ޖޭއެސްސީ އިސްލާޙުކުރުން ފަސް ކުރަނީ ރައީސް ޔާމީންގެ މައްސަލައަށް ނުފޫޒު ފޯރުވަން: އިދިކޮޅު

ޖުޑިޝަލް ސާވިސް ކޮމިޝަން(ޖޭއެސްސީ) ގައި ސިޔާސީ މީހުންނަށް ނުތިބެވޭގޮތަށް ކޮމްޕޮސިޝަން ބަދަލުކޮށް ޖޭއެސްސީ އިސްލާހުކުރުން ސަރުކާރުން ފަސްކުރަނީ ވާދަވެރި ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމުގެ މައްސަލަތަކަށް ނުފޫޒު ފޯރުވުމަށްކަމަށް ވާދަވެރި ސިޔާސީ ޕާޓީން ބުނެފި އެވެ.

ވ. އާރަށުގެ މުއާމަލާތާއި ގުޅުވާ ރައީސް އަބްދުالله ޔާމީން އަބްދުލްގައްޔޫމުގެ މައްޗަށް ކްރިމިނަލް ކޯޓުން އިއްވި ހުކުން ހައިކޯޓުގައި އިސްތިއުނާފުކޮށްފައި ވާއިރު، އެ މައްސަލަ ބަލައިގަތުމާމެދު ގޮތެއް ނިންމުން ދިގުލައިގެންދާތީ އިދިކޮޅުގެ ކޯލިޝަންގެ ލީޑަޝިޕުން މިއަދުވެސް ވަނީ ހައިކޯޓަށް ވަޑައިގެންފަ އެވެ.

ހައިކޯޓުގެ ރަޖިސްޓްރާއާއި ބައްދަލުކުރުމަށް ގިނަ ވަގުތުތަކެއް ވަންދެން ކޯޓުގައި ހޭދަކުރެއްވުމަށްފަހު ނިކުމެވަޑައިގެން ނޫސްވެރިންނާއި ބައްދަލުކުރައްވާ ވާހަކަދައްކަވަމުން އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވީ މިއަދުވެސް އިދިކޮޅުގެ ލީޑަޝިޕާއި ބައްދަލުކުރެއްވުމަށް ހައިކޯޓުގެ ރަޖިސްޓްރާ ދެކޮޅު ހައްދަވާފައިވާ ކަމަށެވެ.

ރައީސް ޔާމީންގެ އިސްތިއުނާފު މައްސަލައިގައި އެ ކޯޓުން ޖަާބުދާރީ ވާނީ ރައީސް ޔާމީންގެ ގާނޫނީ ޓީމަށްކަމަށް ހައިކޯޓުން ބުނެފައިވާކަމަށް އަބްދުއްރަހީމް ވިދާޅުވި އެވެ.

"މީ 3 ވަނަ ދުވަސް އަޅުގަނޑުމެން ކޯޓަށް އައި. އެހެން ނަމަވެސް މިތަނުގެ ރަޖިސްޓްރާއާއި އަޅުގަނޑުމެންނާއި ބައްދަލުވާގޮތެއް ނުވި. ކޯޓުން ބުނީ އެ މައްސަލައާއި ގުޅޭގޮތުން މުއާމަލާތު ކުރަން ބޭނުންވާކަމަށް ވަންޏާ، މައްސަލައިގެ މުސްތައުނިފާއި ނުވަތަ ވަކީލަތު މެދުވެރިކޮށް ވާހަކަދައްކާށޭ. އަޅުގަނޑުމެން މި އުޅެނީ މުސްތައުނިފާއި ވަކީލާއި މެދުވެރިކުރަންވެގެން ނޫނޭ. އަޅުގަނޑުމެން މި އުޅެނީ އަޅުގަނޑުމެންގެ ރިޔާސީ ކެންޑިޑޭޓުގެ މައްސަލަ  މި ތަނުގައި (ހައިކޯޓުގައި) ރަޖިސްޓާނުކޮށް ލަސްވާތީ އެކަމާއި ކަންބޮޑުވެގެން"

ޕީއެންސީގެ ރައީސް އަބްދުއްރަހީމް އަބްދުالله

އެއާއެކު އަބްދުއްރަހީމް ވިދާޅުވީ ހައިކޯޓުގެ ރަޖިސްޓްރާ އިދިކޮޅުގެ ލީޑަޝިޕާއި ބައްދަލުނުކުރެއްވީ ޖޭއެސްސީން އަންގައިގެން ކަމަށެވެ. ހައިކޯޓާއި، އެ ކޯޓުގެ ރަޖިސްޓްރާގެ މައްޗަށް ޖޭއެސްސީން އިންތިހާއަށް ނުފޫޒު ފޯރުވަމުން ދާކަމަށް އަބްދުއްރަހީމް ތުހުމަތު ކުރެއްވި އެވެ.

"އަޅުގަނޑުމެން މި ދަންނަވަނީ ރަޖިސްޓާ އަޅުގަނޑުމެންނާއި ބައްދަލުނުކޮށްގެން މި އުޅެނީވެސް ނުފޫޒު އޮވެގެންނޭ. ބައްދަލު ނުކުރަން އަންގާފަ އޮވެގެންނޭ. އަޅުގަނޑުމެން މި ސުވާލު ކުރީމު ޖޭއެސްސީއާ. އެބޭފުޅުންނަކަށް ޖަވާބެއް ނުދެވުނު. މި އެންމެންގެ ހާޒިރުގައި (އިދިކޮޅު ލީޑަޝިޕްގެ ބޭފުޅުން) ގެ ހާޒިރުގައި އަޅުގަނޑުމެން ދެންނެވިން އަޅުގަނޑުމެންނަށް ވިދާޅުވެބައްލަވާށޭ ރައީސް ޔާމީނުގެ މައްސަލައަށް ޖޭއެސްސީ މެދުވެރިކޮށް ސަރުކާރުން ކިހާވަރެއްގެ ނުފޫޒެއް ފޯރުވާ ހެއްޔޭ؟ ޖޭއެސްސީގެ ސެކެޓްރީ ޖެނެރަލް ވިދާޅުވީ ތިޔަށް ޖަވާބެއްދެއްވާކަމަށް އަޅުގަނޑު ނެތީމޭ. އެހެން ވިދާޅުވި ވިދާޅުވުމުން އެނގެނީ އިންތިހާއަށް ނުފޫޒު އޮތްކަން"

ޕީއެންސީގެ ރައީސް އަބްދުއްރަހީމް އަބްދުالله

އަބްދުއްރަހީމް އިތުރަށް ވިދާޅުވީ ޖޭއެސްސީ އެތުރިފައިވާ ގޮތް ބަދަލުކޮށް އެ ކޮމިޝަނަކީ ސިޔާސީ ނުފޫޒުތަކުން އެއްކިބާވެފައިވާ ތަނަކަށް ހެދުމަށް ސަރުކާރުން ވީ ވައުދުވެސް ނުފުއްދާ ފަސް ކުރަމުންދަނީ ރައީސް ޔާމީންގެ މައްސަލައަށް ނުފޫޒު ފޯރުވުމުގެ މަގްސަދުގައި ކަމަށެވެ.

ސަރުކާރުގެ ވައިދު ފުއްދަން މަޖިލީހުގެ މަޖިބަދޫ ދާއިރާގެ މެމްބަރު އަހުމަދު ތާރިގު 3 ފަހަރުމަތިން މަޖިލީހަށް ހުށައެޅުމުން އެ މައްސަލަ ބޭރުކޮށްލާފައިވާއިރު، މި ސަރުކާރުން ޖޭއެސްސީ އިސްލާހު ކުރާނެކަމަށް ގަބޫލު ނުކުރެވޭކަމަށް އަބްދުއްރަހީމް ވިދާޅުވި އެވެ.

"ރައީސް ޔާމީންގެ މައްސަލަ މި މީހުން (ސަރުކާރުން) ބޭނުންވާ ގޮތަކަށް ކުރުމަށް ބޭނުންވާ ހުރިހާ ކަމަކަށް މަގުފަހި ކުރާނެ. އަޅުގަނޑުމެންގެ މަހިބަދޫ ދާއިރާގެ މެމްބަރު ޓޮމް 3 ފަހރުމަތިން ހުށައަޅައިފި، 2ފަހަރު ބޭރުކޮށްލީ. އެހެންވީމަ އަޅުގަނޑުމެން ގަބޫލު ކުރަނީ މި ހުރިހާކަމެއް ތަރުތީބުވެގެން މި ދަނީ ރައީސް ޔާމީންގެ ޝަރީއަތަށް އެމީހުންނަށް ބޭނުންވާ ގޮތަކަށް ނުފޫޒުފޯރުވޭނެ ގޮތްތަކެއް ހޯދުމަށްޓަކައޭ"

ޕީއެންސީގެ ރައީސް އަބްދުއްރަހީމް އަބްދުالله

އިދިކޮޅުން ބުނީ ރައީސް ޔާމީންގެ މައްސަލައިގެ އިސްތިއުނާފު ލަސް ކުރުމަކީ އެމަނިކުފާނުގެ އިންތިޚާބީ ހައްގަށް ހުރަސްއެޅިގެންދާނެ ކަމެއް ކަމަށެވެ. އަދި އެއީ އެކޯލިޝަނުން އިންތިހާއަށް ކަންބޮޑުވާ ކަމެއް ކަމަށެވެ.

އެކަން ފާހަގަކުރައްވާ އިދިކޮޅު ޕީއެންސީގެ ރައީސް އަބްދުއްރަހީމް ވިދާޅުވީ ރައީސް ޔާމީންގެ ފަރާތްޕުޅުން ހުށައަޅާފައިވާ އިސްތިއުނާފު ބަލައިގަތުމާމެދު ގޮތެއް ކަނޑައަޅާ އެމައްސަލަ ފަށައިގަންނަންދެން އިދިކޮޅު ލީޑަޝިޕުން ކޯޓަށް ވަޑައިގެން އެވާހަކަ ހުށައަޅުއްވާނެ ކަމަށެވެ. އަދި އެ މައްސަލަ އަވަސްކުރުމަށް އެދި ކޯޓުގައި ދަންނަވަމުން ގެންދާނެ ކަމަށެވެ.