ވީއައިއޭ އާއި ގުޅިގެން ރައީސް ޞާލިހު ދެއްކެވި ވާހަކަފުޅަށް އަބްދުއްރަހީމް ފާޑުވިދާޅުވެއްޖެ!
ވެލާނާ އިންޓަނޭޝަނަލް އެއާޕޯޓު ތަރައްގީ ކުރުމުގެ މަސައްކަތް ފެށީ މީގެ 12 އަހަރު ކުރިން ކަމަށް ރައީސް އިބްރާހީމް މުހައްމަދު ޞާލިހު ވިދާޅުވުމުން ޕީއެންސީގެ ރައީސް އަބްދުއްރަހީމް ފާޑުވިދާޅުވެއްޖެއެވެ.
މިދިޔަ އާދިއްތަ ދުވަހުގެ ރޭ ބޭއްވި ޓޫރިޒަމް އެވޯޑް ހަފުލާގައި ވާހަކަ ދައްކަވަމުން، މީގެ 12 ވަރަކަށް އަހަރު ކުރިން މަސައްކަތް ފެށި، ވެލާނާ އިންޓަނޭޝަނަލް އެއާޕޯޓުގެ ތަރައްގީ މިހާރު އެ އަންނަނީ ލޯމައްޗަށް ފާޅުވަމުން ކަމަށް ވަނީ ވިދާޅުވެފައެވެ.
އެކަމާ ނުރުހުން ފާޅުކުރައްވައި އަބްދުއްރަހީމް މިއަދު ކުރެއްވި ޓުވީޓެއްގައި ވިދާޅުވީ، ދޮގާއި މަކަރާ އޮޅުވާލުމުގައި ރައީސް ޞާލިހު ފަދަ ހުޝިޔާރު ވެރިޔަކު ދުނިޔޭގެ އެއްވެސްތަނަކުން، އަތްފުނާ އެޅިޔަސް ނުފެންނާނެ ކަމަށެވެ.
"ވީއައިއޭގެ ތަރައްގީ ފެށީ ތިމަންނާ ވިހޭ ދުވަހުއޭ ނުބުނީ ކީއްވެބާ؟އޭރުންވެސް މަވެތިކަމުގެ އަހުލުވެރިން ހަގީގަތް އެނގިތިބެވެސް ހަމަ ހީހީފާ އަތްޖަހާނެތާ!" ރައީސް ޞާލިހަށް ފާޑުވިދާޅުވެ އަބްދުއްރަހީމް ކުރެއްވި ޓުވީޓުގައި ވިދާޅުވެފައިވެއެވެ.
ވީއަައިއޭ ތަރައްގީކުރުމުގެ މަސައްކަތް ފެށީ ކުރީގެ ރައީސް ޔާމީންގެ ސަރުކާރުންނެވެ. ޖުމްލަ 800 މިލިއަން ޑޮލަރު (12.3 ބިލިއަން ރުފިޔާ) ހަރަދުކުރާ ގޮތަށް 2016ގައި ފެށި އެ ބިޔަ މަޝްރޫއަކީ ޔާމީންގެ އިގުތިސޯދީ ތަސައްވުރުގެ ތެރެއިން ފެށި މުހިންމު މަސައްކަތެކެވެ.
ދެ ފިޔަވައްސަކަށް ބަހާލައިގެން ހިންގަން ފެށި އެ މަޝްރޫއުގެ ފުރަތަމަ ފިޔަވަހީގެ ދަށުން އާ ރަންވޭ އަކާއި އާ ފިއުލް ފާމެއް އަދި އާ ކާގޯ ކޮމްޕްލެކްސެއް ހަދަން ނިންމެވިއެވެ. އަދި 2017 ވަނަ އަހަރުގައި އައު ރަންވޭގެ އަމަލީ މަސައްކަތް ފެށިއިރު އެ މަސައްކަތް ފެށިތާ ދޮޅު އަހަރަކަށް ވުރެ ގިނަ ދުވަސް ފަހުން 19 ސެޕްޓެމްބަރު 2018ގައި އާ ރަންވޭގައި ފުރަތަމަ ބޯޓު ޖެއްސި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
