ގައްދޫ ފުޓްސަލް ޓީމުގެ ޓާގެޓަކީ އަތޮޅު ބުރު ކާމިޔާބުކުރުން: މެނޭޖަރ

ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް ކަމަށްވާ ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2023 ގައި ބައިވެރިވެފައިވާ ގދ.ގައްދޫ ފުޓްސަލް ޓީމުގެ މިފަހަރުގެ ޓާގެޓަކީ މުބާރާތުގެ އަތޮޅު ބުރު ކާމިޔާބު ކުރުންކަމަށް އެޓީމުގެ މެނޭޖަރ އިބްރާހިމް ޝާފިއު ބުނެފިއެވެ.

މުބާރާތުގެ ފުރަތަމަ މެޗުގައި ފެބުރުއަރީ 9 ވަނަ ދުވަހު ގދ. ވާދޫ އާއި ދެކޮޅަށް ނުކުތުމަށް ތައްޔާރުވަމުން އަންނަ ގައްދޫ ޓީމުގެ މެނޭޖަރ ވޮއިސް އަށް މައުލޫމާތުދެމުން ބުނީ މި އަހަރުގެ މުބާރާތައް ގައްދޫ ޓީމު ވަރަށް ރަގަޅަށް ތައްޔާރުވެފައިވާ ކަމަށެވެ. އެންމެ ފަހުން ބޭއްވުނު ހަތަރު މުބާރާތުގައިވެސް ގައްދޫ އިން ބައިވެރިވި ނަމަވެސް އެކަށީގެންވާ ވަރަށް ތައްޔާރު ނުވެވޭތީ ނަތީއްޖާތައް އެހާ ރަގަޅެއްނޫނެވެ.

މިފަހަރުގެ ތައްޔާރީތައް ދުރާލާ ފެށިގެން ކުރިއަށްދާއިރު ފެނަކަ އަދި ގައްދޫ ކައުންސިލްގެ ފަރާތުން ޓީމަށް ލިބުނު މާލީ އެހީތެރިކަން ފާހަގަކޮށް ޝާފިއު އެފަރާތްތަކަށް ޝުކުރު އަދާކުރިއެވެ. އަދި މީގެ އިތުރުން ޒީރޯރާ އޮޓޯ ސާވިސް، ކިންގް ސްޕޯޓްސް، ހާމަނީގެ އިތުރުން ޓީމަށް ހެޔޮއެދޭ ފަރާތްތަކުން ވެދެއްވާ އެހީތެރިކަން ފާހަގަކޮށް ޝާފިއު ވަނީ އެފަރާތްތަކަށް ޚާއްސަ ޝުކުރެއް އަދާކޮށްފައެވެ.

އިތުރަށް ވާހަކަދައްކަމުން ޝާފިއު ބުނީ ޓީމަށް މިވަގުތު އެންމެ ބޭނުންވާ އެއްޗަކީ ސަޕޯޓަރުންގެ ތަރުހީބެވެ. ކުޅުންތެރިން ތިބީ އާދަޔާ ޚިލާފު ރޫހެއްގައި، "އަޅުގަނޑުމެން އެދެން ވީހާވެސްގިނަ ސަޕޯޓަރުން މާލެ، ހުޅުމާލެ އަދި ވިލިމާލޭގައި ދިރިއުރޭ ގައްދޫގެ ހުރިހާ ރައްޔިތުންވެސް ފެބުރުއަރީ 9 ވަނަ ދުވަހުގެ ރޭ  ހުޅުމާލޭ ރެހެންދި ފުޓްސަ ދަނޑަށް އައިސް ޓީމަށް ހިތްވަރު ދިނުމަށް އިރާދަކުރެއްވިއްޔާ އަހަރެމެން އެންމެން ގުޅިގެން މިފަހަރު މިކަން ކާމިޔާބުކުރާނަން"

މުބާރާތުގެ ފުރަތަމަ މެޗުގައި ފެބުރުއަރީ 9 ވަނަ ދުވަހު ގައްދޫ ޓީމު ވާދޫއާއި ދެކޮޅަށް ނުކުންނައިރު، ދެވަނަ މެޗުގައި ފެބްރުއަރީ 13 ވަނަ ދުވަހު އެޓީމު ނުކުންނާނީ ތިނަދުއާއި ދެކޮޅަށެވެ. އަދި ގުރޫޕްގެ ތިންވަނަ މެޗުގައި ފެބުރުއަރީ 18 ވަނަ ދުވަހު ހޯނޑެއްދުއާ ދެކޮޅަށް ނުކުންނައިރު ގުރޫޕްގެ ފަހުމެޗުގައި ފެބުރުއަރީ 21 ވަނަ ދުވަހު ގައްދޫ ފުޓްސަލް ޓީމު ނުކުންނާނީ މެޑަވެލީ ފުޓްސަލް ޓީމާއި ދެކޮޅަށެވެ.