ކައުންސިލް އިންތިހާބުގައި މާލޭގައި ވޯޓު ލާފައިވާ މީހުން ރީ-ރަޖިސްޓީ ކުރަން ނުޖެހޭ ގޮތަށް ހަދައިފި!

އެންމެ ފަހުން ބޭއްވި ލޯކަލް ކައުންސިލް އިންތިހާބުގައި ވޯޓްލާން މާލެއަށް ރަޖިސްޓްރީކޮށްފައިވާ މީހުން ކުރިއަށް އޮތް ރިޔާސީ އިންތިހާބަށް އަލުން ރީ-ރަޖިސްޓްރީ ކުރަން ނުޖެހޭ ގޮތަށް އިލެކްޝަން ކޮމިޝަން (އީސީ) އިން ނިންމައިފި އެވެ.

‏ކޮންމެ ރިޔާސީ އިންތިޚާބެއްގައި ރީ-ރަޖިސްޓްރޭޝަންގެ މަރުޙަލާ އަލުން ފެށުމަށް މީގެ ކުރީން ކޮމިޝަނުން ވަނީ ނިންމަވާފައެވެ. އެހެންނަމަވެސް، ރިޔާސީ އިންތިޚާބު 2023 ގެ ޤައުމީ ލަފާދޭ ކޮމިޓީގެ ދެ ވަނަ ބައްދަލުވުމުގައި ކޮމިޓީގެ މެންބަރުން ވަނީ، އެގޮތަށް އެހެން ހެދުމުގެ ބަދަލުގައި، އެންމެ ފަހުން ބޭއްވުނު އިންތިހާބުގައި މީހުން ރެޖިސްޓަރ ކޮށްފައިވާ ތަނަށް ކުރުމަށް ލަފާ އަރުއްވާފައެވެ.

އެހެން ކަމުން، ލަފާއަށް ރިޢާޔަތްކުރައްވައި، މިއަހަރުގެ ސެޕްޓެންބަރ 09 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި، ނިމިދިޔަ ލޯކަލް ކައުންސިލްތަކުގެ އިންތިޚާބު 2020 ގައި މާލެއަށް ވޯޓުލުމަށް ރީ-ރަޖިސްޓަރީކޮށްފައިވާ ފަރާތްތައް އަލުން ރެޖިސްޓާ ކުރަން ނުޖެހޭ ގޮތަށް އީސީން ނިންމާފައިވާ ކަމަށް، އެ ކޮމިޝަންގެ ނައިބު ރައީސް އިސްމާއީލް ހަބީބު ވަނީ ވިދާޅުވެފަ އެވެ.

އަދި އެފަރާތްތައް ފިޔަވައި، އެހެން ހުރިހާ ފަރާތްތައް (ޖަލުތަކާއި، ސިނާއި ތަންތަނާއި، ރިސޯޓުތަކާއި ރާއްޖެއިން ބޭރުގައި ވޯޓުލުމަށް ރަޖިސްޓަރީވެފައިވާ ފަރާތްތައް ހިމެނޭހެން) ރެޖިސްޓާރ ވާނީ ކުރިންވެސް އޮތް ގޮތަށް އެފަރާތެއްގެ ދާއިމީ އެޑްރެހަށް ކަމަށްވެސް ހަބީބު ވިދާޅުވި އެވެ.

އަދި އެކަން ނިންމާފައިވަނީ އިންތިޚާބާ ގުޅިގެން ބޭއްވި 438 ވަނަ ޚާއްޞަ ޖަލްސާގައި ކަމަށް ހަބީބު ވިދާޅުވި އެވެ.

މި ނިންމުމާ ގުޅިގެން، ނިމިދިޔަ ލޯކަލް ކައުންސިލްތަކުގެ އިންތިޚާބު 2020 ގައި މާލެއަށް ވޯޓުލުމަށް ރީ-ރަޖިސްޓަރީކޮށްފައިވާ ފަރާތްތަކުގެ މަޢުލޫމާތު ޢާންމުކޮށް އަންގާ އިޢުލާންކުރެވޭނެ ކަމަށާ، އެ އިޢުލާންގައިވާ ލިސްޓުގައިވާ މަޢުލޫމާތު ކަށަވަރުކޮށް ރީ-ރަޖިސްޓްރޭޝަނަށް މިހާރު ކަނޑައަޅާފައިވާ މުއްދަތުގެ ތެރޭގައި ޝަކުވާއެއްވާނަމަ އެ ޝަކުވާއެއް ހުށަހެޅުމާއި، ރީ-ރަޖިސްޓްރޭޝަންގެ މުއްދަތުގައި ލިސްޓުގައިވާ މަޢުލޫމާތުތައް ޗެކުކުރުމަކީ ވޯޓުލާ ފަރާތްތަކުގެ ފަރުދީ ޒިންމާއެއް ކަން ހަބީބު ފާހަގަކުރެއްވިއެވެ.

ހަބީބު އިތުރަށް ވިދާޅުވީ، މި މުއްދަތުގެ ފަހުން ކޮމިޝަނާއި، ވޯޓުލާ ދުވަހު ލިސްޓާ ގުޅިގެން ކޮމިޝަނަށް ހުށަހަޅާ ޝަކުވާތަކަށް ކޮމިޝަނުން އިޖާބަ ނުދޭނެ ކަމަށެވެ.