ސްރީލަންކާގެ ކުރީގެ ރައީސުންނަށް ދައުލަތުން ކުރާ ބޮޑެތި ހޭދަތައް އެންމެފަހުން ނިމުމަކަށް

އަވައްޓެރި ސްރީލަންކާގެ ކުރީގެ ރައީސުންނަށް ދައުލަތުގެ ބައިތުލްމާލުން ކުރާ ބޮޑެތި ހޭދަތައް އުނިނުކުރުމަށް ހުށަހަޅާފައިވާ ބިލް އެންމެފަހުން ޤާނޫނު ހަދާ މަޖިލީހުން ފާސްކޮށްފިއެވެ.

މަޖިލީހުން މި ބިލް ފާސްކުރީ އެންމެ މެމްބަރެއް ފިޔަވައި ދެންތިބި މެމްބަރުންގެ ފުރިހަމަ ތާއީދު ލިބިގެންނެވެ. މަޖިލީހުން މި ބިލް ފާސްކުރުމުން ސްރީލަންކާގެ މާލިއްޔާއިން ކުރީގެ ރައީސުންގެ ދިރިއުޅުމަށް ދޭ އިނާޔަތްތަކުގެ ތެރެއިން ބޮޑުބައެއް ނިމުމަކަށް އަންނާނެއެވެ. އެގޮތުން އެންމެ ފާހަގަކޮށްލެވެނީ ކުރީގެ ރައީސުން ދިރިއުޅުމަށް ދެއްވާފައިހުރި ގެތަކުން އެބޭފުޅުން ނިކުންނަން ޖެހުމެވެ. މީގެ އިތުރުން އެބޭފުޅުންގެ ދަތުރުފަތުރަށް މިހާރު ކުރަމުން އަންނަ ހޭދަތަކާއި އޮފީސްތައް ހިންގުމަށް ދެމުން އަންނަ އިނާޔަތްތައްވެސް އުނިވެގެންދާނެއެވެ.

ސްރީލަންކާގެ މިހާރުގެ ސަރުކާރުން ބުނާގޮތުގައި ކުރީގެ ރައީސުންގެ ދިރިއުޅުއްވުމުގެ ހަރަދުތަކަށް މިހާރުވެސް އެޤައުމުގެ މާލިއްޔަތުން ބިލިއަނަށްވުރެ ގިނަ ރުޕީސް ހޭދަވެއެވެ. ފާސްކުރި ބިލުގެ ސަބަބުން ކުރީގެ ރައީސުންނަށް ކުރަމުންއައި ހޭދަތައް ދައުލަތުގެ ބަޖެޓްގައި ހިފެހެއްޓި އަދި އެބޭފުޅުން ދިރިއުޅުއްވަމުން އައި ގެކޮޅުތައް އުފެއްދުންތެރިގޮތުގައި ކުއްޔަށް ދެވިގެންދާނޭކަމަށް ލަންކާ ސަރުކާރުން ވަނީ ބުނެފައެވެ.

ކުރީގެ ރައީސުންގެ ދިރިއުޅުއްވުމުގެ ހަރަދުތަކުން ބޮޑުބައެއް ފާސްކުރި ބިލާއެކު އުނިވެގެން ދިޔަނަމަވެސް ރައީސުންނަށް ޤާުނޫނީގޮތުން ލިބިދޭ ޕެންޝަނުގެ ފައިސާ ކުރިއެކޭ އެއްގޮތަށް ލިބެމުންދާނެއެވެ.

މާލީގޮތުން ލަންކާއަށް ދަތިދުވަސްތަކެއް ކުރިމަތިލާން ޖެހިފައިވާއިރު، އެޤައުމުން ދަނީ ބައިނަލްއަޤްވާމީ މާލީ އިދާރާތަކުގެ އިރުޝާދުތަކާއެކު ހަރަދުތައް ކުޑަކުރުމަށް ފިޔަވަޅުތައް އަޅަމުންނެވެ.