޓަކީ ޖުމްހޫރީޕާޓީގެ ލީޑަރ އަދި ރިޔާސީ ކެންޑިޑޭޓް ގާސިމް އިބްރާހިމް ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަދި ޖުމްހޫރީ ޕާޓީގެ ޕާލިމެންޓަރީ ގުރޫޕުގެ ޑެޕިއުޓީ ލީޑަރު އަލީ ހުސެއިން ވިދާޅުވެއްޖެއެވެ.

ތިނަދޫ ސިޓީގައި ރޭ ބޭއްވި ކެމްޕެއިން ޖަލްސާގައި ވާހަކަ ދައްކަވަމުން ޢަލީ ވިދާޅުވީ ރާއްޖޭގެ އުތުރާއި ދެކުނާއި އުތުރު އިންޑިއާ ސިފައިންގެ ބާރުގެ ދަށަށް ގެނެސްފައިވާ ކަމަށެވެ. އެހެންކަމަށް ވާއިރު، މިފަހަރުގެ އިންތިހާބުގައި ރައްޔިތުން ލާ ވޯޓަކީ މިނިވަންކަމަށްޓަަކައި ލާ ވޯޓެއްކަމަށްވެސް ޢަލީ ވިދާޅުވި އެވެ.

‏"މިއީ މިނިވަންކަމާއި އެކީގައި މިކަލަހަ ޕޯޑިއަމްއެއްގައި މިކަހަލަ ޖަލްސާއެއް ބޭއްވޭނެ އެންމެ ފަހު އިންތިހާބަށް ވެގެން ހިނގައިދާނެ ތިބޭފުޅުން ވޯޓުލާ ގޮތަކުން. އަޅުގަނޑުމެންނަށް މިވާހަކަތައް މިނިވަންކަމާއެކު މިގޮތަށް ދެއްކޭނެ އެންމެ ފަހު ފަހަރަށް މި އިންތިހާބު ވެގެން ހިނގައިދާނެ ތިބޭފުޅުން ވޯޓުލާ ގޮތަކުން. އެެހެންނަމަވެސް، އެގޮތް ނުވެ، ތިޔަބޭފުޅުން ތާރީހުގައި ރަން އަކުރުން ތިމަންނައަކީ މިގައުމުގެ މިނިވަންކަމަށްޓަކައި ވޯޓުލީ މީހެކޭ ބުނަން ބޭނުންނަަމަ ތިބޭފުޅުން ވޯޓުލައްވާ ކެންޑިޑޭޓް ނަމްބަރު ފަހަކަށް"

ޢަލީ ހުސެއިން

ޢަލީ އިތުރަށް ވިދާޅުވީ ވޭތުވެދިޔަ ސަރުކާރު ތަކުން، އަދި މި ސަރުކާރުން ވެސް ވެރިކަމަށް އައީ ރާއްޖޭގައި މަރާލާފައިވާ މީހުންނާއި ގެއްލުވާލާފައިވާ މީހުންނަށް އިންސާފު ހޯދައިދޭނެ ކަމަށް ބުނަމުން ކަމަށެވެ. އެހެން ނަމަވެސް، އަދި އެއްވެސް ސަރުކާރަކަށް އެކަން ނުކުރެވޭކަން ފާހަގަކުރައްވައި ޢަލީ ވަނީ އެކަން ވާނީ ގާސިމް އަށް ކަމަށް ވިދާޅުވެފައެވެ.

"އަފްރާޝީމްގެ މަރަށް އިންސާފު ލިބިއްޖެތޯ؟. ކޮބާތޯ 2008 ގައި ދެއްކި އީވާން ނަސީމްގެ މަރުގެ ވާހަކަ. އިންސާފު ލިބުނުތޯ؟. ކޮބާތޯ ސަލާހުގެ މަރު. އިންސާފު ލިބުނުތޯ؟. ކޮބާތޯ ރިޟްވާން. ކޮބާތޯ ޔާމީން. ބަދަލު ކުރަންވީ. ބަދަލަކީ ގާސިމް". ޢަލީ ހުސައިން ވިދާޅުވި އެވެ.

އެހެންކަމުން ކުރިއަށް އޮތް ރިޔާސީ އިންތިހާބުގައި ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމަށް ވޯޓު ދެއްވުމަށް ޢަލީ ވަނީ އެދިވަޑައިގެންފަ އެވެ.