މާލެ ސިޓީ ކައުންސިލްގެ "އެއްލައްކަ ގަސް" ޕްރޮގްރާމަށް ދަނޑުވެރިންގެ ބޮޑު ތަރުޙީބެއް

މިއަހަރުގެ ޖެނުއަރީ 1 ވަނަ ދުވަހު ފެށިގެން ދިޔަ މާލެ ސިޓީ ކައުންސިލްގެ "އެއްލައްކަ ގަސް" ޕްރޮގްރާމަށް ހައްދާ ގަސްތައް ބެހެއްޓުމަށް ކާނިވާ ސަރަޙައްދުގައި ޤާއިމް ކުރެވުނު ނާސަރީ އައުޓްލެޓް "މާލެ ފެހި" އާންމުންނަށް ހުޅުވާލުމާއިއެކު، ގަސް ހެއްދުމަށް ޝައުޤުވެރިވާ ފަރާތްތަކުގެ އިތުރުން އަތޮޅު ތެރޭގެ ދަނޑުވެރިންގެ ބޮޑު ތަރުޙީބެއް ލިބެމުންދާކަމަށް މާލޭ ސިޓީ ކައުންސިލުން ބުނެފިއެވެ.

މާލެ ސިޓީ ކައުންސިލްގެ ގަސް ކޮމެޓީ އިން އަތޮޅުތަކަށް ކުރައްވަމުންދާ ދަތުރުތަކުގައި ”މާލެ ފެހި“ އައުޓްލެޓަށް ބޭނުންވާ ގަސްތައް އަތޮޅުތެރޭގެ ދަނޑުވެރިންއަތުން ބައްލަވައިގަތުމަކީ ގަސްހައްދާ ފަރާތްތަކަށް ލިބިގެންދާ ހިތްވަރެއްކަމަށާއި، މިއީ މާލެ ސިޓީ ކައުންސިލުން ކުރިއަށްގެންދާ ވަރަށް މުހިންމު ޕްރޮގްރާމެއްގެ ގޮތުގައި ދަނޑުވެރިން ސިފަކުރަމުންދާކަމަށް އެ ކައުންސިލުން ވަނީ ބުނެފައެވެ.

ކައުންސިލްގެ ގަސް ޕްރޮގްރާމަށް ލިބެމުންދާ ތަރުޙީބާއި ގުޅޭގޮތުން ގަސްކޮމެޓީގެ މުޤައްރިރު މާފަންނު ދެކުނު ދާއިރާގެ ކައުންސިލަރު އަބްދުﷲ ނާޞިރު ވިދާޅުވީ މި ޕްރޮގްރާމް ފެށިއިރުވެސް މޭޔަރު މުޢިއްޒު އާއި ކައުންސިލްގެ ވިސްނުމަކީ އަތޮޅުތެރޭގެ ރަށްތަކަށް ޒިޔާރަތްކޮށް އެމީހުންނަށްވެސް މަންފާވާގޮތަށް މިކަން ކުރިއަށްގެންދިއުން ކަމަށެވެ.

ކައުންސިލަރ ނާޞިރު ވިދާޅުވީ "މާލެ ފެހި " ޑިޒައިން ކުރެވިފައި ވަނީ ގަސް ގަންނަ ސެންޓަރެއްގެ ގޮތުގައި ގޮތުގައި ކަމަށާއި، މާލެ ސިޓީ ކައުންސިލްގެ ގަސް ކޮމެޓީއިން އަތޮޅުތެރޭގެ ރަށްރަށުގަ ގަސްހައްދާ ފަރާތްތަކުގެ އަތުން ބަލްކްކޮށް ގަސްތައް ގަންނަމުންދާކަމަށެވެ.

އެއާއެކު ދަނޑުވެރިކަން ކުރާ ފަރާތްތަކަށް އަދި ބަގީޗާގަސްތައް ހައްދާ ފަރާތްތަކަށްވެސް ވަރަށްބޮޑު އުފަލަކަށް މިކަން ވެގެންދިޔަކަމަށާއި، ދަނޑުވެރިންގެ ވަރަށްބޮޑު ތަޢުރީފެއްމިކަމަށް ލިބި ދަނޑުވެރިން ތިބީ އުފަލުން ކަމުގައި އޭނާ ވިދާޅުވިއެވެ.

”ޑިމާން އެބައޮތް. ޙަޤީޤަތުގަ ޑިމާންޑާ އެއްވަރަށް ސަޕްލައި ނުކުރެވޭވަރަށްވެސް އެބައޮތޭ ދެންނެވިދާނެ.ފެށިއިރު އަޅުގަނޑުމެންވެސް ހީކުރީ ވަރަށްބޮޑެތި ގޮންޖެހުން ތަކަކާ ކުރިމަތި ލާންޖެހޭނެ ކަމަށް. އެކަމަކުވެސް އަޅުގަނޑުމެން ހީކުރިވަރަށްވުރެ މާބޮޑުތަރުޙީބެއް މިކަމަށް ލިބެމުންދަނީ. ޓާގެޓަށްވުރެވެސް އިރާދަކުރެއްވިއްޔާ ރަނގަޅު“

ކައުންސިލަރ ނާޞިރު

މިއަހަރުގެ ޖެނުއަރީ 1 ވަނަ ދުވަހު ފެށިގެންދިޔަ މި ޕްރޮގްރާމްގެ ދަށުން މިހާތަނަށް ހިޔާލިބޭ ބޮޑެތި ގަސްތައް ވަނީ މާލޭގެ ބޮޑެތި މަގުތަކުގައި އިންދާފައެވެ. މިއާއިއެކު މާލެ ވަށައިގެން ކަދުރު ރުއްތައް އިންދުމުގެ މަސައްކަތް 24 މެއިގައި ފެށިފައިވާއިރު މި ޕްރޮގްރާމްގެ ދަށުން 200 ކަދުރުރުއް އިންދުމަށް ވަނީ ހަމަޖެހިފައެވެ.