ރިޔާސީ އިންތިޚާބުގެ ބާކީ ވޯޓު ކަރުދާސްތައް ޕަންޗުކުރަން އީސީއިން ނިންމައިފި
މި އަހަރުގެ ސެޕްޓެމްބަރު މަހުގެ 9 ވަނަ ދުވަހު ބާއްވާ ރިޔާސީ އިންތިޚާބުގައި ބޭނުންކުރާ ވޯޓު ދަރުދާސްތަކުގެ ތެރެއިން ބާކީވާ ކަރުދާސްތައް އަލުން ބޭނުން ނުކުރެވޭނެހެން ޕަންޗުކުރަން އިލެކްޝަންސް ކޮމިޝަނުން ނިންމައިފި އެވެ.
ރިޔާސީ އިންތިޚާބުގައި ބޭނުންކުރާ ވޯޓު ކަރުދާސްތަކުގެ ތެރެއިން ބާކީވާ ކަރުދާސްތައް ނައްތާލުމަށް ޕީޕީއެމުން ހުށައެޅި ހުށައެޅުމަށް ރިޔާސީ އިންތިޚާބުގެ ލަފާދޭ ކޮމެޓީގެ ދެވަނަ ބައްދަލުވުމުގައި އީސީން ވަނީ ކޮމިޝަންގެ ލަފާއަށް އަހާފަ އެވެ.
ޕީޕީއެމުން އެފަދައިން ހުށައެޅީ ބާކީ ކަރުދާސްތައް ބޭނުންކޮށްގެން ވޯޓު އޮޅުވާލާނެކަމުގެ ބިރު ރައްޔިތުންގެ މެދުގައި އޮތްކަމަށް ބުނެއެވެ.
އެ ބައްދަލުވުމުގައި ގިނަ ސިޔާސީ ޕާޓީތަކުން ވަނީ ރިޔާސީ އިންތިޚާބުގައި ބޭނުންކުރާ ވޯޓު ކަރުދާސްތަކުގެ ތެރެއިން ބާކީ ވާ ކަރުދާސްތައް ނައްތާލުމުގެ ބަދަލުގައި އަލުން ބޭނުން ނުކުރެވޭނެގޮތަށް ކަރުދަާސްކޮޅުގެ ކަނުން ކަނޑާލުން ނުވަތަ ޕަންޗުކުރުމަކީ ރަނގަޅުކަމެއް ކަމަށް ބުނެފައެވެ.
އަދި އިންތިޚާބުގެ ޞައްޙަކަން ކަށަވަރުކުރުމަށް އެފަދައިން އެކަންކުރުމަކީ ރަނގަޅު ގޮތެއްކަމަށް ލަފާދޭ ކޮމެޓިން ވަނީ ބުނެފައެވެ.
އެކަމާއި ގުޅޭގޮތުން އިލެކްޝަންސް ކޮމިޝަންގެ ނައިބު ރައީސް އިސްމާއިލް ޙަބީބު ކުރެއްވި ޓްވީޓެއްގައި ވިދާޅުވީ ރިޔާސީ އިންތިޚާބު 2023 ގެ ޤައުމީ ލަފާދޭ ކޮމިޓީގެ ދެ ވަނަ ބައްދަލުވުމުގައި ކޮމިޓީގެ މެންބަރުން ކޮމިޝަނަށް ދެއްވާފައިވާ ލަފާފުޅަށް ރިޢާޔަތްކުރައްވައި، 2023 ސެޕްޓެންބަރު 9 ގައި ބޭއްވުމަށް ހަމަޖެހިފައިވާ ރިޔާސީ އިންތިޚާބުގެ ވޯޓުނަގާ ނިމުމަށްފަހު، ބާކީ ހުންނަ ވޯޓުކަރުދާސްތައް ސެކިއުރިޓީ އުރައިގައި ބަންދު ކުރުމުގެ ކުރީން، އެ ކަރުދާސްތަކަކީ އިންވެލިޑް ވޯޓުކަރުދާސް ކަމުގައި ކަނޑައެޅުމުގެ ބޭނުމަށް ކެންޑިޑޭޓުންގެ ނަންބަރު ޖަހާފައިހުންނަ ފަރާތުން، ބާކީ ހުންނަ ވޯޓު ކަރުދާސްތައް ޕަންޗުކުރަން ނިންމާފައިވާ ކަމަށެވެ.
އެފަދައިން ނިންމާފައިވަނީ އިންތިޚާބާ ގުޅިގެން ބޭއްވި 438 ވަނަ ޚާއްޞަ ޖަލްސާގައިކަމަށް ހަބީބު ވިދާޅުވި އެވެ.
ކުރިއަށް އޮތް ރިޔާސީ އިންތިޚާބަކީ މިނިވަން އިންސާފުވެރި އަދި ދެފުށް ފެންނަ އިންތިޚާބަކަށް ހެދުމަށް އިލެކްޝަންސް ކޮމިޝަނުން މަސައްކަތް ކުރަމުން އަންނަ ކަމަށާއި، އިންތިޚާބުގެ ޞައްޙަކަން ކަށަވަރުކުރުމަށް އެ ކޮމިޝަނުން ކުރެވެން އޮތް ހުރިހާ ކަމެއް ކުރާނެކަމުގެ ޔަގީންކަން އީސީން ވަނީ ދީފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
