ހައިކޯޓުގެ ރަޖިސްޓްރާ ބައްދަލު ނުކުރަނީ ސަރުކާރުން އަންގައިގެން: އިދިކޮޅު

ވ. އާރަށުގެ މުއާމަލާތާއި ގުޅުވާ ރައީސް އަބްދުالله ޔާމީން އަބްދުލްގައްޔޫމުގެ މައްޗަށް ކްރިމިނަލް ކޯޓުން އިއްވި ހުކުން ހައިކޯޓުގައި އިސްތިއުނާފުކޮށްފައި ވާއިރު، އެ މައްސަލަ ބަލައިގަތުމާމެދު ގޮތެއް ނިންމުން ދިގުލައިގެންދާތީ އިދިކޮޅުގެ ކޯލިޝަންގެ ލީޑަޝިޕުން ހައިކޯޓަށް ވަޑައިގެން ކޯޓުގެ ރަޖިސްޓްރާއާއި ބައްދަލުކުރުމަށް އެދުމުން، އެބޭފުޅާ ބައްދަލު ނުކުރައްވަނީ ޖޭއެސްސީން އަންގައިގެންކަމަށް އިދިކޮޅު އިއްތިހާދު ވަގުތީގޮތުން ހިންގެވުމާއި ހަވާލުވެހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ.

އާރަށު މުއާމަލާތާއި ގުޅުވާ ރައީސް ޔާމިންގެ މައްޗަށް ކްރިމިނަލް ކޯޓުން އިއްވި ހުކުމް އެމަނިކުފާނު ފަރާތްޕުޅުން ހައިކޯޓުގައި އިސްތިއުނާފުކޮށްފައިވަނީ ނިމިފިޔަ ފެބުރުއަރީމަހުގެ 21 ގައެވެ. އެހެން ނަމަވެސް އެ މައްސަލަ ހުށައެޅިތާ ދެ ހަފްތާ ވާންދާއިރު ކޯޓުން އަދި މައްސަލަ ބަލައިގަތުމާއި ގުޅޭގޮތުން ގޮތެއް ނިންމާފައެއް ނުވެއެވެ.

އެހެންކަމުން، އެ މައްސަލަ ބަލައިގަތުމާމެދު ގޮތެއް ނިންމުން ލަސްވެ ދިގުލައިގެންދާކަން ފާހަގަކުރައްވާ އިދިކޮޅު ކޯލިޝަންގެ ލީޑަޝިޕުން ވަނީ އެކި ފަހަރުމަތިން ހައިކޯޓަށް ވަޑައިގެން ހައިކޯޓުގެ ރަޖިސްޓްރާއާއި ބައްދަލުކޮށް އެ މައްސަލަ އޮތް ހިސާބެއް ހޯދުމަށް މަސައްކަތް ކުރައްވާފަ އެވެ.

އެގޮތުން މިއަދުވެސް އިދިކޮޅު ކޯލިޝަންގެ ލީޑަޝިޕް ބޭފުޅުން ހައިކޯޓަށް ވަޑައިގެންފައިވާއިރު މިއަދުވެސް އެ ބޭފުޅުންނާއި ބައްދަލުކުރެއްވުމަށް ހައިކޯޓުގެ ރަޖިސްޓްރާ ވަނީ ދެކޮޅު ހައްދަވާފަ އެވެ.

ހައިކޯޓުން ނިކުމެ ވަޑައިގެން މީޑިއާއަށް ދެއްވި ބަސްދީގަތުމެއްގައި، ޕީއެންސީގެ ރައީސް އަބްދުއްރަހީމް އަބްދުالله ވިދާޅުވީ ހައިކޯޓުން އަމަލުކުރަމުންދަނީ ވަރަށް ޒިންމާދާރުކަން ކުޑަ ގޮތެއްގައި ކަމަށެވެ. އަދި ހައިކޯޓުގެ ރަޖިސްޓްރާ ވާދަވެރި ސިޔާސީ ޕާޓީގެ ލީޑަރުންނާއި ބައްދަލުކުރައްވަން ޖެހޭ ގާނޫނެއް ނެތްކަމަށް ވިދާޅުވަމުންދާ ކަމަށެވެ.

"އަޅުގަނޑުމެން ސުވާލުކުރިން ކޮން ގާނޫނެއްގެ ދަށުންތޯ ބައްދަލު ނުކުރަނީ. އެބޭފުޅުން ވިދާޅުވަނީ ކޮން ގާނޫނެއްގެ ދަށުން ހޭ ބައްދަލުކުރަން ޖެހެނީ. އަޅުގަނޑުމެން މި ދަންނަވަނީ އޭ ގާނޫނު އަސާސީގެ ދަށުން. ގާނޫނު އަސާސީގެ ދަށުން ބައްދަލުކުރަން ޖެހޭ މައިގަނޑު ސަބަބަކީ ދައުލަތުގެ ކަންކަމާއި ހަވާލުވެ ތިއްބަވާ ބޭފުޅުންނަކީ ރައްޔިތުންނަށް ޖަވާބުދާރީވާން ޖެހޭ ބޭފުޅުން"

ޕީއެންސީގެ ރައީސް އަބްދުއްރަހީމް އަބްދުالله

އަބްދުއްރަހީމް ވިދާޅުވީ ރައީސް ނަޝީދު އަވަހާރަކޮށްލަން ބޮން ގޮއްވާލި މައްސަލައާއި ގުޅޭގޮތުން ކްރިމިނަލް ކޯޓުގެ ރަޖިސްޓްރާއާއި އެމަނިކުފާނުގެ ފަރާތްޕުޅުން އައްބާސް ކިޔާ ބޭފުޅަކު ބައްދަލު ކުރައްވާފައިވާ ކަމަށެވެ.

އެހެން ނަމަވެސް އިދިކޮޅު އިއްތިހާދުގެ ލީޑަރުންނާއި ބައްދަލުކުރަން ހައިކޯޓުގެ ރަޖިސްޓްރާއަށް ކެރިވަޑައި ނުގަންނަވާކަން އަބްދުއްރަހީމް ފާހަގަކުރެއްވި އެވެ.

އޭގެ އިތުރުން އަބްދުއްރަހީމް ވިދާޅުވީ މިއީ ރޭވިގެން ހިންގާ ކަމެއްކަމަށެވެ. އަދި މީގެ ފަހަތުގައި އިންތިހާއަށް ނުފޫޒު އޮތްކަމަށް އޭނާ ވިދާޅުވިއެވެ.

"އަޅުގަނޑުމެންނަށް ފެނިގެން ހިނގައްޖެ ރައީސް ނަޝީދުގެ ބޮން ގޮއްވާލި މައްސަލައާއި ގުޅޭގޮތުން ކްރިމިނަލް ކޯޓުގެ ރަޖިސްޓްރާއާއި ބައްދަލުކޮށްފި އައްބާސް ފާއިޒް ކިޔާ ބޭފުޅެއް. ބައްދަލުކޮށްފަ އޭނާ ޓްވީޓުވެސް އެބަ ކުރޭ. އެކަމަކު އަޅުގަނޑުމެންނަކަށް ރައީސް ޔާމިންގެ މައްސަލައާއި ގުޅޭގޮތުން މިގަތުގެ ރަޖިސްޓްރާއާއި ބައްދަލުވާގޮތެއް ނުވޭ. އެހެންވީމަ މިއީ ރޭވިގެން.. އަޅުގަނޑު ހަމަ ތަކުރާރުކޮށް މި ދަންނަވަނީ ސަރުކާރުގެ ނުފޫޒު އިންތިހާއަށް މި އޮތީ ރައީސް ޔާމީންގެ ޝަރީއަތުގެ ތެރެއަށް ވަދެފަ"

ޕީއެންސީގެ ރައީސް އަބްދުއްރަހީމް އަބްދުالله

ވ. އާރަށް މައްސަލައިގައި ރައީސް ޔާމީނުގެ މައްޗަށް ދައުލަތުން ކޮށްފައިވާ ދެ ދައުވާވެސް ސާބިތުވާ ކަމަށް ކަނޑައަޅައި އެމަނިކުފާނު 11 އަހަރަށް ޖަލަށް ލައި، 5 މިލިއަން ޑޮލަރުން ޖޫރިމަނާ ކުރުމަށް ކްރިމިނަލް ކޯޓުން ހުކުމްކުރީ މިދިޔަ ޑިސެމްބަރު މަހުގެ 25 ވަނަ ދުވަހު އެވެ.

އެ ހުކުމް ހައިކޯޓުގައި އިސްތިއުނާފުކޮށްފައިވާއިރު ހައިކޯޓުން ރައީސް ޔާމީން މިނިވަންވެ ވަޑައިގަންނަވާނެ ކަމުގެ ޔަގީންކަން އޮތްކަމަށް ރައީސް ޔާމީންގެ ޤާނޫނީ ޓީމުން ވަނީ ވިދާޅުވެފަ އެވެ.