މޭރީގެ މަރު: ޕޭޝަންޓު ޗާޓު ހޯދުމަށް ދައުލަތަށް ފަހު ފުރުސަތު
މިދިޔަ އަހަރުގެ އޮކްޓޯބަރު މަހުގެ 19ވަނަ ދުވަހު މަރާލާފައިވާ، އައިޖީއެމްއެޗުގެ ނަރުސް، މޭރީ ގްރޭސްގެ މައްސަލައިގައި ހެކިންގެ ހެކިބަސް ނަގައި ނިންމައިފިއެވެ.
އެ މައްސަލައިގައި ދައުލަތުގެ ފަރާތުން ހެކިބަސް ދިން ދެމީހަކު ވަނީ މޭރީ ގްރޭސް ދިރިއުޅެމުންދިޔަ މއ.އުދުހޭކޮކާގޭގެ ސިޑިކައިރިން އޭނާ މަރުވި ދުވަހު އަޑެއް އިވިފައިވާ ކަމަށް ބުނެފައެވެ.
ހެކިބަސްދިން އަނެއް މީހާ ބުނެފައިވަނީ އެގެއަކީ ކޮންމެ މީހަކަށް ވަދެނިކުމެވޭހެން ހުންނަ ގެއް ނޫންކަމަށެވެ. ގެއަށް ވަދެވެނީ ވަންނަން ބޭނުންކުރާ ޓެގް ބޭނުން ކޮށްގެންކަމަށެވެ. އޭނާ ސިޑިން ތިރިއަށް ފޭބިއިރު އެއްވެސް މީހަކާއި ދިމާނުވާކަމަށް ހެކިވެރިޔާ ވަނީ ބުނެފައެވެ. އޭނާ ފޭބި ގަޑިއަކީ މެންދުރު ސްކޫލު ނިންމާފައި މަންމައާއި ކޮއްކޮ ގޭކައިރީގައި ތިބި ވަގުތުކަމަށްވެސް އޭނާ ވަނީ ބުނެފައެވެ.
ފުލުހުން އެ މަރުގެ ތަހުގީގު ފަށާފައިވަނީ އެޙާދިސާއާ ގުޅިގެން އާދަޔާ ޚިލާފު ކަންތައްތަކެއް ފާހަގަކުރެވިގެންނެވެ. އޭނާ މަރުވެގެން ހޮސްޕިޓަލަށް ގެންގޮސްފައިވަނީ އޭނާގެ ފިރިމީހާއެވެ. އޭރު އޭނާ ބުނީ މޭރީ ދަންޖެހިގެން އަމިއްލައަށް މަރުވީކަމަށެވެ. މޭރީގެ މަރުގެ މައްސަލާގައި ހެދި ޕޯސްޓްމޯޓަމް ރިޕޯޓްގައިވާ ގޮތުން މޭރީ މަރާލާފައިވަނީ ނޭވާ ހާސްކޮށްލައިގެންނެވެ.
މިއަދުގެ ޝަރީއަތުގައި މިމައްސަލަ ބައްލަބާ ޤާޟީ ވަނީ މޭރީ ގްރޭސް އައިޖީއެޗަށް ގެންގޮސް، ދިން ފަރުވާގެ ޕޭޝަންޓު ޗާޓުތަކުގެ މައުލޫމާތު ސާފުކުރުމަށް ދައުލަތަށް ފުރުސަތު ދިނުމަށްފަހު އެފުރުސަތުގައި އެކަން ސާފުނުކޮށް ދެވިއްޖެނަމަ އައިޖީއެމްއެޗްގެ ވެރިން ހާޒިރުކޮށްގެން މައުލޫމާތު ސާފުކުރާނެކަމަށް ވިދާޅުވެފައެވެ.
ޕޭޝަންޓުގެ ޗާޓު ނެތިގެން ދައުލަތުގެ ހެކިންގެ ގޮތުގައި ހުށަހަޅާފައިވާ ޑޮކްޓަރުންނާއި ނަރުހުންގެ ހެކިބަސް ނެގުމަށް ލަމްހާގެ ވަކީލުން އިއުތިރާޒު ކުރުމުން ޝަރީއަތުން ވަނީ އެއިއުތިރާޒު ބަލައިގަނެފައެވެ.
މިމައްސަލަ ބައްލަވާ ޤާޟީ ހުސެއިން ފާޒިރު ރަޝާދު ވިދާޅުވީ މާދަމާގެ ނިޔަލަށް ޕޭޝަންޓު ޗާޓުގެ މައުލޫމާތު ހިއްސާ ކުރެވެން ވާނެކަމަށެވެ. އެކަން މާދަމާގެ ނިޔަލަށް ނުވެއްޖެނަމަ އައިޖީއެމްއެޗްގެ ވެރިން ހާޒިރުކޮށް މައުލޫމާތު ސާފު ކުރާނެކަމަށް ޤާޟީ ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
