ޝިޔާމް ރައީސް ޞާލިހަށް: ހެޔޮ ނުވާނެ އައު ކަމެއް ކޮށްބަލަ!

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މިސަރުކާރުން ކުރަމުންދަނީ ކުރީ ސަރުކާރު ތަކުން ކޮށްފައިވާ ކަންކަން ކަމަށް ބުނެ، ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަދި އިދިކޮޅު ޕީޕީއެމްގެ ނާއިބު ރައީސް އަހުމަދު ޝިޔާމް މި ސަރުކާރަށް ފާޑުވިދާޅުވެއްޖެއެވެ.

އެސްޓީއޯއިން ރޭޑިއޯގްރެފީ އަށް މީހުން އަހުލުވެރިކުރުމުގެ ގޮތުން ޑިޕްލޮމާ އިން ރޭޑިއޯގްރެފީ ކޯސް އިފްތިތާހު ކުރި ކަމަށް ލިޔެފައިވާ ޚަބަރަކާއި ގުޅިގެން، ޝިޔާމް ކުރެއްވި ޓުވީޓެއްގައި ވިދާޅުވީ، ކުރީގެ ރައީސް ޔާމީން އަބްދުލްގައްޔޫމް ގެ ވެރިކަމުގައި 2014 ވަނަ އަހަރު އެސް.ޓީ.އޯ އިން އޮންލައިން ފާމަސީ ކޯސްތައް ފަށާފައިވާ ކަމަށެވެ.

އަދި 2016 ވަނަ އަހަރުގެ ޑިސެމްބަރ މަހުގައި ރޭޑިއޯ ގްރަފީ ޓްރެއިނިންގ ސެންޓަރ މަސައްކަތް އިއުލާންކޮށްފައިވާ ކަމަށްވެސް އޭނާ ވިދާޅުވި އެވެ. އަދި އެތަނުގެ މަސައްކަތް ނިންމައި 2018 ވަނަ އަހަރު ގެ މެއި މަހު ރޭޑިޔޮގްރަފީ ކޯސްތައް ހިންގަން މިނިސްޓްރީ އޮފް އެޑިޔުކޭޝަން އާއެކީ އެއްބަސްވުމެއްގައި ސޮއިކޮށްފައި ވާކަންވެސް ޝިޔާމް ފާހަގަކުރެއްވިއެވެ.

"ހެޔޮނުވާނެ، ރައީސް ޞާލިހު އައު ކަމެއް ކޮށްބަލަ!" ރައީސް ޞާލިހު ގެ ސަރުކާރަށް ފާޑުވިދާޅުވެ ޝިޔާމް ވިދާޅުވިއެވެ.

މީގެ ކުރިންވެސް ޝިޔާމް ވަނީ މިސަރުކާރުން ރަސްމީކޮށް ހުޅުވަމުންދާ މަޝްރޫ ތަކަކީ ރައީސް ޔާމީން ގެ ސަރުކާރުގައި މަސައްކަތް ފަށައި އެއްކޮށް ނުވަތަ ބޮޑު ބައި ނިންމާފައިވާ މަޝްރޫއުތައް ކަން ވިދާޅުވެ ސަރުކާރަށް ފާޑުވިދާޅުވެފައެވެ.

އެގޮތުން ރައީސް ޔާމީން ގެ ސަރުކާރުގައި ތަރައްގީ ކުރި، ވެލާނާ އިންޓަރނޭޝަނަލް އެއަރޕޯޓް ގެ އައު ރަންވޭ މި ސަރުކާރުން ރަސްމީކޮށް ހުޅުވިމާއި ގުޅިގެންވެސް ޝިޔާމް ވަނީ މިސަރުކާރުން ރިބަން ކަނޑާލަން ފުރުސަތު ލިބިގެންދަނީވެސް ރައީސް ޔާމީންގެ މަސައްކަތުން ކަމުގައި ވިދާޅުވެފައެވެ. އަދި ރައީސް ޔާމީން މިގައުމުގައި 2013 އިން 2018 އަށް ވެރިކަން ކުރެއްވި ކަމީ ރައީސް ޞާލިހާއި މިސަރުކާރަށް ލިބުނު ބޮޑު ނަސީބެއްކަމަށެމްވެސް އޭނާ ވިދާޅުވިއެވެ.