މާލެއިން ގޯތި ދޫކުރާނެ މީހުންގެ ވަކި ލިސްޓެއް ނޯންނާނެ: އަސްލަމް

މާލެ ސަރަހައްދުން ގޯތި ދޫކުރާނެ ވަކި މީހުންތަކެއްގެ ލިސްޓެއް އެކުލަވާލާފައި ނޯންނާނެކަމަށާއި، ގޯތި ދޫކުރާނީ އޭގެ ހައްގުވެރިންނަށް ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.

އަސްލަމް މިފަދައިން ވިދާޅުވެފައިވަނީ ނިމިދިޔަ އެމްޑީޕީގެ ރިޔާސީ ޕްރައިމަރީއާއި ދިމާކޮށް ސަރުކާރަށް ތާއީދު ކުރައްވާ ބައެއް މަޖިލިސް މެމްބަރުން އެ މޭރުމުން ވާހަކަފުޅު ދައްކަވާފައިވާއިރު، ގޯތި ދޫކުރުމުގެ ކަންކަން އޮތް ގޮތެއް ސާފުކޮށްދެއްވުމަށް މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި) މިނިސްޓަރުގެ އަރިހުން އެއްސެވުމުން، އެ ސުވާލަށް މަޖިލީހުގައި ޖަވާބުދެއްވަމުން ނެވެ.

"ރައްޔިތުންނަށް ބޯހިޔާވަހިކަން ދިނުމުގައި ސަރުކާރަށް ނިސްބަތްވެވަޑައިގަންނަވާ ރައްޔިތުންގެ މަޖިލީހުގެ ބައެއް އިއްޒަތްތެރި މެމްބަރުން މާލެތެރޭގައި ޚަބަރު ފަތުރުއްވަމުން ގެންދަވާ އެބޭފުޅުން ގެންގުޅުއްވާ ވަކި ލިސްޓަކަށް އެކަން ކުރައްވާނެކަމަށް، އެއީ ތޯ ސަރުކާރުން ނިންމަވާފައިވާ ގޮތަކީ؟

މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ

އިންތިގެ ސުވާލަށް ޖަވާބުދެއްވަމުން މިނިސްޓަރު އަސްލަމް ވިދާޅުވީ މާލެ ސަރަހައްދުން ގޯތި ދޫކުރާނެ މީހުންގެ ލިސްޓެއް ނޯންނާނެކަމަށެވެ. އަދި މެމްބަރުން އެފަދައިން ޚަބަރު ފަތުރުއްވަމުންދާކަން މިނިސްޓްރީގެ ސަމާލުކަމަށްވެސް މީގެ ކުރިން އައިސްފައި ނުވާކަމަށެވެ.

އަސްލަމް އިތުރަށް ވިދާޅުވީ މެމްބަރުން އެފަދައިން ވާހަކަދެއްކެވި ނަމަވެސް ދުރާލާ ލިސްޓެއް ހަދައިގެން، އެ ލިސްޓަށް ގޯތި ދޫކުރާ އުސޫލުން މިނިސްޓްރީއިން އަމަލުކުރަމުން ނުދާނެކަމުގެ ޔަގީންކަން ދެއްވާކަމަށެވެ.

"ވަކި ބޭފުޅުންކޮޅެއް ބޭނުންވާ ލިސްޓެއް ނޯންނާނެ. އަޅުގަނޑަކަށް ނޭނގޭ ބޭފުޅުން އެގޮތަށް ވާހަކަދައްކަވާ ކަމެއްވެސް، އަދި އަޅުގަނޑަށް އެކަން އެނގުފައެއްވެސް ނެތް. އެކަހަލަ ވާހަކައެއް އަޑެއްވެސް ނާހަން. އަދި އެފަދަ ވާހައެއް ބޭފުޅަކު ދެއްކެވި ކަމުގައި ވިޔަސް، އެއީ ހަގީގަތެއް އޮތް ވާހަކައެއް ނޫން. އަދި ތިޔަ ނިސްބަތްކުރެއްވި އިއްޒަތްތެރި މެމްބަރު ނޫން އެހެން ބޭފުޅަކު އެވާހަކަ ދެއްކެވި ކަމުގައި ވިޔަސް އެއީ ހަގީގަތެއް ނޫން"

ޕްލޭނިން މިނިސްޓްރު އަސްލަމް

ސަރުކާރުން ވަނީ މާލެ ސަރަހައްދުން 5000 ގޯތި ދޫކުރުމަށް ނިންމާފަ އެވެ. އެއީ ހުޅުމާލެއިން 1000 ގޯއްޗާއި ގުޅިފަޅާއި ގިރާވަރުފަޅު ހިއްކައިގެން ކޮންމެ ތަނަކުން 2000 ގޯއްޗެވެ.

މިއަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވަނީ މާލެ ސަރަހައްދުން ދޫކުރާ ގޯތީގެ އަދަދު އިތުރުކުރުމަށް ސަރުކާރުން ނިންމާފައިވާކަން އިއުލާނުކޮށްފަ އެވެ.

މާލެ ސަރަހައްދުން ގޯތި ދޫކުރުމަށް ސަރުކާރުން ނިންމާފައިވާއިރު، އެކަށިގެންވާ އުސޫލުތަކެއް ކަނޑައަޅާފައި ނުވާކަމަށާއި، މިހާރުވެސް އެ މަޝްރޫއުއާއި ގުޅިގެން ކޮރަޕްޝަންގެ ބޮޑެތި ތުހުމަތުތަކެއް ކުރެވެމުންދާތީ ބޯހިޔާވަހިކަން ކަށަވަރުކޮށްދިނުމަށް މަސައްކަތް ކުރަމުން އަންނަ އާންމުންގެ ޖަމުއިއްޔާއިންވެސް ވަނީ ކަންބޮޑުވުން ފާޅުކޮށްފަ އެވެ.

އެތައް ބަޔެއްގެ ހައްގު އޭގައި އެކުލެވޭ ބިންތައް ހޮވާލެވޭ މަދު ބަޔަކަށް ބެހުމާއި ދެކޮޅަށް ރައްޔިތުން ތެދުވުމަށް އެ ޖަމުއިއްޔާއިން ވަނީ ގޮވާލާފަ އެވެ.