ވެމްކޯ ދޮރުމައްޗަށް ކުނި އެޅުމަށްފަހު ބާބާ ގާޑިޔާއިން މައާފަށް އެދިއްޖެ

މުޅި ރާއްޖެއަށް މަޝްހޫރު ބާބާ ގާޑިޔާއިން، ފުވައްމުވައް ސިޓީގައި ހުންނަ ވެމްކޯ އޮފީސް ދޮރުމައްޗަށް ކުނި އެޅުމަށްފަހު، އެކަމާ މައާފަށް އެދިއްޖެއެވެ.

އާއްމުންގެ މީހަކު ރޭ ފޭސްބުކްގައި ހިއްސާކުރި ވީޑިއޯއެއްގައި ވަނީ، ބާބާ ގާޑިޔާގެ ވެރިޔާ އަދި އަމަލީގޮތުން ގާޑިޔާ ހިންގުމުގައި ހަރަކާތްތެރި ވަމުންދާ ހަސަން އަތީގް، އެރަށު ވެމްކޯ އޮފީސް ނަންބޯޑު ކުރިމައްޗަށް ކުނި އަޅާތަނެވެ.

ފޭސްބުކްގައި ވެމްކޯ ޓެގް ކުރަމުން ޕޯސްޓުކޮށްފައިވާ އެ ވީޑިއޯ ޕޯސްޓުކުރި މީހާ ބުނެފައި ވަނީ، ބާބާ ގާޑިޔާއިން ކުނި ނުނަގާތީ ވެމްކޯއަށް ދިން އިންޒާރާ އެއްގޮތަށް ވެމްކޯ އޮފީސް ދޮރުމައްޗަށް ކުނި އަޅައިފި ކަމަށެވެ.

ހިތްހަމަ ނުޖެހިފައި ހުރެ، ވެމްކޯ ދޮރުމައްޗަށް ކުނި އަޅަމުން، އަތީގް ވަނީ ހިތްހަމަ ނުޖެހުން ފާޅުކޮށްފައެވެ. ފުވައްމުލަކު ބަހުން ވާހަކަ ދައްކަމުން އަތީގް ބުނާ ގޮތުން، ބާބާ ގާޑިޔާއިން ކުނި ގެންދަން ޖެހެނީ އަބަދު ގުޅައި ބުނެގެން ކަމަށާއި، ނަމަވެސް ކުނި ނަގަން ބަރާބަރަށް ފައިސާ ދައްކާ ކަމަށެވެ.

ކޮންމެ ހަފްތާއެއްގެ ބުދަ ދުވަހަކީ ކުނި ނަގަންޖެހޭ ދުވަސް ކަމަށާއި އެދުވަހު ކުނި ނުނަގާ ކަމަށާއި އަދި ބުރާސްފަތި ދުވަހަކީވެސް ކުނި ނަގަންޖެހޭ ދުވަސް ކަމަށްވީ ނަމަވެސް އެދުވަހުވެސް ކުނި ނުނަގާ ކަމަށް އަތީގް ބުނެއެވެ. އަދި ހޮނިހިރު ދުވަސް އައިިރުވެސް ކުނި ނުނަގާތީ ކުނިތައް ހިފައިގެން ގޮސް ވެމްކޯ ކުރިމައްޗަށް އެޅީ ކަމަށް ވީޑިއޯގައި އޭނާ ބުނެއެވެ.

އެކަމާ ގުޅިގެން އަތީގް މިއަދު ފޭސްބުކްގައި ވަނީ، އޭނާގެ ކަސްޓަމަރުންގެ ކިބައިން މައާފަށް އެދިފައެވެ.

އަތީގް ބުނީ، ރޭ އެފަދައިން ކަންތައް ކުރެވުނީ 'ފްރަސްޓްރޭޓް' ވެފައި ހުރި ވަރުން، ކެތް ނުވެގެން ކަމަށެވެ. އަދި އެފަދަ ކަމެއް ދެވަނަ ފަހަރު ތަކުރާރު ނުވާނެ ކަމުގެ ޔަގީންކަން ދޭ ކަމަށް އަތީގް ބުންޏެވެ.

މީގެ އިތުރުން، ވެމްކޯގެ ކިބައިންވެސް މާފަށް އެދެމުން އަތީގް ބުނެފައި ވަނީ، ބާބާ ގާޑިޔާއިން ބަރާބަރަށް ކުނި ގެންދިއުމަށް ވެމްކޯއަށް ނަސޭހަތްތެރިވާ ކަމަށެވެ.

ކޮވިޑް-19 ގެ ކުރިން ރިސޯޓެއްގެ ފުޑްއެންޑް ބެވަރޭޖް ދާއިރާގައި މަސައްކަތް ކުރި އަތީގް، އޭނާގެ އަމިއްލަ ވިފަޔާރިއެއް ކަމަށްވާ ބާބާ ގާޑިޔާގެ ހިދުމަށް ފަށައިގަތީ މިދިޔަ އަހަރުއެވެ. ކުޑަ ދުވަސްކޮޅެއްގެ ތެރޭގައި ފުވައްމުލަކާއި މުޅި ރާއްޖެއަށް މަޝްހޫރުވެގެން ދިޔަ ބާބާ ގާޑިޔާއަށް އެކި ފަންތީގެ މީހުން ޒިޔާރަތް ކުރެއެވެ. ރައީސް އިބްރާހިމް މުހައްމަދު ޞާލިހު ފުވައްމުލަކަށް ކުރެއްވި ދަތުރުގައިގެސް ބާބާ ގާޑިޔާއަށް ޒިޔާރަތް ކޮށްފައިވެއެވެ.