އިދިކޮޅުގެ މުޒާހަރާގައި އަނިޔާވި ޒުވާނެއްގެ ހާލު ގޯސްވެ އަދިވެސް އޮތީ އެޑްމިޓްކޮށްފަ!
ކުރީގެ ރައީސް ޔާމީން އަބްދުލްގައްޔޫމު މިނިވަންކުރުމަށް ގޮވާލާ އިއްޔެ މާލޭގައި ކުރިއަށް ގެންދިޔަ މުޒާހަރާ ރޫޅާލުމަށް ފުލުހުން ހާލަތާއި ނުބައްދަލު ބާރުގެ ބޭނުން ކުރުމުގެ ތެރެއިން އަނިޔާވި ޒުވާނަކަށް އަދިވެސް ހޮސްޕިޓަލުގައި ފަރުވާދެމުން ދާކަން ހާމަވެއްޖެ އެވެ.
މުޒާހަރާގެ ތެރެއިން ފުލުހުންގެ ފަރާތުން ލިބުނު އަނިޔާތަކަށް ފަރުވާކުރުމަށް އެ ޒުވާނާ ވަނީ އިއްޔެ އޭޑީކޭ ހޮސްޕިޓުގައި އެޑުމިޓުކޮށްފަ އެވެ. އަދިވެސް އޭނާގެ ހާލު ރަނގަޅު ނުވާތީ ހޮސްޕިޓަލުގައި ދަނީ ފަރުވާދެމުން ނެވެ.
އިއްޔެ އިދިކޮޅުން ކުރިއަށް ގެންދިޔަ މުޒާހަރާ ރޫޅާލުމަށް ފުލުހުން ވަނީ ހާލަތާއި ނުބައްދަލު ބާރުގެ ބޭނުންކޮށްފަ އެވެ. އެގޮތުން މުޒާހަރާގެ ބައިވެރިންގެ މޫނާ ގާތުން ޕެޕާ ސްޕްރޭ ޖެހުމާއި، ފުލުހުންގެ ޝީލްޑުތަކުން މުޒާހަރާގެ ބައިވެރިންގެ ގައިގައި ތަޅާ ކޮށްޕުން ފަދަ ހަރުކަށި އަމަލުތައް ފުލުހުން ވަނީ ހިންގާފަ އެވެ.
ފުލުހުންގެ ފަރާތުން ލިބުނު އަނިޔާތަކަށް ފަރުވާދިނުމަށް 5 މީހުން ހޮސްޕިޓަލުގައި އެޑުމިޓުކުރަން ޖެހުނެވެ.
އޭގެ ތެރޭގައި ޗެނަލް-13 ގެ ނޫސްވެރިއަކުވެސް ހިމެނެއެވެ. އަނިޔާވި ނޫސްވެރިޔާއަށް އިތުރު ފަރުވާދިނުމަށް ރޭގެ ވަގުތެއްގައި ވަނީ ލަންކާއަށް ފުރުވާލާފައެވެ.
އިއްޔެގެ މުޒާހަރާ ރޫޅާލުމަށް ފުލުހުން އަމަލުކޮށްފައިވާ ގޮތް ޓްރާންސްޕޭރެންސީ މޯލްޑިވްސްއިންވަނީ ކުށްވެރިކޮށްފަ އެވެ. އަދި މުޒާހަރާ ރޫޅާލުމަށް ހާލަތާއި ނުބައްދަލު ބާރުގެ ބޭނުންކޮށް، ނޫސްވެރިންނަށް ހުރަސްއެޅި މައްސަލަ ސިޔާސީ ޕާޓީތަކުންވެސް ވަނީ ކުށްވެރިކޮށްފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
