ޖެނުއަރީ މަހު އާސަންދައިން ކުރި ހަރަދު ބޮޑެވީ ޕްރައިމަރީ އާއި ގުޅިގެންތޯ ބަލަންޖެހޭ: ރައީސް ނަޝީދު

މިދިޔަ އަހަރުގެ ޖެނުއަރީ މަހާ އަޅާބަލާއިރު މިއަހަރުގެ ޖެނުއަރީ މަހު އާސަންދައިން ކުރި ހަރަދު ހަތަރު ގުނަ އަށް އިތުރު ވެފައިވާ ކަމަށާ، އެފަދައިން ބޮޑުވެފައިވަނީ އެމްޑީޕީގެ ރިޔާސީ ޕްރައިމަރީއާއި ގުޅިގެންތޯ މަޖިލީހުން ބަލަންޖެހޭ ކަމަށް މަޖިލީހުގެ ރައީސް އަދި އެމްޑީޕީގެ މުހައްމަދު ނަޝީދު ވިދާޅުވެއްޖެއެވެ.

ނަފްސާނީ ދުޅަ ހެޔޮކަމާއި ގުޅޭ ގޮތުން ތިމަރަފުށީ ދާއިރާގެ މެންބަރު ރިޔާޒު މަޖިލީހަށް ހުށަހެޅުނު ގަރާރަށް  މެންބަރުން ބަހުސްކުރައްވަމުން ދިޔަ ވަގުތު ރައީސް ނަޝީދު ވިދާޅުވީ، ފިނޭންސްއިން ނެރެމުންދާ “ވީކްލީ ފިސްކަލް ޑިވެލޮޕްމެންޓްސްއިން” މިދިޔަ އަހަރުގެ ޖަނަވަރީ މަހުގެ ހަރަދުތަކާއި މި އަހަރުގެ ހަރަދުތަކާއި އަޅާ ބަލާއިރު ބޮޑު ތަފާތެއް ދައްކާކަމަށެވެ.

އެގޮތުން މިދިޔަ އަހަރު ޖަނަވަރީ މަހުގެ ތެރޭގައި އާސަންދައަށް ހަރަދުކޮށްފައިވަނީ 67.9 މިލިއަން ކަމަށެވެ. އެހެންނަމަވެސް މި އަހަރުގެ ޖަނަވަރީ މަހުގެ ތެރޭގައި 283.4 މިލިއަން ރުފިޔާ ހަރަދުކޮށްފައިވާކަމަށެވެ. ވުމާއެކު، އެ ނަތީޖާ ތަކަށް ބަލާއިރު މި ދިޔަ އަހަރާ، މި އަހަރާއި އަޅާ ބަލާއިރު 4 ގުނައިން ބަލި މީހުން އިތުރުވެފައިވާ ކަމަށް ދައްކާ ކަމަށް އެމަނިކުފާނު ވިދާޅުވި އެވެ.

މިދިޔަ އަހަރު ޖަނަވަރީ މަހު (އާސަންދައަށް) 67.9 މިލިއަން ޚަރަދު ކުރެވުނީ. މިއަހަރު ޖަނަވަރީ މަހު 283.4 މިލިއަން ރުފިޔާ އާސަންދަ އަށް ޚަރަދު ކުރެއްވި. އެހެންވީމާ މިދިޔަ އަހަރުގެ ޖަނަވަރީ މަހާއި މި އަހަރުގެ ޖަނަވަރީ މަހާއި އަޅާބަލާއިރު ހަތަރު ގުނައިން ބަލިމީހުން އިތުރުވެގެން ހިނގައްޖެ. ދެން އެއީ އެތެރޭގެ އިންތިޚާބަކާއި ގުޅިގެން އައި ބަދަލެއް ތޯ ނުވަތަ ހަގީގަތުގައި ވެސް ބަލިމީހުން ހަތަރު ގުނައަށް އިތުރުވެގެން ދިޔައީތޯ. މިއީ މި މަޖިލީހުން އަހަން ޖެހޭ ސުވާލެއް"

ރައީސް މުހައްމަދު ނަޝީދު

ރައީސް ނަޝީދު ވިދާޅުވީ، އެކަންކަމާއި ގުޅޭ ގޮތުން މެންބަރުން ވިސްނާވަޑައިގަންނަވާނެކަން އެމަނިކުފާނު ޔަގީން ކުރައްވާކަމަށާއި އަދި ސަރުކާރުން ޝާއިއުކުރާ މައުލޫމާތުތައްވެސް ބައްލަވަމުން ގެންދަވާނެކަން ގަބޫލުކުރައްވާ ކަމަށެވެ.

މިއާއެކު ރައީސް ނަޝީދު ވަނީ އެހާ ބޮޑު ތަނުން އިތުރުވެފައިވުމަކީ އެންމެ މަސް ދުވަހުގެ ތެރޭގައި އިތުރުވެފައިވާ އިތުރުވުމެއްކަމަށްކަން ފާހަގަކުރައްވާފައެވެ.