މާލޭގެ ރައްޔިތުންނަށް ވަޢުދުވީ 5000 ގޯތި މިއަހަރު މެދުތެރޭގައި ހަވާލުކުރާނަން: ރައީސް

މާލޭގެ ރައްޔިތުންނަށް މި ސަރުކާރުން ދޭން ވަޢުދުވެފައިވާ 5000 ގޯތި މިއަހަރުގެ މެދުތެރޭގައި ޙަވާލުކުރައްވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.

އެމް.ޑީ.ޕީގެ ޕްރައިމަރީ އިންތިޚާބުގެ ކެމްޕެއިންގައި ނ. ވެލިދޫގައި ރޭ ބޭއްވި ޖަލްސާގައި ވާހަކަފުޅުދައްކަވަމުން ރައީސް ޞާލިޙު ވިދާޅުވީ، ބޯހިޔާވަހިކަމުގެ ވަޢުދަކީ މި ސަރުކާރުން ވީ އެންމެ ބޮޑު ވަޢުދުކަމަށާ އެ ވައުދާއި އެއްގޮތަށް 16،000 އަށްވުރެ ގިނަ ބޯހިޔާވަހިކަމުގެ މަޝްރޫޢުތައް ރާއްޖޭގެ އެކި ކަންކޮޅުތަކުގައި ކުރިއަށްދާކަމަށެވެ.

އެގޮތުން މާލޭ ސަރަޙައްދުގައި އެކަނިވެސް 8782 ފްލެޓާއި 5000 ގޯތި ދިނުމުގެ އަމަލީ މަސައްކަތް ކުރިއަށްދާކަން ފާހަގަކުރައްވައި ރައީސް އިތުރަށް ވިދާޅުވީ މި ސަރުކާރުން މާލޭގެ ރައްޔިތުންނަށް ވީ ވަޢުދާ އެއްގޮތަށް 5000 ގޯތި ކަނޑާ، އިން ވަކިކޮށް މިއަހަރުގެ މެދުތެރޭ ޙަވާލުކުރައްވާނެކަމަށެވެ.

"މާލޭ ސަރަޙައްދުގައި އެކަނި 8782 ފްލެޓާއި 5000 ގޯތި ދިނުމުގެ އަމަލީ މަސައްކަތް އިރާދަކުރެއްވިއްޔާ އެ ދަނީ ކުރިއަށް. މިއަހަރުގެ މެދުތެރެއަށް އަންނައިރު މާލޭގެ ރައްޔިތުންނަށް އަޅުގަނޑުމެން ވީ ވަޢުދާއެއްގޮތަށް 5000 ގޯތި ކަނޑާ، އިން ވަކިކޮށް އަޅުގަނޑުމެން ޙަވާލުކުރާނަން" ރައީސް ވިދާޅުވިއެވެ.

ރައީސް ޞާލިހު ބައިވެރިވެ ވަޑައިގެން މާލޭގައި ބޭއްވި ކެންޕެއިން ޖަލްސާގައިވެސް އެމަނިކުފާނު ވަނީ މާލެ ސަރަހައްދުގައި 8،782 ފްލެޓުގެ އަމަލީ މަސައްކަތް ހިނގަމުންދާ ކަމަށް ވިދާޅުވެފައެވެ.

އަދި މާލޭގެ ރައްޔިތުންނަށް 5،000 ގޯތި ދިނުމަށްޓަކައި ވެވަޑައިގަތް ވައުދު ވެސް ފުއްދަވާނެ ކަމުގެ ޔަގީން ކަން އެމަނިކުފާނު ދެއްވަމުން އެކަން އެމަނިކުފާނު ކުރަށްވާނީ "ކުރެންދޫ ރައްޔިތުންނަށް ކަނޑުން އެއްހާސް ގޯތި ދިން ގޮތަކަށް ނޫން" ކަމަށް ވިދާޅުވެ ރައީސް ނަޝީދަށް، ރައީސް ޞާލިހް ވަނީ ފާޑުވިދާޅުވެފައެވެ.