ބީއެމްއެލްއިން ސަފާރީ އުޅަނދުތަކަށް ޚާއްޞަ ލޯނު ސްކީމެއް ތައާރަފުކޮށްފި

ސަފާރީ އުޅަނދުފަހަރު ގަތުމާއި ބެލެހެއްޓުމަށް ޚާއްޞަ "ލިވްއެބޯޑް ފައިނޭންސް"ގެ ނަމުގައި ރާއްޖޭގައި އުޅަނދަށް ދޫކުރާ އެންމެ ކުޑަ އިންޓަރެސްޓް ރޭޓާ އެކު ޤައުމީ ބޭންކުން މިއަދު އައު ފައިނޭންސިން ފެސިލިޓީއެއް ތައާރަފުކޮށްފިއެވެ.

ބޭންކް އޮފް މޯލްޑިވްސް އިން ތައާރަފްކުރި މި ލޯނު ސްކީމުގެ ދަށުން އައު ސަފާރީއެއް ގަތުމާއި ބަނުމާއި އިންޖީނު އެޅުމާއި މަރާމާތުކުރުމުގެ އިތުރުން ބޭނުންވާ ސާމާނާއި ވަސީލަތްތައް ހޯދުމަށް ފައިސާ ލިބޭނެއެވެ. އެ ފެސިލިޓީގެ އިންޓަރެސްޓް ރޭޓަކީ އަހަރަކު 9.5 އިންސައްތައެވެ. ރަހުނުގެ ގޮތުގައި ބަހައްޓަން ޖެހެނީ ހަމައެކަނި ފައިނޭންސްކުރާ އުޅަނދު ކަމުގައިވާ އިރު، އެ ނޫން އިތުރު ރަހުނެއް ބޭނުމެއް ނުވާނެއެވެ.

ފައިސާ އަނބުރައި ދެއްކުމަށް ހަތް އަހަރުގެ ދިގު މުހުލަތެއް ލިބޭ މި ލޯނުގެ ފައިސާ ދައްކަން ޖެހެނީ ޑޮލަރުންނެވެ. ފާހަގަކޮށްލެވޭ ކަމަކީ ވަކި ތާވަލެއް ކަނޑައެޅުމުގެ ބަދަލުގައި ފަތުރުވެރިކަމުގެ ޕީކް ސީޒަނާއި އޮފް-ޕީކް ސީޒަނަށް ރިޢާޔަތްކޮށް ފައިސާ ދެއްކޭ ގޮތް ހަމަޖައްސައިފައިވާ ކަމެވެ. އެހެންކަމުން އުޅަނދު ދުއްވައިގެން ލިބޭ އާމްދަނީއާ އެކީ ފައިސާ ދެއްކުމުގެ ލުޔެއް އޮޕަރޭޓަރުންނަށް ލިބޭނެއެވެ.

ބީއެމްއެލްގެ ސީއީއޯ އަދި މެނޭޖިން ޑައިރެކްޓަރު މުޙައްމަދު ޝަރީފް ވިދާޅުވީ ލިވްއެބޯޑް އުޅަނދުތަކަކީ ދިވެހިރާއްޖޭގެ ފަތުރުވެރިކަމުގެ ސިނާއަތުގައި ފާހަގަކޮށްލެވޭ އެންމެ މުހިންމު އެއް ދާއިރާ ކަމަށާއި، މި ދާއިރާގައި ހަރަކާތްތެރިވާ ފަރާތްތަކަށް ބޭނުންވަނީ އެ ވިޔަފާރި ހިނގަމުން އަންނަ ގޮތް ރަނގަޅަށް ދަންނަ މާލީ އެހީތެރިއެއްކަމަށެވެ.

"ލިވްއެބޯޑް ފައިނޭންސްގެ ނަމުގައި އަޅުގަނޑުމެން މި ތައާރަފުކުރި މާލީ ޚިދުމަތަކީ މި ސިނާއަތަށް އާމްދަނީ ލިބޭ ގޮތާއި ޚަރަދުތައް ހިނގާ ގޮތަށް ބަލައި ހާއްސަކޮށް ފަރުމާކޮށްފައިވާ ޚިދުމަތެއް. މީގެ ސަބަބުން އޮޕަރޭޓަރުންނަށް އެ ބޭފުޅުންގެ ވިޔަފާރި ކުރިއެރުވުމަށް އިންވެސްޓްކުރުމުގެ ފުރުސަތާއި އިތުބާރު ލިބިގެންދާނެ. މިއީ ދިވެހި އިޤްތިޞާދުގެ މުހިންމު ދާއިރާތަކަށް އެހީތެރިކަން ފޯރުކޮށްދިނުމަށް އަޅުގަނޑުމެން ކުރަމުންދާ މަސައްކަތުގެ ދަށުން ކުރެވޭ މަސައްކަތެއް"

ޝަރީފް ވިދާޅުވިއެވެ.

ބީއެމްއެލްއަކީ ރާއްޖޭގެ ރިސޯޓުތަކާއި ގެސްޓްހައުސްތައް ހިމެނޭ ގޮތަށް ފަތުރުވެރިކަމުގެ ދާއިރާގައި ޙަރަކާތްތެރިވާ ފަރާތްތަކަށް ޒަމާނުއްސުރެ މާލީ އެހީތެރިކަން ފޯރުކޮށްދެމުން އަންނަ ބޭންކެކެވެ.