ވާދަވެރި ވިޔަފާރިއެއް ފެންނަން މިއޮތީ ގާސިމްގެ ސަބަބުން؛ އެއިން ފައިދާ ވަނީ ރައްޔިތުންނަށް: ނަހުލާ

ދިވެހިރާއްޖޭގައި ވާދަވެރި ވިޔަފާރިއެއް ފެންނަން މިއޮތީ ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓް ގާސިމް އިބްރާހިމް ގެ ވިޔަފާރި ފުޅާކޮށްފައިވަތީ ކަމަށާ، އެކޭގެ ސަބަބުން ދިވެހި ރައްޔިތުންނަށް ވެފައިވާނީ ފައިދާ ކަމަށް މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން އަދި ޖުމްހޫރީ ޕާޓީގެ ޑެޕިއުޓީ ލީޑަރު އައިޝަތު ނަހުލާ ވިދާޅުވެއްޖެއެވެ.

'ހާސްކަނޑާލާ ހަމަޖެހޭނެ' މި ޝިޢާރުގެ ދަށުން ޖުމްހޫރީ ޕާޓީން ކުރިއަށްގެންދިޔަ ޕްރޮގްރާމެއްގައި ވާހަކަ ދައްކަވަމުން ނަހުލާ ވިދާޅުވީ، ގާސިމް ވެރިކަމަށް ވަޑައިގެންފި ނަމަ، ގާސިމްގެ ވިޔަފާރި ފުޅާ ކުރައްވާނެ ކަމަށް ބައެއް ފާޑުކިޔުންތެރިން ބުނަމުން އަންނަ ކަމަށެވެ.

އެހެން ނަމަވެސް، ރާއްޖޭގެ ރައްޔިތުންނަށް ހަމަޖެހުމެއް ފެންނަން މިއޮތީ ގާސިމްގެ ވިޔަފާރި ފުޅާކުރުމުން ކަމަށް ނަހުލާ ވިދާޅުވި އެވެ.

މިއާއެކު ނަހުލާ ވިދާޅުވީ، ރާއްޖޭގެ އެކި ކަންކޮޅުތަކުގައި ހިންގާފައި ހުރި މަޝްރޫއުތައް ހިންގާފައިވަނީ ވޭތުވެދިޔަ ސަރުކާރު ތަކުން އެކަނި ކަމަށާ، އަމިއްލަ ފަރާތްތަކަށް އެ ފުރުސަތާއި އަމިއްލަ ވިޔަފާރި ކުުރުމުގެ ފުރުސަތު އޮތްނަމަވެސް އެ ފުރުސަތުގެ ބޭނުން ބައެއް ފަރާތްތަކުން ނުކުރާ ކަމަށް ނަހުލާ ވިދާޅުވި އެވެ. އޭގެ ނަތީޖާއެއްގެ ގޮތުން، ވާދަވެރިން ނެތި ޚިދުމަތްތައް މޮނޮޕޮލައިޒްވެފައިވާ ކަމަށްވެސް ނަހުލާ ފާހަގަކުރެއްވިއެވެ.

ނަމަވެސް އެހެން އޮތް އޮތުން ނިމުމަކަށް ގެންނެވުމަށް، ތަފާތު އެކި ދާއިރާތަކުން ގާސިމްގެ ވިޔަފާރިތައް ކުރިއަރުވައި ހިންގަވަން ފެއްޓެވި ކަމަށާ އޭގެ ނަތީޖާއެއްގެ ގޮތުން ރައްޔިތުންނަށް ލިބެމުންދިޔަ ޚިދުމަތްތަކުގެ އަގު ހެޔޮވެގެން ދިޔަ ކަމަށް ނަހުލާ ވިދާޅުވި އެވެ.

ވޭތުވެދިޔަ ސަރުކާރުތަކުން ކުރަމުން އައި ނުވަތަ ހިންގަމުން އައި މަޝްރޫޢުތަކަކީ ހަމައެކަނި ސަރުކާރުން ހިންގަމުން އައި މަޝްރޫޢޫތަކެއް. އަމިއްލަ ފަރާތްތަކަށް ފުރުސަތު އޮތްނަމަވެސް އަމިއްލަ ފަރާތްތަކުން ނުކުރޭ. ނުކުރާ ކަމުގެ ސަބަބުން އަގު ކޮންޓްރޯލްވެފަ ކޮމްޕީޓްކުރާނެ އެހެން ފަރާތެއްނެތިފަ ހުއްޓުމެއްގެ ތެރޭގަ އޮތީ. މޮނޮޕޮލައިޒް ވެފަ އޮތީ. އެހެން އޮތްއޮތުން ނިމުމަކަށް ގެނައުމަށްޓަކައި އަމިއްލަފުޅަށް މަސައްކަތް ކުރައްވަން ފެއްޓެވީމަ ނަތީޖާއަކަށްވީ ރައްޔިތުންނަށް ޚިދުމަތްތައް އަގުހެޔޮކޮށް ލިބުން. ތެޔޮ ކަމުގައި ވިޔަސް. ޓިކެޓް ކަމުގައި ވިޔަސް"

ޖުމްހޫރީ ޕާޓީގެ ޑެޕިއުޓީ ލީޑަރު އައިޝަތު ނަހުލާ

މީގެ މިސާލެއްގެ ގޮތުން ނަހުލާ ނެންގެވި ވިލާ އިން ހިންގާ 'ފްލައި މީ' ގެ ޚިދުމަތެވެ. ނަހުލާ ވިދާޅުވީ މިހާރުވެސް އެންމެ އަގުހެޔޮކޮށް ޓިކެޓް ވިއްކަމުން އަންނަނީ އެ އެއާލައިން އިން ކަމަށެވެ. އަދި އެކަމުގެ ސަބަބުން ރައްޔިތުންނަށް ފައިދާތައް ވަމުން އަންނަ ކަމަށްވެސް އޭނާ ވިދާޅުވި އެވެ.

އެގޮތަށް އެކަން ކުރީމަ ނޫންތޯ އޭރުގައި އޮތް ސަރުކާރަކުން ޖެހުނީ ޓިކެޓްގެ އަގު ހެޔޮ ކުރަން. ކޮންބަޔަކަށްތޯ ފައިދާވީ ގާސިމް އިބްރާހިމް ވިޔަފާރި ކުރެއްވީމާ؟ އަޅުގަނޑަށް ހީވަނީ ރައްޔިތުންނަށް ހެން.

ޖުމްހޫރީ ޕާޓީގެ ޑެޕިއުޓީ ލީޑަރު އައިޝަތު ނަހުލާ

މީހެ އިތުރުން ނަހުލާ ވިދާޅުވީ ގާސިމް އަކީ އަމިއްލަ ވިޔަފާރިތަކުން ލިބޭ އާމްދަނީގެ 60 އިންސައްތަ ރައްޔިތުންނަށް ޚަރަދު ކުރައްވާ ބޭފުޅެއް ކަމަށާ، އެހެންކަމުން، ދަރަނިވެރިވެފަ އޮތް ދައުލަތަކާ އެމަނިކުފާނު ހަވާލުވެފަ ފުރުއްވާނެ ނުވަތަ ބޮޑު ކުރައްވާނެ ޖީބެއް ނެތް ކަމަށެވެ.