ޠާރިގު, ގާޒީ ޝަކީލަށް: ހަމަސް ފަހުން މަގާމު ގެއްލޭނެ؛ ޖިނާއީ ތަހްގީގާ ވެސް ކުރިމަތިލާންޖެހޭނެ

ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް އަބްދުالله ޔާމީންގެ މައްޗަށް ކްރިމިނަލް ކޯޓުން 11 އަހަރުގެ ޖަލު ހުކުމެއް އިއްވިއިރު މައްސަލަ ބެއްލެވި ގާޟީ އަހްމަދު ޝަކީލް, ހައިކޯޓުގެ ފަނޑިޔާރު ކަމަށް ޢައްޔަނުކުރުމަށް ނިންމުމާއި ގުޅިގެން މަޖިލީހުގެ މެންބަރު އަހްމަދު ޠާރިގު (ޓޮމް)، ޝަކީލަށް ވަރުގަދަ އިންޒާރެއް ދެއްވައިފި އެވެ.

ގާޒީ ޝަކީލް މިހާރު ވަނީ ހައިކޯޓުގެ ފަނޑިޔާރު ކަމަށް އައްޔަން ކުރަން ޖޭއެސްސީން ނިންމައި އެކަން އިއުލާން ކޮށްފައިވަނީ މިމަހުގެ 6 ވަނަ ދުވަހުއެވެ. އޭނާ ހައިކޯޓުގެ ފަނޑިޔާރު ކަމާއި ހަވާލުވާނީ އަންނަ ހޯމަ ދުވަހު އެވެ.

އެކަމާއި ގުޅިގެން ޠާރިގު ކުރެއްވި ޓުވީޓެއްގައި ވިދާޅުވީ، ސިޔާސީ ހުކުމް ކުރެއްވި ފަނޑިޔާރުގެ މައްސަލަ ނުބަލާނެ ކަމަށް ހީކުރުމަކީ މޮޔަކަމެއް ކަމަށެވެ.

"ހުވާ ތި ކުރެވެނީ 6 މަސް ދުވަހަށް. މަގާމުވެސް ގެއްލޭނެ އަދި ޖިނާއީ ތަހްގީގާ ވެސް ކުރިމަތިލާންޖެހޭނެ." ޠާރިގު ވިދާޅުވިއެވެ.

ޝަކީލް ހުވާ ކުރުން ހޯމަ ދުވަހަށް ތާވަލް ކޮށްފައިވާއިރު، އޭނާ، ހައި ކޯޓުގެ ފަނޑިޔާރުކަމަށް އައްޔަންކުރުމަށް ޖޭއެސްސީން ނިންމި ނިންމުން މުރާޖާ ކުރުމަށް އިދިކޮޅުން ވަނީ ގޮވާލާފައެވެ.

ރައީސް ޔާމީންގެ މައްޗަށް ހުކުން ކުރާ ކޮންމެ ފަނޑިޔާރަކަށް ޕްރޮމޯޝަން ލިބިގެން ދިއުމަކީ އިއްތިފާގެއް ކަމަށް އިދިކޮޅުން ނުދެކޭ ކަމަށާ، ވޮޑުމުއްލާ މައްސަލައިގައި ރައީސް ޔާމިންގެ މައްޗަށް ހުކުމްކުރި ފަނޑިޔާރު އަލީ ރަޝީދަށް ސުޕްރިމް ކޯޓުން ޖާގަ ދީފައިވާއިރު، ޝަކީލަށް ހައިކޯޓުން ޖާގަ ދިނުމަކީ ރައީސް ޔާމިނާއި ދެކޮޅަށް ހުކުން ކުރުމުގެ އިނާމެއްގެ ގޮތުން ދިން ޕްރޮމޯޝަނެއް ކަމަށްވެސް އިދިކޮޅުން ބުނެއެވެ.