ފަލަސްތީނުގެ މިނިވަންދައުލަތް ގުދުސްގައި ގާއިމުކުރެވެންޖެހޭނެ ކަމަށް ރާއްޖޭގެ އިންތިޚާބީ ރައީސް ޑރ.މުއިއްޒު ވިދާޅުވެއްޖެ
ބައިނަލް އަގުވާމީ ގާނޫންތަކާ ޚިލާފަށް ފަލަސްތީނުގެ ބިންތައް އަޅުވެތިކޮށްފައިވާ އަޅުވެތިކުރުން ނިމުމަކަށް ގެންނަން ޖެހޭ ކަމަށާއި ޔަހޫދީން ގަދަކަމުން ވެރިވެގެންފައިވާ ފަލަސްތީނުގެ ބިންތަކުން ފައިބައި އެބިންތައް ފަލަސްތީނު ރައްޔިތުންނަށް އަނބުރައި ރައްދުކުރުމަށް ރާއްޖޭގެ ރައީސުލްޖުމްހޫރިއްޔާ ކަމުގެ މަގާމަށް ދިވެހިރައްޔިތުން އަލަށް އިންތިޚާބުކުރި ޑޮކްޓަރ މުހައްމަދު މުއިއްޒު ގޮވާލައްވައިފިއެވެ.
ފަލަސްތީނު މުޖާހިދުންނާއި އިސްެރާއީލް ސިފައިންނާ ދެމެދު އަސްކަރީ ވަރުގަދަ ކުރިމަތިލުމެއް ފެށިފައިވަނިކޮށް ރާއްޖޭގެ އިންތިޚާބީ ރައީސް މުއިއްޒު ދެންމެ ކުރެއްވި ޓްވީޓެއްގައި ވިދާޅުވީ ފަލަސްތީނުގެ މިނިވަން ދައުލަތެއް އިސްރާއީލުން ބަލައިގަންނަން ޖެހޭނެ ކަމަށެވެ.
ފަލަސްތީނު މައްސަލަ ވަރަށް ގޯސްވެ ބައިނަލް އަގުވާމީ މުޖްތަމައުން އެކަމާ ކަންބޮޑުވުން ފާޅުކޮށް، އަދި ޔޫރަޕްގެ ގައުމުތަކުން ފަލަސްތީނު ރައްޔިތުން ކުށްވެރިކޮށް އިސްލާމީ ގައުމުތަކުން ފަލަސްތީނު ރައްޔިތުންގެ ހައްގުގައި ބަސްބުނަމުންދިޔަ ނަމަވެސް ސައްތައިން ސައްތަ މުސްލިމް ދިވެހިރާއްޖޭގެ ވެރިޔަކު މުއިއްޒު ފިޔަވައި އަދި އެއްޗެއް ވިދާޅެއް ނުވެއެވެ.
ޓްވީޓާގައި އެމަނިކުފާނު ބަޔާނެއް ދެއްވުމާއެކު ވަރަށް ގިނަ ދިވެހި ރައްޔިތުން އެމަނިކުފާނުގެ ހިއްވަރަށް ތާރީފްގެ ބަސްތައް ފާޅުކުރަމުންދާކަން ފާހަގަކޮށްލެވެއެވެ. ފަލަސްތީނު މައްސަލާގައި އެމަނިކުފާނުގެ ރިއެކްޝަން އައިލެއް އަވަސްކަމާއި މިއީ ހިއްވަރުގަދަ އަމަލެއްކަމަށް ވަރަށް ގިނަމީހުން ފާޅުކުރެއެވެ.
މުއިއްޒު ވިދާޅުވެފައިވަނީ އިރުމަތީ ޖެރޫސަލަމްގައި ފަލަސްތީނުގެ މިނިވަން ދައުލަތް ގާއިމުކުރެވި ރަށުން ބޭރުކޮށްލެވިފައިވާ ފަލަސްތީނުގެ ރައްޔިތުންނަށް އެމީހުންގެ ގޯތިގެދޮރަށް އެނބުރި އައުމުގެ ހައްގު ލިބިދެވެންޖެހޭނެ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
