ފަނޑިޔާރުންނަށް އެންމެ ބޮޑަށް ނުފޫޒު ފޯރުވަނީ ޖޭއެސްސީ އިން: އަލީ ހުސެއިން
ފަނޑިޔާރުންނަށް އެންމެ ބޮޑަށް ނުފޫޒު ފޯރުވަނީ ޖުޑިޝަލް ސާރވިސް ކޮމިޝަން (ޖޭއެސްސީ) އިން ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސެއިން ވިދާޅުވެއްޖެއެވެ.
އަލީ ހުސެއިން މިފަދައިން ވިދާޅުވެފައިވަނީ ސުޕްރީމް ކޯޓުގެ ފަނޑިޔާރު މަހާޒް އަލީ ޒާހިރުގެ ފަރިއްކޮޅާއި ގުޅުވާ އަނެއްކާވެސް އިތުރު ތުހުމަތުތަކެއް ކުރުމާއި ގުޅިގެން ކުރެއްވި ޓްވީޓެއްގައެވެ.
ޖުޑިޝަލް ސާރވިސް ކޮމިޝަނުން ވަނީ ސުޕްރީމް ކޯޓުގެ ފަނޑިޔާރު މަހާޒް އަލީ ޒާހިރުގެ ސުލޫކީ މައްސަލައެއް ބަލަން ނިންމާފައެވެ.
ފަނޑިޔާރު މަހާޒަށް ތުހުމަތުކޮށް ބަލަން ފެށީ ކުރީގެ ރައީސް އަބްދުﷲ ޔާމީން މިނިވަންކުރަން މިދިޔަ އަހަރު ސުޕްރީމް ކޯޓުގައި ހުކުމްކުރި ދުވަހު، ހުކުމަށްފަހު ޔާމީނާ ގުޅުން އޮތް ބޭފުޅަކު ފޮނުވި ފަރިއްކޮޅަކާ ހަވާލުވި ކަމަށް ބުނެ އެވެ. އަދި އުފާ ފާޅުކުރުމުގެ ގޮތުން ކޯޓުގައި އެ ފަރިއްކޮޅުގައި ބޭއްވި ކަމަށް ބުނެ އެވެ.
ރެސްޓޯރެންޓަކަށް އޯޑަރުކޮށްގެން ގެނައި އެ ފަރިއްކޮޅުގެ މައްސަލަ ބަލަން ފެށީ އޭގެ އެއް އަހަރު ފަހުންނެވެ.
ފަނޑިޔާރު މަހާޒުގެ ސުލޫކީ މައްސަލައެއް ބަލަން ޖޭއެސްސީއިން ނިންމުމާއި ގުޅިގެން ޖޭއެސްސީއަށްވެސް ފާޑުކިޔުންތައް ވަނީ އަމާޒުވެގެން ގޮސްފައެވެ.
އެގޮތުން އަލީ ހުސެއިން ކުރެއްވި ޓްވީޓުގައި ވަނީ ޖޭއެސްސީއިން ފަނޑިޔާރުންނަށް ނުފޫޒު ފޯރުވާކަމަށް ތުހުމަތުކޮށްފައެވެ.
އަލީ ހުސެއިންގެ އިތުރުންވެސް ގިނަ ބައެއްގެ ފާޑުކިޔުންތައް ޖޭ.އެސް.ސީއަށް އަމާޒުވެފައިވާއިރު، މަހާޒުގެ މައްސަލަ ބަލަން ނިންމީ ސިޔާސީ މަގްސަދެއްގައިކަމަށް ސަރުކާރާއި ވާދަވެރި ޕީޕީއެމްއިންވެސް ވަނީ ބުނެފައެވެ.
އަދި އެއީ މިހާރު ކޯޓުގައި އޮތް ރައީސް ޔާމީންގެ މައްސަލަ ދައުލަތުން ބޭނުންވާ ގޮތަށް ނިންމުމަށް ކްރިމިނަލް ކޯޓުގެ ފަނޑިޔާރަށް ނުސީދާގޮތުން ބިރު ދެއްކުމަށް ކުރި ކަމެއްކަމަށްވެސް އިދިކޮޅުން ވަނީ ސިފަކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
