ޤާނޫނީ ހައިސިއްޔަތެއް ކޯލިޝަން ސަރުކާރަކަށް ނެތް: ޝަފީގު

ކޯލިޝަން ހަދައިގެން ވެރިކަމަށް އައުމަކީ ޤާނޫނު އަސާސީ ތަންދޭ ކަމެއް ނޫން ކަމަށާއި، ޤާނޫނީ ހައިސިއްޔަތެއް ކޯލިޝަން ސަރުކާރަކަށް ލިބިގެން ނުވާކަމަށް މަޖިލީހުގެ ވެލިދޫ ދާއިރާގެ މެމްބަރު މުހައްމަދު އަބްދުالله ޝަފީގު ވިދާޅުވެއްޖެ އެވެ.

މެމްބަރު ޝަފީގު މިފަދައިން ވިދާޅުވެފައިވަނީ ލޯކަލް ކައުންސިލް އިންތިޚާބުގެ ގާނޫނަށް ހުށައެޅި އިސްލާހަށް މަޖިލީހުގައި ބަހުސް ކުރައްވަމުން ނެވެ.

ޝަފީގު ވިދާޅުވީ ގާނޫނުތަކަށް ގެނެވޭ އިސްލާހުގެ ބޭނުން ހިފޭ މިންވަރު އެނގޭނީ އިސްލާހުތައް ގެނެސް، އިސްލާހުތަކަށް އަމަލުކުރަން ފެށުމުން ކަމަށެވެ. އަވަސް އަވަހާ އިސްލާހުތައް ހުށައަޅައި ބަދަލު ގެންނަސް ޖެހުނަސް އެއީ ކުރަން ޖެހޭ ކަމެއްކަމަށް އޭނާ ވިދާޅުވި އެވެ.

އެއާއެކު ޝަފީގު ވިދާޅުވީ ކުރިއަށް އޮތް ރިޔާސީ އިންތިޚާބަށް ސިޔާސީ ޕާޓީތަކުން ކޯލިޝަން ހެދުމުގެ މަޝްވަރާތައް ފަށާ، ކޯލިޝަނަކާއެކު ވެރިކަމަށް އައުމަށް މިސްރާބު ޖަހާފައިވާއިރު، އެއީ އަދި ޤާނޫނީ ގޮތުން ސަރުކާރެއް އުފެއްދުމަށް ގާނޫނުގައި ކަނޑައަޅާފައިވާ ކަމެއް ނޫން ކަމަށެވެ.

ކޯލިޝަނަކީ ގާނޫނު ދަންނަ އެއްޗަކަށް ނުވި ނަމަވެސް މިހާތަނަށް ފެހި ގާނޫނު އަސާސީގެ ދަށުން އުފެދުނު ކޮންމެ ސަރުކާރެއްވެސް އުފައްދާފައިވަނީ ކޯލިޝަނާއެކުގައިކަން ޝަފީގު ފާހަގަކުރެއްވިއެވެ. އެހެން ނަމަވެސް ޝަފީގު ވިދާޅުވީ ޤާނޫނީ ހައިސިއްޔަތެއް ކޯލިޝަން ސަރުކާރަށް ނުލިބޭ ކަމަށެވެ.

"ކުރިއަށް އޮތީ ރިޔާސީ އިންތިޚާބު. އަޅުގަނޑުމެން ބަދަލުތަކެއް ގެންނަން ޖެހޭނަމަ ގާނޫނު އަސާސީއަށްވެސް ބަދަލުތަކެއް ގެންނަން ޖެހޭނަމަ އެ ބަދަލުތައް ގެންނަން ޖެހޭ. އަޅުގަނޑުމެންގެ ތެރޭގައި މިއަދު އިވެނީ ކޯލިޝަން ހަދާ ވާހަކަ، އެހެން ނަމަވެސް އަޅުގަނޑުމެންގެ ގާނޫނު އަސާސީގައި އެޔަކަށް ނެތް އެއްވެސް ފުރުސަތެއް. އަޅުގަނޑު ދެކޭގޮތުގައި ހަގީގަތުގައި މިއަދަކު ކޯލިޝަން ސަރުކާރަކަށް ގާނޫނީ ހައިސިއްޔަތެއް ނެތް"

ވެލިދޫ ދާއިރާގެ މެމްބަރު މުހައްމަދު އަބްދުالله ޝަފީގު

ޝަފީގު މި މޭރުމުން ވާހަކަފުޅު ދައްކަވާފައިވަނީ ކޯލިޝަނަކީ ގާނޫނުން ތަންދޭ ކަމަކަށް ހެދުމުގެ މުހިންމުކަން ބަޔާން ކުރެއްވުމަށެވެ. އަދި ގިނަ ސިޔާސީ ޕާޓީތަކެއް އެކުލެވޭ ކޯލިޝަން ސަރުކާރަށް ގާނޫނީ ހައިސިއްޔަތު ހޯދުމަށް ގާނޫނު އަސާސީ އިސްލާހު ކުރުމުގެ މަސައްކަތް ކުރުމަކީ މިހާރަށް މުހިންމުކަމެއްކަން މަޖިލީހުގެ ސަމާލުކަމަށް ގެނައުމަށެވެ.

ގާނޫނު އަސާސީއަށް އިސްލާހު ގެނެސް ކޯލިޝަން ސަރުކާރު ހެދޭނެ ގާނޫނީ ހަމަތައް ގާނޫނު އަސާސީގައި ބަޔާންކޮށްފައި އޮތުން މުހިންމުކަމަށް ޝަފީގުގެ ވާހަކައިގައި ވަނީ އަލިއަޅުވާލައްވާފަ އެވެ.