ނަޝީދަށް ވެރިކަން ދިނީމަ އެމްޑީޕީ މަގުމަތިވެ އުޅެން ޖެހުނު ހާލު އަދި ހަނދާނުގައި އެބަހުރި: ރައީސް ޞާލިހް

2008 ގައި އެމްޑީޕީއަށް ލިބުނު ވެރިކަން ނިމި މަގުމަތިވި ގޮތާއި އެފަހުން ވެރިކަން ހޯދަން ކުރަން ޖެހުނު މަސައްކަތްތައް އެމްޑީޕީގެ މެމްބަރުންގެ ހަނދާނުން އަދި ފިލައިގެން ނުދާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.

ރައީސް ޞާލިހް މިފަދައިން ވިދާޅުވެފައިވަނީ ރ މީދޫގައި އޮތް ޖަލްސާއެއްގައި ވާހަކަދައްކަވަމުން ނެވެ.

ރައީސް ޞާލިހްގެ ވާހަކަފުޅު ފައްޓަވަމުން ވިދާޅުވީ ރިޔާސީ ޕްރައިމަރީގައި ވޯޓުދެއްވަންވީ އެމްޑީޕީއަށް ވެރިކަން ހޯދައިދީ، އެ ވެރިކަން ދަމަހައްޓާނެ ލީޑަރަކަށްކަމަށެވެ.

2008 ވަނަ އެމްޑީޕީއަށް ފުރަތަމަ ވެރިކަން ލިބުނު ގޮތާއި، އަދި ވެރިކަން ލިބުނުތާ ތިން އަހަރު ނުވެ އެމްޑީޕީ މަގުމަތިވެގެން ދިޔަ ގޮތާއި، އެފަހުން އެމްޑީޕީގެ މެމްބަރުން މިހާތަނަށް އައިރު ކުރި މަސައްކަތާއި އުފުލި ތަކުލީފުތަކަކީ މިހާރުވެސް ހަނދާނުގައި ހުރި ކަންކަންކަމަށް ރައީސް ޞާލިހް ވިދާޅުވިއެވެ.

"2008 ވަނަ އަހަރު އިންތިޚާބެއް ކާމިޔާބުކޮށް އަދި އިންތިޚާބު ކާމިޔާބުކުރެވުނު ގޮތް ތިޔަ ހުރިހާ ބޭފުޅުންނަށް އެނގިވަޑައިގަންނަވާނެ. އެއަށްފަހު ތިން އަހަރުތެރޭގައި ސަރުކާރު ބަދަލުވެ މަގުމަތިވެގެން އަޅުގަނޑުމެން ދިޔަ ގޮތް މިއަދުވެސް އަޅުގަނޑުމެންގެ ހިތުގައި ހަރުލާ ހުންނާނެ. އަދި ހަނދާނުން ނުދޭ"

ރައީސް ޞާލިހް

އެމަނިކުފާނު ވިދާޅުވީ އެމްޑީޕީއަށް ވެރިކަން ގެއްލުމާއި ހިސާބުން 2018 ވަނަ އަހަރާއި ހަމަޔަށް ރައްޔިތުން އުޅުނު ދަތި ހާލު ހަނދާނުގައި ހުރިކަމަށެވެ. އަދި އެ ދުވަސްތައް ހަނދާނުގައި ބަހައްޓަންވެސް ޖެހޭކަމަށެވެ.

ވެރިކަމަށް އާދެވޭނީ ކޯލިޝަންއެއްގެ ތެރެއިންކަމަށާއި، އަދި ވެރިކަމުގައި ދެމި އޮވެވޭނީވެސް ތަފާތު ފިކުރުގެ ސިޔާސީ ޕާޓީތަކާއެކު ގުޅިގެން މަސައްކަތް ކުރަން ދަންނަ ލީޑަރަކަށްކަމަށް ރައީސް ޞާލިހް ގެންދަވަނީ ވިދާޅުވަމުންނެވެ.

އެމްޑީޕީގެ ފުރަތަމަ ވެރިކަން ރައީސް މުހައްމަދު ނަޝީދަށް ގެއްލުނީ ކޯލިޝަންގެ ތާއީދު އެމަނިކުފާނަށް ގެއްލުމުންކަމަށާއި، އަދި 2013 ވަނަ އަހަރުގެ އިންތިޚާބު ނަޝީދަށް ކާމިޔާބު ނުކުރެވުނީވެސް އެމަނިކުފާނުގެ ފަހަތްޕުޅަށް އަރާނެ ސިޔާސީ ޕާޓީއެއް ނެތުމުންކަމަށް ރައީސް ޞާލިހް ވަނީ މީގެ ކުރިންވެސް ވިދާޅުވެފައެވެ.

އޭގެ އިތުރުން ފަސް އަހަރަށް އިންތިޚާބުވެއްޖެނަމަ ދައުރު ފުރިހަމަކުރައްވާނެ ބޭފުޅަކަށް ވެވަޑައިގަންނަވާނެކަމަށް ރައީސް ޞާލިހް މީގެ ކުރިން އޮތް އެމަނިކުފާނުގެ ކެމްޕޭނު ޖަލްސާގައި ވާހަކަދައްކަވަމުން ވަނީ ވިދާޅުވެފައެވެ.

އެކަންކަން ފާހަގަކުރައްވާ އެމަނިކުފާނު ވަނީ އެމްޑީޕީއަށް ވެރިކަން ހޯދާދެވޭނެ އަދި އެމްޑީޕީގެ ވެރިކަން ދަމަހައްޓާނެ ލީޑަރެއް އިޚްތިޔާރުކުރިން މުހިންމުކަމަށް ވިދާޅުވެފައެވެ.