ތިން ވުޒާރާގައި އަލިފާނުގެ ހާދިސާ ހިނގި ސަބަބު އިހްސާން ހާމަކުރައްވައިފި
ސަރުކާރުގެ މުހިންމު ތިން ވުޒާރާއެއް ހިންގަމުންދާ އިމާރާތުގައި އަލިފާނުގެ ހާދިސާއެއް ހިނގައި، އިމާރާތް ބޭނުން ނުކިރެވޭ ވަރަށް އަނދައިގެން ދިޔަ ހާދިސާ ހިނގި ސަބަބު ދާޚިލީ ވަޒީރު ޢަލީ އިހްސާން ސާފުކޮށްދެއްވައިފިއެވެ.
2024 ވަނަ އަހަރުގެ ޑިސެންބަރުމަހުގައި އޭރުގެ ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާ ހިންގާ އިމާރާތުގައި ހިނގި އަލިފާނުގެ ހާދިސާގައި އެ ވުޒާރާއާއި އެ އިމާރާތުގައި ހިންގަމުން އަންނަ އިމާރާތްކުރުމާއި ބިނާރާބެހޭ ވުޒާރާ ވަނީ ބޭނުންނުކުރެވޭ ވަރަށް އަނދާފައެވެ.
އަދި އެ އިމާރާތާއި އިންވެގެން ހުންނަ ގްރީން ބިލްޑިންގައި ހިންގަމުން އަންނަ މޫސުމީ ބަދަލުތަކާއި ތިމާވެއްޓާއި ހަކަތައާބެހޭ ވުޒާރާއަށްވެސް ވަނީ އަލިފާނުގެ އަސަރުކޮށްފައެވެ.
މަޖިލީހުގެ މިއަދުގެ ޖަލްސާގައި މެމްބަރަކު ކުރެއްވި ސުވާލަށް ޖަވާބު ދެއްވަމުން އިހްސާން ވިދާޅުވީ، އެ ހާދިސާ ހިނގި ގޮތުގެ ތަހުގީގު ދިވެހި ފުލުހުންނާއި ކައިރި ގައުމުތަކުގެ ތަހުގީގީ އިދާރާތަކާ ގުޅިގެން ތަހުގީގުކޮށް ނިމިފައުވާ ކަމަށެވެ.
އަދި އެ ހާދިސާ ހިނގީ ބަޔަކު ގޮސް އެތަނުގައި ރޯކޮށްލުމުން ނޫންކަންވެސް އޭނާ ފާހަގަކުރެއްވިއެވެ.
މިއީ ބަޔަކު މީހުން ގޮސް އަލިފާން ޖަހާފައިވާ ހާދިސާއެއްގެ ގޮތުގައި ނޫން ތަހުގީގުން އަޅުގަނޑުމެންނަށް ފެންނަނީކީ. ކަރަންޓުގައި ރޯވެފައި، އެންމެ ފުރަތަމަ އިނީޝިއަލް ސްޓޭޖުގައި ފުލުހުން އެ ތަނަށް އެޓެންޑުވެފައި، ފުލުހުންގެ ބޮޑީކެމް ވީޑިއޯ ފުޓޭޖުތަކުން އަޅުގަނޑުމެންނަށް އެބަ ސާބިތުވޭ، އެންމެ ފުރަތަމަ އަލިފާާން ރޯވެފައި ވަނީ ސީލިންގުގެ ތެރޭގައި ހުރި އެއަރ ކޮންޑިޝަނާތަކުގެ ތެރޭގައި ހުރި ވައިރުތަކެއްގައިކަން.
ވަޒީރު ވިދާޅުވީ ހާދިސާގެ ތަފްސީލީ މައުލޫމާތު ދިނުމަށް ނޫސްވެރިންގެ ބައްދަލުވުމެއް ބާއްވާނެ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
