ވެރިކަން ލިބިއްޖެނަމަ ފުރަތަމަ 3 އަހަރު ތެރޭގައި އައްޑޫގައި 5000 ވަޒީފާ އުފައްދާނަން: ރައީސް ޔާމީން
2023 ވަނަ އަހަރުގެ ރިޔާސީ އިންތިޚާބު ކާމިޔާބުވެއްޖެނަމަ ވެރިކަމަށް ވަޑައިގަންނަވާތާ ފުރަތަމަ 3 އަހަރު ދުވަހުގެ ތެރޭގައި އައްޑޫ ސިޓީގައި 5000 ވަޒީފާ އުފައްދަވާ ދެއްވާނެކަމަށް ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވެފައިވަނީ އައްޑޫ ސިޓީގެ ފޭދޫގައި އޮތް ޚާއްސަ ޖަލްސާއެއްގައި ވާހަކަ ދައްކަވަމުންނެވެ.
އެ ޖަލްސާގައި ވާހަކަދައްކަވަމުން ރައީސް ޔާމީން ވިދާޅުވީ އެމަނިކުފާނަށް ދެވަނަ ދައުރެއް ލިބިއްޖެނަމަ އެންމެ އިސްކަމެއް ދެއްވާނީ ޒުވާނުންގެ ހާލަތު ބަދަލުކުރެއްވުމަށް ކަމަށެވެ.
ޒުވާނުންގެ ހާލަތު ބަަދަލުކުރުމަށް އެންމެ މުހިންމީ ރަނގަޅު ވަޒީފާތަކެއް އުފެއްދުންކަމަށާއި، އެމަނިކުފާނަށް ދެވަނަ ދައުރެއް ލިބިއްޖެނަމަ އައްޑޫ ސިޓީއަށް ޚާއްސަ 5000 ވަޒީފާ އުފައްދަވާނެކަމުގެ ޔަގީންކަން ރައީސް ޔާމީން ވަނީ ދެއްވާފައެވެ.
"ހަމައެކަނި މި ސިޓީއަށް އިރާދަކުރެއްވިއްޔާ އަޅުގަނޑުމެންގެ ވެރިކަމުގެ ފުރަތަމަ 3 އަހަރު ދުވަހުގެ ތެރޭގައި 5000 ވަޒީފާ އުފައްދާނަން"
ޕީޕިއެމްގެ ރިޔާސީ ކެންޑިޑޭޓް ރައީސް ޔާމީން
ރިޔާސީ އިންތިޚާބަށް ޕީޕީއެމުން ތައްޔާރީތައް ފަށާފައިވާއިރު، އެ އިންތިޚާބަށް ޕީޕީއެމުން އެކުލަވާލާ މެނިފެސްޓޯގައިވެސް ޒުވާނުންނަށް ޚާއްސަ އިސްކަމެއް ދީފައިވާކަމަށް އެ ޕާޓީއިން ވަނީ ބުނެފައެވެ.
އެގޮތުން އެ މެނިފެސްޓޯގެ ފުރަތަމަ ޗެޕްޓަރު ޚާއްސަކޮށްފައިވާ ޒުވާނުންނަށް ބޭނުންވާ ކަންތައްތައް ފުއްދާދިނުމަށްކަމަށް ރައީސް ޔާމީންވެސް ވަނީ އެކި ޖަލްސާތަކުގައި ވާހަކަދައްކަަވަމުން ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
