ކޯޓުތަކުން އަދުލު އިންސާފު ލިބޭނެކަމުގެ ޔަގީންކަން ސަރުކާރުން ކަށަވަރުކޮށްދީފި: ޝިފާއު

ދިވެހިރާއްޖޭގެ ކޯޓުތަކުން ރައްޔިތުންނަށް އަދުލު އިންސާފު ލިބިގެންދާނެކަން މި ސަރުކާރުން ކަށވަރުކޮށްދީފައިވާކަމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާއު ވިދާޅުވެއްޖެއެވެ.

ޝިފާއު މި ފަދައިން ވިދާޅުވެފައިވަނީ ރައްޔިތުންގެ މަޖިލީހުގެ 3 ވަނަ ދައުރުގެ 33 ވަނަ ޖަލްސާގައި ހެއްކާއި ބެހޭ ބިލަށް ބަހުސްކުރައްވަމުންނެވެ.

އެ ބިލަށް ބަހުސް ކުރައްވަން ފައްޓަވަމުން ޝިފާއު ވިދާޅުވީ، ޝަރުއީ ދާއިރާއާއި ކޯޓުތަކަށް އިންތިހާއަށް ނުފޫޒު ފޯރުވާ ފަނޑިޔާރުންނަށް ބިރުދެއްކި ވެރިކަމެއް ދިވެހިން ތަޖުރިބާކޮށްފައިވާކަމަށެވެ.

އެހެން ނަމަވެސް މިއަދު އެ ހާލަތު ބަދަލުވެ ރާއްޖޭގެ ޝަރުއީ ދާއިރާ ވަރަށް ބޮޑަށް އިސްލާހު ކުރެވިފައިވާަމަށް އޭނާ ވިދާޅުވިއެވެ. އެގޮތުން މި ސަރުކާރުން ވަނީ ކޯޓުތަކާއި މެދު އޮތް އިތުބާރު އަލުން އަނބުރާ ނަގަހައްޓާދީފައި ކަމަށާއި، ކޯޓުތަކުން ރައްޔިތުންނަށް އިންސާފު ލިބޭނެކަން މި ޝަރުކާރުން ކަށަވަރުކޮށްދީފައިވާކަމަށް ޝިފާއު ވިދާޅުވިއެވެ.

"ދެކެމުން މި ދަނީ ޝަރުއީ ނިޒާމު މިނިވަންކުރުމަށްޓަކައި ސަރުކާރުގެ ފަރާތުން ރައީސުލްޖުމްހޫރިއްޔާ އަމިއްލަ އިސް ނެންގެވުމުގައި އެތައް މަސައްކަތެއް ކުރާ ޒަމާނެއް، މިއަދު ރައްޔިތު މީހާއަށް އޮތް ހިތްހަމަ ޖެހުމަކީ ރައްޔިތު މީހާ އާއި ގުޅޭގޮތުން ރާއްޖޭގެ ޝަރުއީ ކޯޓެއްގައި މައްސަލައެއް ހިނގިކަމުގައި ވިޔަސް، އެކަމަށް އަދުލުވެރި ހުކުމެއް ލިބޭނެ ކަމުގެ ޔަގީންކަން"

އިހަވަންދޫ ދާއިރާގެ މެމްބަރު މުހައްމަދު ޝިފާއު

ޝަރުއީ ދާއިރާ އިސްލާހުކޮށް ކޯޓުތަކަށް އޮތް ނުފޫޒު މި ސަރުކާރުން ނައްތާލާފައިވާކަމަށް ޝިފާއު ވިދާޅުވިނަމަވެސް، ޝަރުއީ ދާއިރާ އިސްލާހުކުރުމަށް މި ސަރުކާރުން ވީ އެންމެ ބޮޑު ވައުދު މިހާތަނަށް ފުއްދާފައި ނުވާކަން ފާހަގަކޮށްލެވެއެވެ.

2018 ވަނަ އަހަރުގެ ރިޔާސީ އިންތިޚާބަށް ގުޅިފައިވާ ސިޔާސީ ޕާޓީތަކުން ހުށައެޅި މެނިފެސްޓޯގައި އަދުލު އިންސާފު ގާއިމުކޮށް ކޯޓުތަކަށް އޮތް ނުފޫޒު ނައްތާލުމަށް ކޯޓުތަކުގެ ބެލެނިވެރި ފަރާތްކަމަށްވާ ޖުޑިޝަލް ސާރވިސް ކޮމިޝަންގެ ކޮމްޕްސިޝަން ބަދަލުކުރާނެކަމަށް ބަޔާންކޮށްފައިވެއެވެ.

އެހެން ނަމަވެސް ޖޭއެސްސީ އެތުރިފައިވާ ގޮތް ބަދަލުކުރުމަށް މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު 3 ފަހަރުމަތިން ހުށައެޅުމުންވެސް އެ ބިލު ބަލައިގެންފައެއް ނުވެއެވެ. އަދި އެފަހުން ސިޔާސީ މީހުން ޖޭއެސްސީގައި ތިބެން ނުޖެހޭކަމަށް މީގެ ކުރިން އެމްޑީޕީއިން ބުނަމުން ދިޔަ ސްޓޭންޑްވެސް ވަނީ ބަދަލުކޮށްފައެވެ.