ވަށަފަރާއި ދެކޮޅަށް މިރޭ ކުޅޭ މެޗަކީ ފައިނަލެއް: ހޯރަފުށީ ކޯޗު

ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތުގެ ހއ. އަތޮޅު ގުރޫޕް ދޭއްގައި މިރޭ ވަށަފަރު ފުޓްސަލް ޓީމާއި ދެކޮޅަށް ކުޅޭ މެޗަކީ ހޯރަފުށީ ޓީމަށް ފައިނަލެއް ކަމުގައި އެޓީމުގެ ކޯޗު ބުނެފިއެވެ. ފުރަތަމަ މެޗުގައި އުތީމާއި ވަާދަކޮށް 2-2 ގެ ނަތީއްޖާއަކުން އެއްވަރުވުމުން މިރޭގެ މެޗުން މޮޅުވަން އެޓީމަށް ވަނީ މަޖުބޫރުވެފައެވެ.

ވޯއިސް އަށް މައުލޫމާތް ދެމުން ހޯރަފުށީ ފުޓްސަލް ޓީމުގެ ކޯޗު އަހުމަދު ސުޖާއު ބުނީ ގުރޫޕްގެ އެއްވަނަ ހޯދަން ބޭނުންނަމަ މިރޭގެ މެޗަކީ އެޓީމަށް މޮޅުވަން މަޖުބޫރު މެޗެއްކަމަށެވެ. ފުރަތަމަ މެޗުގައި އުތިމާއި ދެކޮޅަށް މިޓީމުގެ އަސްލުކުޅުމެއް ނުދެއްކުނު، ކުޅުންތެރިން ތަންކޮޅެއް ޕްރެޝަރުގައި ކުޅުނުތަން ފެނުނީ ވެދާނެ ފުރަތަމަ މެޗުވީމަކަމަށްވެސް ސުޖާއު ބުންޏެވެ.

އިތުރަށް ވާހަކަދައްކަމުން ސުޖާއު ބުނީ މިރޭގެ މެޗުގައި ޓީމުން ބަދަލުތަކެއް ފެންނާނެކަމަށާއި އެޓީމުގައި ތިބި ހުނަރުވެރި ކުޅުންތެރިންގެ ތަފާތު މިރޭ މެޗުގައި ފެނިގެންދާނެކަމަށެވެ. ފުރަތަމަ މެޗުގައިވެސް ކުޅުންތެރިންގެ މަސައްކަތާއިމެދު ވަރަށް ހިތްހަމަޖެހޭ ނަމަވެސް ލީޑު ލިބުމުން ބައެއް ފަހަރަށް ކޮންސެންޓްރޭޝަން އެބަގެއްލޭ... މިގުރޫޕްގައި މިތިބީ ވަރަށް ވަރުގަދަ ޓީމުތަކެއް ކޮންމެ މެޗެއްގައިވެސް ނަތީއްޖާ ނެރެން ބޭނުންނަމަ މެޗު ފެށުނީއްސުރެ ނިމެންދެން ސަތޭކަ ޕަސެންޓް ދޭންޖެހޭނެއެވެ. އަދި ފުރަތަމަ މެޗެކޭ އެއްގޮތަށް މިރޭގެ މެޗުގައިވެސް ސަޕޯޓަރުންގެ ތަރުހީބު ޓީމަށް ވަރަށް މުހިންމެވެ.

ހއ. އަތޮޅު ގުރޫޕް ދޭއްގައި މިރޭ ވަށަފަރު ފުޓްސަލް ޓީމާއި ދެކޮޅަށް ހޯރަފުށި ކުޅޭ މެޗު ފެށުމަށް ހަމަޖެހިފައި ވަނީ 23:00 ގައެވެ. އަދި މި މެޗު ކުޅުމަށް ހަމަޖެހިފައިވަނީ ހުޅުމާލޭ ރެހެންދި ފުޓްސަލް ގުރައުން ދޭއްގައި އެވެ.

މި މުބާރާތުގައި ހޯރަފުށީ ޓީމުގެ މީޑިއާ ޕާޓްނަރަކަށް ވޮއިސް އެމްވީ ހަމަޖައްސާފައިވާއިރު، އެޓީމުގެ ސްޕޮންސަރުންނަކީ ހޯރަފުށީ ކައުންސިލް، ކަލަރ ލޭންޑް މޯލްޑިވްސް، ޕިއްޒާ ކިޗެން އަދި ކައިކު މޮޓޯސް އެވެ.