އައްޑޫގައި ހިނގާ މަޝްރޫއުތައް ފެނި ރައީސް ޔާމިންވެސް ހުރީ ވާނެ ވައުދަކާއި މެދު ވިސްނަން: ނިހާދު

އައްޑޫ ސިޓިގައި މިސަރުކާރުން ހިންގާ މަޝްރޫޢުތައް ގިނަކަމުން، އިދިކޮޅު ކޯލިޝަނުން ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ވެސް ހުންނެވީ އައްޑޫޢަށް ވާނެ ވަޢުދަކާއިމެދު ވިސްނަވަން ކަމަށް އައްޑޫ ފޭދޫ ދާއިރާގެ އެމްޑީޕީ މެންބަރު މުޙައްމަދު ނިހާދު ވިދާޅުވެއްޖެއެވެ.

ރިޔާސީ އިންތިޚާބުގެ ކެމްޕެއިނަށް ރައީސް ޔާމީން ކުރައްވާ ދަތުރުފުޅުގެ ތެރެއިން އައްޑޫ ސިޓީ ފޭދޫ އަށް އިއްޔެ ވަޑައިގެންނެވުމާއި ގުޅިގެން އެމަނިކުފާނަށް ފާޑުވިދާޅުވެ ނިހާދު ކުރެއްވި ޓުވީޓެއްގައި ވިދާޅުވީ، އައްޑޫއަށް ދިޔަ ޕީޕީއެމް/ޕީއެންސީގެ ޓީމްގެ މެންބަރުންގެ ދުލުން އަބަދުވެސް އިވެމުންދިޔައީ "ހާދަ ކަމެއް އެބަކުރޭ" ކަމަށެވެ. އެގޮތުން، މުޅި އައްޑޫ ސިޓީ އޮތީ މަގު ހަދަން ކޮނެފައި ކަމަށާ، އިންޖީނުގޭ އައު އޮފީހާއި ސްކޫލާއި މިސްކިތް އަޅަމުން އަންނަކަމުގެ ވާހަކަ އިދިކޮޅު ޓީމުން ދައްކާ ކަމަށް އޭނާ ވިދާޅުވިއެވެ.

"ލިސްޓް ދިގޭ! ޔާމީން ޢަބްދުލްޤައްޔޫމްވެސް ހުރީ ކޮސްވެ ބަސް ހުއްޓިފަ، ދެން ވާނެ ވައުދަކާއި މެދުވެސް ވިސްނަން." ނިހާދު ވިދާޅުވިއެވެ.

މިސަރުކާރުން އައްޑޫ ސިޓީގައި މަޝްރޫއުތައް ހިންގައި މަގުހަދާ ވާހަކަ ނިހާދު ދައްކަވާފައިވާއިރު, އައްޑޫގެ މަގުތައް ހެދުމަށް ހަވާލު ކުރެވިފައިވާ އެފްކޮންސް އިން އެ މަގުތައް ހަދާ ފެންވަރު ދަށްވެގެން އެ ސިޓީގެ ރައްޔިތުންނާއި، ނިހާދުވެސް ވަނީ ކަންބޮޑުވުން ފާޅުކޮށްފައެވެ.

އަދި ރައީސް ޔާމީން އައްޑޫ އަށްވާނެ ވައުދަކާއި މެދު ވިސްނަވަން ހުންނަން ޖެހުނު ކަމަށް ވިދާޅުވިއިރު، އެމަނިކުފާނު ވަނީ ވެރިކަން ލިބިއްޖެނަމަ ފުރަތަމަ ތިން އަހަރު ތެރޭ އައްޑޫ ސިޓީގައި އެކަނިވެސް 5000 ވަޒީފާ އުފައްދަވާނެ ކަމަށް ވައުދުވެވަޑައިގެންފައެވެ. އަދި އެއީ މިވަގުތު ޒުވާނުންގެ ކުރިއެރުމަށް އެންމެ މުހިންމު ކަންތައް ކަމަށްވެސް އެމަނިކުފާނު ފާހަގަކުރެއްވިއެވެ.