ހިތްވަރާއެކު އެނބުރި އައިސް، ނައިވާދޫ ފުޓްސަލްގެ ރަސްކަމަށް

ގއ.ދެއްވަދޫ ބަލިކޮށް އެޗް.ޑީ ހިޔުންޑާއި ގޯލްޑަން ފުޓްސަލް ޗެލެންޖް 2026 ގެ ފައިނަލް ހދ.ނައިވާދޫ ހޯދައިފިއެވެ.

މުބާރާތުގެ ޗެމްޕިއަންކަން ނައިވާދޫ ހޯދީ، ފައިނަލުގައި ރޭ ކުޅުނުމެޗް 9-3 ގެ ނަތީޖާއިން ކުރިހޯދައިގެންނެވެ. ވަރަށް ފޯރިގަދަ ކުޅުމެއް ފެނިގެންދިޔަ މިމެޗުގައި އެންމެ ފުރަތަމަ ލަނޑެއް ޖަހައި ކުރީ ހޯދީ ދެއްވަދޫ ޓީމުންނެވެ. އެއީ މެޗު ފެށިތާ 15 ވަރަކަށް ސިކުންތުގެ ތެރޭގައި ޤައުމީޓީމުގެ ރާހިލް ރަޝީދު (ރާއްކޮ) ކާމިޔާބުކޮށްދިން ލަނޑުންނެވެ.

ދެއްވަދޫއިން ލީޑް ނަގާފައިވަނިކޮށް ނައިވާދޫއިން ވަނީ ހިލޭ ޖެހުމަކުން ފޮނުވާލި ބޯޅަ ގޯލްތެރެއަށް ފޮނުވާލައި މެޗު އެއްވަރުކޮށްފައެވެ. މި ލަނޑު ކާމިޔާބުކޮށްދިނީ އަހުމަދު ހަމީދު (އައްމަޑޭ) އެވެ. މެޗުގައި ފުރަތަމަ ފަހަރަށް ނާވައިދޫ ޓީމަށް ލީޑް ނަގައިދިނީ، އަބްދުﷲ ޝާފިއު (ޝާއްޕެ) އެވެ. ފުރަތަމަ ހާފް ނިމުމުގެ ކުރިން ނައިވާދޫގެ ޔާމިން، އައްމަޑޭ ވަނީ އިތުރު ގޯލްތަކެއް ޖަހައި ފުރަތަމަ ހާފް ނިމުމުގެ ކުރިން ލީޑް ފުޅާކޮށްދީފައެވެ.

ފަހްހާފްގެ ކުޅުން ފަށައިގެން ދެއްވަދޫ ޓީމުގެ ރާއްކޮ ގޯލެއް ޖަހައި އުއްމީދު އާކޮށްދިން ނަމަވެސް ދެންވެސް ނައިވާދޫ ޓީމް ފެނުނީ ކުރިއަށްވުރެ ވަރުގަދަކޮށެވެ. ނަތީޖާއަކީ ފަހު ހާފްގައި އެޓީމުން ވަނީ 5 ގޯލް ޖަހާފައެވެ. މި ހާފްގައި ދެއްވަދޫގެ ފަހު ލަނޑު ކާމިޔާބުކޮށްދިނީ ޤައުމީ ފުޓްސަލް ޓީމުގެ ކެޕްޓަން މުހައްމަދު އިމްރާން (އިންމި) އެވެ.

ރޭގެ މެޗުގައި މޮޅު ކުޅުމެއް ދައްކައި ނައިވާދޫ ތަށި ނެގިއިރު، އެޓީމް ވަނީ މިދިޔަ ފަހަރުގެ މުބާރާތުގެ ފައިނަލުގައި ކާށިދޫ އަތުން ބަލިވެފައެވެ. މިފަހަރުގެ މުބާރާތުގައި ނައިވާދޫ ޓީމު ކުޅުނު ހުރިހާ މެޗްތަކަކުންވެސް ފެނިގެން ގޮސްފައިވަނީ މޮޅުވުމުގެ ރޫހެވެ.

ފައިނަލް މެޗް ނިމުމާއެކު ޗެމްޕިއަންޓީމަށް މުބާރާތުގެ ތަށި ހަވާލުކޮށްދެއްވީ ރައީސުލްޖުމްހޫރިއްޔާގެ ނައިބު ޙުސައިން މުހައްމަދު ލަޠީފް އެވެ.