ދެ ރައީސުންގެ މައްސަލަ ހުށައެޅީ ފައިސަލްއަށް ވެރިކަން ހޯދައިދޭކަށް ނޫން: އިދިކޮޅު

ރާއްޖޭގައި ހުވާ ކޮށްގެން ތިއްބެވި ދެ ރައީސުން ތިބި ކަމަށާ އެކަމާއި ގުޅިގެން އުފެދިފައިވާ ގާނޫނީ މައްސަލައަށް ހައްލެއް ހޯދަން އެ މައްސަލަ ސުޕްރީމް ކޯޓަށް ހުށައެޅީ ފަހަރެއްގައިވެސް ވެރިކަން ބަދަލުކޮށް ފައިސަލް ނަސީމަށް ވެރިކަން ހޯދައިދޭން ނޫންކަމަށް އިދިކޮޅު އިއްތިހާދުން ބުނެފި އެވެ.

ދެ ރައީސުންގެ މައްސަލައަށް ހައްލެއް ހޯދައިދިނުމަށް ސުޕްރިމް ކޯޓަށް ހުށައެޅި މައްސަލަ އެ ކޯޓުން ބޭރުކޮށްލުމާއި ގުޅިގެން އިދިކޮޅުން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އިދިކޮޅު އިއްތިހާދުގައި ހިމެނޭ ޕީއެންސީގެ ނައިބުރައީސް އާދަމް ޝަރީފު ވިދާޅުވީ ހުވާކޮށްގެން ދެ ރައީސުން ތިބުމަކީ ގާނޫނީ ގޮތުން ބޮޑު ފުށުއެރުންތަކެއް އޮތް މައްސަލައެއް ކަމަށެވެ.

މިހާރު މި މައްސަލައަށް ގާނޫނީ ހައްލެއް ހޯދާނުދެވިއްޖެ ކަމަށްވާނަމަ ކުރިއަށް އޮތް ތަނުގައި، އެފަދަ އެތައް މައްސަލައެއް ފެންމަތިވެގެން ދިއުމަކީވެސް އެކަށީގެންވާ ކަމެއްކަމަށް އާދަމް ޝަރީފު ވިދާޅުވިއެވެ.

އޭނާ ވިދާޅުވީ އިދިކޮޅުގެ މަގްސަދަކީ ވެރިކަން ބަދަލުކުރުން ނޫން ކަމަށެވެ. އަދި އިދިކޮޅުން މަސައްކަތް ކުރަނީ ގާނޫނީ ގޮތުން ހެދިފައި މިވާ ގޯސް ގާނޫނީ އިމުގެ ތެރެއިން ރަނގަޅުކޮށް މުސްތަގުބަލުގައި މިފަދަ ކަމެއް ތަކުރާރުވިޔަ ނުދިނުމަށްކަމަށެވެ.

"އަޅުގަނޑުމެން މި އުޅެނީ ފަހަރެއްގައިވެސް ފައިސަލް ނަސީމަށް ރާއްޖޭގެ ވެރިކަން ހޯދައިދޭކަށް ނޫން، ނުވަތަ ރައީސުލްޖުމްހޫރިއްޔާ އެ މަގާމުން ވަކިކުރާކަށް ނޫން. އެހެން ނަމަވެސް އަޅުގަނޑުމެން ގަބޫލުކުރާ ގޮތުގައި ގާނޫނީ ގޮތުން ރައީސުލްޖުމްހޫރިއްޔާގެ ނައިބު ކުރައްވަން ޖެހިވަޑައިނުގަންނަވާ ހުވައެއް ރައްޔިތުންގެ މަޖިލީހުގެ ރައީސްއާއި އަދި އުއްތަމަ ފަނޑިޔާރާއި ދެބޭފުޅުން މެދުވެރިކޮށް އެ ހުވާ ރައީސުލްޖުމްހޫރިއްޔާގެ ނައިބަށް ކޮށްފަ އޮތުމަކީ އެއީ އަޅުގަނޑުމެން ދެކޭގޮތުގައި ދުސްތޫރީ ސީރިއެސް މައްސަލައެއް"

ޕީއެންސީގެ ނައިބުރައީސް އާދަމް ޝަރީފް

ދެ ރައީސުންގެ މައްސަލަ ސުޕްރިމް ކޯޓުން ބޭރުކޮށްލުމަކީ ވަރަށް ބޮޑު ކަންބޮޑުވުމެއްގެ ގޮތުގައި ވާދަވެރި ސިޔާސީ ޕާޓީން ފާހަގަކުރެއެވެ.

މި ދައުރުގައި އެ މައްސަލައަށް ގާނޫނީ ފަރުވާއެއް ނުލިބިއްޖެ ނަމަ ޕީީޕީއެމްގެ ވެރިކަމެއްގައި އެ މައްސަލަ ބަލާނެކަމަށް އެ ޕާޓީން ވަނީ ބުނެފަ އެވެ.