ބްރޮޑްކޮމްއަށް ހުށަހަޅާފައިވާ ނަންތަކަށް ރައްޔިތުންގެ ހިޔާލު ހޯދަނީ

މޯލްޑިވްސް ބްރޯޑްކާސްޓިންގް ކޮމިޝަންގެ މެމްބަރެއްގެ މަގާމުގެ މުއްދަތު ހަމަވާތީ، އެ މަގާމަށް އައްޔަނު ކުރުމަށް ރައީސުލްޖުމްހޫރިއްޔާ މަޖިލީހަށް ނަންފުޅު ފޮނުއްވާފައިވާ ފަރާތްތަކާ ގުޅޭގޮތުން އާއްމުންގެ ހިޔާލު ހޯދުމަށް މަޖިލީހުން ފުރުސަތު ހުޅުވާލައިފިއެވެ.

އެ މަގާމުގެ މުއްދަތު ހަވަމަވީ މި މަހުގެ 15 ވަނަ ދުވަހުއެވެ.

ބްރޮޑްކާސްޓް ކުރުމުގެ ގާނޫނުގެ ދަށުން މޯލްޑިވްސް ބްރޯޑްކާސްޓިންގް ކޮމިޝަނަށް އައްޔަނު ކުރުމަށްޓަކައި ރައީސުލްޖުމްހޫރިއްޔާ، ރައްޔިތުންގެ މަޖިލީހަށް ފޮނުއްވާފައިވާ ނަންފުޅުތައް ދިރާސާކޮށް ނިންމުމަށްޓަކައި މިިދިޔަ މަހު ބޭއްވި ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރުގެ ނުވަ ވަނަ ޖަލްސާގައި މިނިވަން މުއައްސަސާތަކުގެ ކޮމިޓީއަށް ވަނީ ފޮނުވާފައެވެ.

އެހެންކަމުން، މޯލްޑިވްސް ބްރޯޑްކާސްޓިންގް ކޮމިޝަންގެ މެމްބަރުކަމުގެ މަގާމަށް އައްޔަނު ކުރުމަށްޓަކައި ރައީސުލްޖުމްހޫރިއްޔާ، ނަންފުޅު ފޮނުވާފައިވާ ފަރާތްތަކާ ގުޅޭގޮތުން އާއްމުންގެ ޝަކުވާއެއް ވޭތޯ ބެލުމަށްޓަކައި ރައްޔިތުންގެ މަޖިލީހުގެ ގަވާއިދުގެ ދަށުން އިއުލާނުކުރީ ކަމަށް މަޖިލީހުގެ އިއުލާނުގައިވެއެވެ.

އެ ނަންތަކަކީ:-

* އަލްއުސްތާޛު ޝިހާމް މުޙައްމަދު ވަޙީދު، ދަފްތަރު ނަންބަރު ރސ 5143

* އަލްއުސްތާޛް ޝާން ޞާލިހް މުހައްމަދު، ފިނިވާދީ/ ދ. ކުޑަހުވަދޫ

* އަލްފާޟިލް ހުސައިން ޢަމްރު، ވ. ރޯޝަން

* އަލްފާޟިލާ ޞަފާ ޝަފީޤް، ބިއްލޫރިވިލާ/ ދ. މީދޫ

އެހެންކަމުން އެ ފަރާތްތަކާ ގުޅޭގޮތުން ޝަކުވާއެއް ވާނަމަ އަންނަ ހޯމަ ދުވަހުގެ މެންދުރު 2:00ގެ ކުރިން ޝަކުވާ ހުށަހެޅުމަށް މަޖިލީހުން ވަނީ އެދިފައެވެ.

މެއިލް ކުރާއިރު ޝަކުވާ ހުށަހަޅާ ފަރާތުގެ ފުރިހަމަ ނަމާއި، ދާއިމީ އެޑްރެސް އަދި ގުޅޭނެ ފޯނު ނަންބަރު އެނގޭގޮތަށް އެ ޝަކުވާ މެއިލް ކުރުމަށް ނުވަތަ މަޖިލީހަށް ލިޔުމަކުން ހުށަހެޅުމަށް މަޖިލީހުން ވަނީ އެދިފައެވެ.

މެއިލް: [email protected]