ރައީސް ޞާލިޙުގެ ކެމްޕޭނަށް މިއަދު މާލޭގައި ދޮރުން ދޮރަށް ހިނގަނީ

އެމްޑީޕީގެ ރިޔާސީ ކެންޑިޑޭޓް، ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ ކެމްޕޭނަށް މާލޭގެ މާފަންނު މެދުދާއިރާގެ ގެތަކަށް ދޮރުންދޮރަށް ހިނގަން މިއަދު ފަށާނެ ކަމަށް އެ ޕާޓީން ބުނެފި އެވެ.

މިކަމާއި ގުޅިގެން އެމްޑީޕީން ބުނީ، ރައީސް އިބްރާޙިމް މުޙައްމަދު ޞާލިޙްުގެ ދެވަނަ ދައުރަކަށް އިންތިޚާބުކުރުމަށް މާލޭގައި ދޮރުންދޮރަށް ހިނގުމުގެ ހަރަކާތް މިއަދު ކުރިއަށްދާނެކަމަށާއި، އެ ހަރަކާތް ފަށާނީ ހަވީރު 3:45 ގައި، ދަނޑިކޮށި ޖަގަހައިން ފެށިގެންކަމަށެވެ.

ކުރިއަށް އޮތް ރިޔާސީ އިންތިހާބުގައި ރައީސް ޞާލިހަށް ތާއީދު ހޯއްދެވުމަށް އެމްޑީޕީން މިހާރު ވަނީ އަތޮޅު ތެރޭގައިވެސް ކެންޕެއިން ހަރަކާތްތައް ފަށާފައެވެ. އަދި އެމްޑީޕީއާއި އެކު ކޯލިޝަން ހަދާފައިވާ އެމްޑީއޭ އާއި އަދާލަތު ޕާޓީންވެސް އަންނަނީ ރައީސް ޞާލިހުގެ ކެންޕެއިން ހަރަކާތްތައް ކުރިއަށް ގެންދަމުންނެވެ.

އެމްޑީޕީގެ އިތުރުން، ޕީޕީއެމް އިން އެ ޕާޓީގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމްގެ ކެންޕެއިނަށް މާލޭގެ ބައެއް ގޭގެއަށް ދޮރުން ދޮރަށް ހިނގުމުގެ ހަރަކާތެއް ނިމުނު ހަފްތާގައި ވަނީ ކުރިއަށް ގެންގޮސްފަ އެވެ.