ފިރިހެން ކުއްޖަކަށް ޖިންސީ ގޯނާކުރި އިންޑިއާ ފިރިހެނެއް ހައްޔަރުކޮށްފި

އުމުރުން 17 އަހަރުގެ ފިރިހެން ކުއްޖަކަށް ޖިންސީގޯނާކުރި މައްސަލައެއްގައި އިންޑިއާ ފިރިހެނަކު ހައްޔަރުކޮށްފި އެވެ.

ފުލުހުން ރޭ ބުނީ، ހއ، ހދ، ށ ގައި ހިމެނޭ ރަށެއްގައި 17 އަހަރުގެ ކުޑަކުއްޖަކަށް ޖިންސީ ގޯނާކުރި ކަމަށް ތުހުމަތުކުރެވޭ މައްސަލައެއް މިމަހުގެ 5 ވަނަ ދުވަހުގެ ރޭ 9:43 ހާއިރު ފުލުހަށް ހުށަހަޅާފައިވާ ކަމަށެވެ.

އަދި މިމައްސަލައާއި ގުޅިގެން 28 އަހަރުގެ ބިދޭސީ ފިރިހެނަކު ފުލުހުން ބެލުމުގެ ދަށަށް ގެންގޮސްފައިވާ ކަމަށާ އެ މައްސަލަ ތަހުގީގު ކުރަމުންދާ ކަމަށް ފުލުހުން ބުނެފައިވެއެވެ.

ކުޑަކުދިންނާ ގުޅޭ މައްސަލަތަކަކީ ސީރިއަސް މައްސަލަތަކެއް ކަމުން ކުއްޖާގެ މައުލޫމާތާއި އަތޮޅާއި ރަށް ފުުލުހުން ހާމަކޮށްފައެއް ނުވެއެވެ. މިމައްސަލައާއި ބެހޭ އިތުރު މައުލޫމާތެއް ވެސް ފުލުހުން ނުދެއެވެ.

މައުލޫމާތު ލިބިފައިވާ ގޮތުގައި އެ ފިރިހެން ކުއްޖާއަށް ޖިންސީ ގޯނާ ކޮށްފައިވަނީ އިންޑިއާ ޓީޗަރެކެވެ. އަދި އޭނާ ހައްޔަރު ކޮށްފައި ވަނީ، ފުލުހުން އެ މައްސަލަ ނުބަލާ ކަމަށް ބުނެ އެ ރަށުގެ މަސްރަހު ހޫނުވެ ރައްޔިތުން މުޒާހަރާއަށްވެސް ކޮށްފައިވަނިކޮށެވެ.