ޖަލަށް ވަޑައިގަތުމުގެ ކުރިން އާއިލާއާއި ސަލާންކޮށްލުމުގެ ފުރުސަތު ރައީސް ޔާމީނަށް ނުދިނީ އިމްރާނުގެ އޯޑަރަށް: ޝިޔާމު

ވ އާރަށުގެ މުއާމަލާތާއި ގުޅުވާ ޕީޕީއެމްގެ ރައީސް ޔާމީން އަބްދުލްގައްޔޫމުގެ މައްޗަށް ކުރި 11 އަހަރުގެ ޖަލުހުކުން ތަންފީޒުކުރެއްވުމަށް ޖަލަށް ވަޑައިގަތުމުގެ ކުރިން އެމަނިކުފާނުގެ އާއިލާއާއި ބައްދަލުކޮށްލާ ސަލާމްކުރުމުގެ ފުރުސަތު ނުދެއްވީ ހޯމް މިނިސްޓަރު އަދި ސަރުކާރުގެ ކޯލިޝަން ޕާޓުނަރު، އަދާލަތު ޕާޓީގެ ރައީސް އިމްރާނު ގެ އޯޑަރަށްކަމަށް މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެ އެވެ.

ޝިޔާމު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގައި ވާހަކަދައްކަވަމުން ނެވެ.

އޭނާ ވިދާޅުވީ ދިގު މުއްދަތަކަށް ޖަލު ހުކުމެއް ތަންފީޒުކުރަން ޖެހޭނަމަ، ޖަލަށް ދިއުމުގެ ކުރިން އާއިލާއާއި ބައްދަލުކޮށް ސަލާންކޮށްލުމުގެ ފުރުސަތު ކޮންމެ މީހަކަށްވެސް ލިބިގެންދާކަމަށެވެ. އެއީ ދުނިޔޭގެ އެންމެ ތަހުޒީބު ގައުމުތަކުގައިވެސް އަމަލުކުރަމުންދާ ގޮތް ކަމަށެވެ.

ރައީސް ޔާމީނަކީ ދިވެހިރާއްޖޭގައި ރައްޔިތުންގެ ވެރިކަމެއް ކޮށްދެއްވާ، ރާއްޖޭގައި ތަރައްގީގެ ގިނަ ޚިދުމަތްތަކެއް ކޮށްދެއްވާފައިވާ އަދި ރާއްޖޭގެ ރައީސުލްޖުމްހޫރިއްޔާކަމުގެ މަގާމު އަދާކުރައްވާފައިވާ ބޭފުޅަކަށްވާއިރު، އެމަނިކުފާނުގެ މައްޗަށް ނުހައްގުން ހުކުން އިއްވި ނަމަވެސް، ޖަލަށް ވަޑައިގަތުމުގެ ކުރިން އާއިލާއާއި ބައްދަލުކޮށްލުމުގެ ފުރުސަތު ލިބެން ޖެހޭނެކަމަށް ޝީޔާމު ވިދާޅުވިއެވެ.

އެކަން ފާހަގަކުރައްވާ ޝިޔާމު ވިދާޅުވީ، ރައީސް ޔާމީނަށް އާއިލާއާއި ބައްދަލުކޮށްލުމުގެ ފުރުސަތަށް ހުރަސް އެޅީ ހޯމް މިނިސްޓަރު އިމްރާނު ކަމަށެވެ. އަދި އެ ފުރުސަތު އެމަނިކުފާނަށް ނުދެއްވުމަށް އިމްރާނު އޯޑަރުކުރި ކަމަށް ޝިޔާމު ތުހުމަތު ކުރެއްވި އެވެ.

"އެމަނިކުފާނުގެ އާއިލާއާއި ސަލާންކޮށްލަން ހުކުން ޖެހުމަށްފަހު ވަގުތެއް ނުދިނޭ. އިމުރާނު ބުނެގެނޯ! ހޯމް މިނިސްޓަރު އިމުރާނުކަމަށް ވަނީ ގުޅީ.. ގުޅާފަ ބުނީ ރައީސް ޔާމިނަށް އެމަނިކުފާނުގެ އާއިލާއާއި ސަލާންކޮށްލުމުގެ ފުރުސަތުވެސް ދޭނެކަމެއް ނެތޭ.. މިއީ އޯގާތެރި ސަރުކާރުގެ ވަޒީރުންގެ ފެންވަރުތޯ؟"

ނައިފަރު ދާއިރާގެ މެމްބަރު އަހުމަދު ޝިޔާމު

ޝިޔާމު ވިދާޅުވީ މި ސަރުކާރުން ރައީސް ޔާމީނަށް އަނިޔާކުރަމުން ދަނީ ޒާތީ ތައައްސުބުގެ ތެރެއިން ކަމަށެވެ.

އެހެންކަމުން އޯގާތެރިކަމާއި އިންސާނިއްޔަތުގެ ވާހަކަ ދައްކަން ސަރުކާރުން މިހާރު ލަދުގަންނަން ޖެހޭ ކަމަށް އޭނާ ވިދާޅުވި އެވެ.

ރައީސް ޔާމީނުގެ މައްޗަށް ފުލުފުލުގައި އުފުލަމުން ދަނީ ސިޔާސީ ދައުވާތަކެއް ކަމަށާއި، އެމަނިކުފާނުގެ މައްޗަށް މިދިޔަ ޑިސެމްބަރު މަހުގެ 25 ވަނަ ދުވަހު ކްރިމިނަލް ކޯޓުން އިއްވި ހުކުމަކީވެސް ސިޔާސީ ނުފޫޒު ފޯރުވައިގެން އިއްވި "ހަރާން" ހުކުމެއްކަމަށް ޝިޔާމު ވިދާޅުވިއެވެ.