ޕާޓީއެއް ތެރެއިން ނޫނީ ގައުމަށް ޚިދުމަތް ކުރުމުގެ ފުރުސަތު މިހާރަކު ނެތް: ފާރިސް
ޕާޓީއެއް ތެރެއިން ނޫނީ ގައުމަށް ޚިދުމަތް ކުރުމުގެ ފުރުސަތު މިހާރު ނެތް ކަމަށް މޯލްޑިވްސް ރީފޯމް މޫވްމަންޓް (އެމްއާރުއެމް) ގެ ރައީސް ފާރިސް މައުމޫން ވިދާޅުވެއްޖެ އެވެ.
އިލެކްޝަންސް ކޮމިޝަނާއި އެކު ރާއްޖޭގެ ސިޔާސީ މަސްރަހު ހުރި މިސްރާބާއި ގުޅޭގޮތުން މަޝްވަރާ ކުރުމަށް ބޭއްވި ބައްދަލުވުމަށް ފަހު މީޑިއާތަކާއި ބައްދަލު ކުރައްވައި ފާރިސް ވިދާޅުވީ، ރާއްޖޭގައި ގިނަ ސިޔާސީ ޕާޓީތައް ހަރަކާތްތެރި ވި ނަމަވެސް ވޯޓު ލެވޭ ޒުވާން އުމުރުގެ ގިނަ މީހުންނަކީ އެއްވެސް ޕާޓީއަކަށް ނިސްބަތްވާ ބައެއް ނޫން ކަމަށެވެ. އަދި އެފަދައިން ކަންވަނީ ސިޔާސީ ކަންކަން ހިނގާ ގޮތުން ކަމަށްވެސް އޭނާ ވިދާޅުވިއެވެ.
"ޕާޓީ ތަކުގެ ތެރެއިން ނޫން ގޮތަކަށް ގައުމަށް ޚިދުމަތް ކުރެވޭނެ މަގު މިހާރު ހުޅުވިފައި ނެތަތީވެ ގައުމަށް ވަރަށް ބޮޑު ގެއްލުންތަކެއް ވެގެންދާ ކަމަށް އަޅުގަނޑަށް ގަބޫލު ކުރެވޭ. އަޅުގަނޑު ގަބޫލުކުރާ ގޮތުގައި ދިވެހިރައްޔިތުންގެ ތެރޭގައި އެބަތިބި ވަރަށް ގަދީމީ، ވަރަށް ގާބިލް ކަމަށް އެކަށީގެންވާ މީހުން. ދައުލަތުގެ ކަންކަން ނިންމަންތިވޭ އެންމެ އިސް މީހުންނަށް، އެންމެ އިސްފަރާތަކަށް ވާންޖެހޭނީ ގައުމުގެ އެންމެ ގާބިލް މީހުން ކަމަށް އަޅުގަނޑަށް ގަބޫލު ކުރެވޭ." ފާރިސް ވިދާޅުވިއެވެ.
ކަން މިހެން ހުރި ނަމަވެސް ސިޔާސީ ކަންކަމުގެ ސަގާފަތް މިހާރު އޮތް ގޮތުން ކަންކަމަށް ގާބިލް ގިނަ ބަޔަކުވަނީ ގައުމަށް ހިދުމަތް ކުރުމުގެ ފުރުސަތުން މަހުރޫމްވެފައި ކަމަށްވެސް އޭނާ ވިދާޅުވިއެވެ.
އެހެންކަމުން، އެހެންވީމަ ސިޔާސީ ޕާޓީތަކާއި އެކު، ނުވަތަ ސިޔާސީ ކަންކަމުގައި ހަރަކާތްތެރިވާން ބޭނުން ނުވާ މީހުންނަށް ވެސް ގައުމަށް ޚިދުމަތް ކުރެވޭނެ މަގެއް ހޯދުމަށް އެމްއާރުއެމުން މަސައްކަތް ކުރަމުންދާ ކަމަށް އޭނާ ވިދާޅުވިއެވެ.
މިއާއެކު ފާރިސް ވިދާޅުވީ، މިއަދު ކުރިއެރުމެއް ނުވަތަ ވަޒީފާއެއް ލިބެން އޮތީ ސިޔާސީ ޕާޓީއަކާއި ގުޅިގެންކަމަށް ގިނަ ބައެއްގެ ވިސްނުމަށް އަންނަން ފަށާފައިވާކަމަށާ، ބައެއް މީހުން ވަރަށް ފާޅުގައި އިންތިޒާމުތައް ހަމަޖެހޭނީ ވަކި ޕާޓީއަކާއި ގުޅިގެންކަމަށް ބުނާތަންވެސް ފެންނަމުންދާ ކަމަށެވެ.
"ތިމަންނަމެން ޕާޓީ މީހުންނަށް އެކަންޏޭ ވަޒީފާއެއް ލިބޭނީ… ތިމަންނަމެން ޕާޓީ މީހުންނަށް އެކަންޏޭ ސްކޮލަޝިޕެއް ލިބޭނީ.. ތިމަންނައަށޭ ދައުލަތުގެ ކޮންޓްރެކްޓެއް ލިބޭނީ… ވަކިކަމެއް ވާނީ ޕާޓީއަށް ސޮއި ކުރީމައޭ.. ނޫނީ ވަކި އަދަދަކަށް ފޯމު ގެނައީމައޭ.. މިކަހަލަ އުސޫލެއް ގާއިމުވެ، މި ނޫން ގޮތަކަށް ކަން ނުހިނގާނެކަމަށް މީހުން ގަބޫލު ކުރަން ފަށައިފި" ފާރިސް ވިދާޅުވިއެވެ.
މިފަދައިން ކަން ހުރުމުން، ހިމާޔަތް ކުރެވެނީ ސިޔާސީ މީހުން އެކަނި ކަން ފާހަގަކުރައްވައި ފާރިސް ވަނީ ރައްޔިތުންނަށް ހަމަހަމަ ގޮތެއްގައި ހިދުމަތް ދިނުމުގެ ވިސްނުން ބެހެއްޓުމަށް ގޮވާލާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
